Ezekiel 25

A ma kpata Amon hɛ mi

1 ⓢ Yawɛ kɛ mi tu munyu ekohu.

2 E ke, “Nɔmlɔ adesa, plɛ o hɛ mi kɛ kpee Amon bi ɔmɛ, nɛ o de mɛ ke a ma kpata a hɛ mi.

3 De Amon bi ɔmɛ ke á bu nɔ́ nɛ imi Nyɔmtsɛ Yawɛ, i ngɛ mɛ dee ɔ tue. Benɛ a ble ye he klɔuklɔu ɔ, nɛ a ha Israel zugba a nɔ je gu, nɛ a nuu Yuda bi ɔmɛ kɛ ho ma se ya a, nyɛ muɔ nɛ nyɛ de ke, ‘Yiɛɛ!’

4 Lɔ ɔ he ɔ, ma ngɔ nyɛ kɛ wo nihi nɛ je beleku je ɔ a dɛ mi. A maa ngɔ nyɛ zugba a kɛ pee a nɔ́. A ma ba po wehi ngɛ he nɛ nyɛ ngɛ ɔ, nɛ a kɛ nyɛ maa hi si. A maa ye nyɛ tso yiblii, nɛ a maa nu nyɛ na nyɔ nyu.

5 Raba ma a ma plɛ pee nga nɔ he nɛ afukpɔngɔhi maa ye ní ngɛ. Ma ha Amon bi ɔmɛ a zugba a tsuo ma plɛ pee to lɛmi he. Lɔ ɔ loko nyɛ maa le kaa imi ji Yawɛ.

6 “Bɔ nɛ imi Nyɔmtsɛ Yawɛ, i ngɛ dee ji nɛ ɔ nɛ: O fia o dɛ mi, nɛ o si si. O bui Israel zugba a, ejakaa o ngɛ e he juɛmi yaya.

7 Lɔ ɔ he ɔ, i kɛ mo ná; ma ngɔ mo ngɔ ha je ma amɛ nɛ a ha o níhi. A ma je mo ngɔ hɛ ngɔ fɔ, nɛ o hɛ mi ma kpata pɛsɛpɛsɛ kɛ maa je je ɔ mi. Kɛkɛ ɔ, o maa le kaa imi ji Yawɛ.”

A ma kpata Moab hɛ mi

8 ⓣ Bɔ nɛ Nyɔmtsɛ Yawɛ ngɛ dee ji nɛ ɔ nɛ: “Moab bi ɔmɛ de ke Yuda ngɛ kaa je ma kpa amɛ tsuo,

9 lɔ ɔ he ɔ, mahi nɛ bɔle Moab zugba a kɛ kpe, nɛ fãã e he ɔ, ma ha nɛ a ma ba tua mɛ, nɛ a maa gbɛ mɛ ngɔ fĩa. A ma tua lejɛ ɔ ma nɛ ɔmɛ nɛ a ngɛ fɛu pe kulaa a hulɔ: Bet Yeshimot, Baal Meon kɛ Kiriataim.

10 Ma ha nihi nɛ je beleku je ma ba tua Moab, kɛ Amon bi ɔmɛ tsuo si kake. A maa ye Moab nɔ; a ma kpata e hɛ mi pɛsɛpɛsɛ, nɛ a be e biɛ tete po kaie ngɛ je ma amɛ a kpɛti hu.

11 Ma gbla Moab tue wawɛɛ; kɛkɛ ɔ, a maa le kaa imi ji Yawɛ.”

A ma kpata Edom hɛ mi

12 ⓤ Bɔ nɛ Nyɔmtsɛ Yawɛ ngɛ dee ji nɛ ɔ nɛ: “Yi wu tso níhi nɛ Edom pee kɛ to níhi nɛ Yuda pee lɛ ɔ nane mi ɔ hiɛ tsɔ; e he lue nɛ e ye ɔ, e pee tɔmi agbo.

13 Lɔ ɔ he ɔ, i ngɛ dee ke ma gbla Edom tue wawɛɛ; ma kpata nimlihi, kɛ lohwehi tsuo a hɛ mi ngɛ lejɛ ɔ. Nihi babauu maa nɔ ngɛ ta mi kɛ maa je Teman kɛ yaa si Dedan tɔɔ. Nɛ Edom zugba a ma ba pee ma doku.

14 Ma ha ye ma Israel hu kɛ Edom maa to ní; nɛ Edom maa na bɔ nɛ ye we abofu nya wa ha ke i ngɛ nɔ́ ko tue gblae ɔ.” Nyɔmtsɛ Yawɛ lɛ de.

A ma kpata Filistia hɛ mi

15 ⓥ Bɔ nɛ Nyɔmtsɛ Yawɛ ngɛ dee ji nɛ ɔ nɛ: “Yi wu tso níhi nɛ Filistia bi ɔmɛ pee kɛ to nɔ́ nɛ a blema he nyɛli ɔmɛ pee mɛ ɔ nane mi ɔ nya wa; a kɛ ninyɛ kadikadi kpata a he nyɛli ɔmɛ a hɛ mi pɛsɛpɛsɛ.

16 Lɔ ɔ he ɔ, i ngɛ dee ke, i kɛ Filisti bi ɔmɛ maa to ní; ma tua mɛ, nɛ ma kpata a hɛ mi pɛsɛpɛsɛ; Keret bi ɔmɛ, kɛ nihi tsuo nɛ ngɛ wo nya ma amɛ a mi ɔ be a he yee.

17 Ma gbla a tue wawɛɛ nitsɛ. Ma ngɔ abofu kɛ gbla a tue, nɛ a maa nu he. Lɔ ɔ loko a maa le kaa imi ji Yawɛ.”