Ezekiel 16

Yerusalem, ma nɛ yi anɔkuale

1 Yawɛ kɛ mi tu munyu ekohu. E ke,

2 “Nɔmlɔ adesa, ní hiemi níhi nɛ Yerusalem pee ɔ, ha nɛ e le.

3 De Yerusalem ke bɔ nɛ Nyɔmtsɛ Yawɛ ngɛ lɛ dee ji nɛ ɔ nɛ: “Kanaan zugba a nɔ o je; lejɛ ɔ a fɔ mo ngɛ. Amor no ji o tsɛ, nɛ o nyɛ lɛɛ Hit no ji lɛ.

4 Benɛ a fɔ mo ɔ, a pui o langmɔ; a ngɔɛ nyu kɛ dui o he, konɛ o he nɛ tsɔ; a kpa we o he ngo; nɛ a ngɔɛ bo ko kulaa kɛ blaa we o he.

5 Ligbi ɔ nɛ a fɔ mo ɔ, nɔ ko nɔ ko nɛ́ mo mɔbɔ nɛ e maa pee ní nɛ ɔmɛ eko ha mo. Nɔ ko nɔ ko mi mi sãã we lɛ ngɛ o he, konɛ e suɔ o sane; se mohu a sake mo ngɔ hɛ fɔ nga mi; ejakaa nɔ tsuaa nɔ hie mo.

6 “Benɛ i ba gu o kasa nya kɛ bee nɛ i na mo ɔ, o ngɛ si wue ngɛ o muɔ ɔ mi. I de mo jamɛ a be ɔ mi lokoo ke, ‘O yi nɛ na wami,

7 nɛ́ o pee kaa nga nɔ tso nguaa ko.’ I ha nɛ o ba wa, nɛ o he hu ba pee fɛu saminya kaa yiheyo nɛ zangma pue e nɔ. O nyɔ ɔmɛ ba kle, nɛ o yi bwɔmi ba saminyayoo; se o hɛɛ o he gu pasaa.

8 “Benɛ i ba gu lejɛ ɔ ekohu ɔ, i na kaa jehanɛ lɛɛ o wa nɛ o su gbami nya. I ngɔ ye bo kɛ ha o nɔ, nɛ o he fɔ we si gu hu. I ka mo kita, nɛ i kɛ mo so; nɛ i ngɔ mo ngɔ pee ye yo.” Nyɔmtsɛ Yawɛ lɛ de.

9 “Jehanɛ i ngɔ nyu kɛ fɔ muɔ ɔ tsuo ngɛ o he, nɛ i kpa mo nu.

10 Lɔ ɔ se ɔ, i ngɔ ní nɛ ɔmɛ kɛ dla o he ha mo: tade nɛ a lo ga níhi saminyayoo kɛ wo mi, tokota kpakpa, mlɛ mi fimi nɔ́, kploba falefale, kɛ sliiki bo.

11 I ngɔ he dlami ní nɛ ɔmɛ hu kɛ dla o he: nine si ga, kuɛ ní, kɔsɔkɔsɔ,

12 gugwɔ mi ga, kɛ tue nya ní; nɛ i ngɔ jlasi nɛ ngɛ fɛu saminyayoo kɛ fi o yi.

13 I ha mo sika hiɔ, kɛ sika tsu june nɛ o kɛ dla o he. Kploba falefale, sliiki, kɛ bo nɛ a lo ga níhi ngɔ wo mi ji tadehi nɛ o woɔ. Niye ní nɛ o yeɔ ji abolo nɛ a ngɔ mamu kpakpa kɛ sã, kɛ jehanɛ hu hwo, kɛ oliv nu. O he pee fɛu wawɛɛ nitsɛ; nɛ o ba pee manyɛ.

14 O he pee fɛu kɛ pi si, nɛ o he biɛ ngɛ je ɔ mi tsuo; ejakaa imi nitsɛ lɛ i dla o he ha mo ja.” Nyɔmtsɛ Yawɛ lɛ de.

15 “Se moo lɛɛ o ngɔ o he fɛu, kɛ biɛ nɛ o na a kɛ pee nɔ́ nɛ o kɛ maa bɔ ajuama mohu; nɔ tsuaa nɔ nɛ ma ba be ngɛ lejɛ ɔ, o kɛ lɛ hwɔɔ si faa!

16 O ngɔ o bo ɔmɛ ekomɛ kɛ ya pee jami hehi nɛ ngɛ fɛu; ajuama nɛ o kɛ mawu kpahi bɔ ngɛ lejɛ ɔmɛ ɔ, e hí sɛɛmi; eko bɛ hyɛ, nɛ eko hu be bae gblegbleegble.

17 Lɔ ɔ se hu, o ngɔ o june kpakpa nɛ ji sika hiɔ, kɛ sika tsu nɛ imi nitsɛ i ha mo ɔ, nɛ o kɛ pee nyumu amagahi, nɛ o kɛ mɛ bɔ ajuama.

18 Bo nɛ a lo ga níhi kɛ wo mi ɔ, o ngɔ kɛ ya ha amaga amɛ a he, nɛ o ngɔ ye oliv nu, kɛ ye tsopa kɛ e he via a kɛ ya ma a hɛ mi.

19 I ha mo niye ní, abolo nɛ a ngɔ mamu kpakpa kɛ sã, kɛ hwo, kɛ oliv nu; se o kɛ ya sã bɔ kɛ ha amagahi mohu, konɛ e je via ha mɛ.” Nyɔmtsɛ Yawɛ lɛ de.

20 “Jehanɛ hu o bimɛ, nyumuhi kɛ yihi nɛ o fɔ ha mi ɔ, o gbe mɛ kɛ sã bɔ kɛ ja amagahi. Anɛ anɔkuale nɛ o yi mi nɛ ɔ pi ha mo,

21 nɛ lɔ ɔ he o kpale gbe ye bimɛ ɔmɛ, nɛ o ngɔ mɛ kɛ pee sami bɔ kɛ ha amagahi ɔ?

22 Benɛ o ngɛ ní hiemi ní nɛ ɔmɛ tsuo pee, nɛ́ o ngɛ ajuama bɔe basaa a, o kaii we gblee kaa o yihe be mi ɔ, o hɛɛɔ o he gu pasaa kɛ hii si wue ngɛ o muɔ mi.”

Yerusalem ba e je mi kaa ajuama

23 Nyɔmtsɛ Yawɛ ke, “Musu tloo mo oo, musu tloo mo! Yayamihi nɛ o pee nɛ ɔ tsuo se ɔ,

24 o pee jami hehi nɛ ya hiɔwe ngɛ blɔ ɔmɛ tsuo a mi kɛ ha o he.

25 O ha o he fɛu saminyayoo ɔ ba pee afa kaa mɔsɔ nɛ o kpa. Nɔ ko tsuaa nɔ ko kɛkɛ nɛ o kɛ maa kpe ɔ, o ngɔ o he ngɔ ha lɛ, nɛ o bɔ ajuama basaa.

26 Lɔ ɔ se hu, o kɛ Egipt bi, he lo akɔnɔtsɛmɛ ɔmɛ nɛ ngɛ o kasa nya a hu bɔ ajuama ja nɔuu. O kɛ o we ajuama bɔmi babauu ɔ wo ye mi mi la.

27 “Lɔ ɔ he ɔ, i kɛ ye he wami gbla o tue, nɛ i po o niye ní ɔ nɔ. I ngɔ mo kɛ wo o he nyɛli Filisti bi ɔmɛ a dɛ mi. Ahlua ní kpɔtɔɔ nɛ o ngɛ pee ɔ, pee Filisti bi ɔmɛ tete po zo.

28 “O ya bɔ ajuama kɛ kpa zugba a tsuo nɔ kɛ ya su Asiria bi ɔmɛ a ngɔ tɔɔ. O kɛ mɛ bɔ ajuama basaa, se lɔ ɔ tete po sui o nya.

29 O bɔ ajuama hluu kɛ ya su Babilonia bi jua yeli a zugba a nɔ tɔɔ; se lɔ ɔ hu sui o nya.”

30 Bɔ nɛ Nyɔmtsɛ Yawɛ ngɛ dee ji nɛ ɔ nɛ: “Hyɛ bɔ nɛ o mumu nya ta ha! O pee o he ajuamatsɛ, nɛ e pee we mo zo ko zo ko kulaa!

31 O pee jami hehi ngɛ blɔ ɔmɛ tsuo a mi kɛ ha o he. E slo mo ngɛ yaholi kpa amɛ a he; ejakaa moo lɛɛ o he we sika.

32 O ngɛ kaa yo gba puɛlɔ nɛ sume lɛ nitsɛ e huno, se nibwɔhi mohu e kɛ e he haa!

33 Yaholi heɔ sika kaa a hiɔwo ngɛ nyumu ɔmɛ a dɛ; se moo lɛɛ mo mohu lɛ o kee o suɔli ɔmɛ tsuo ní; o haa mɛ nyɔ mi ní, konɛ a je he tsuaa he kɛ ba nɛ a kɛ mo ba hwɔ si.

34 Moo lɛɛ e slo mo kulaa ngɛ yaholi kpa amɛ a he. Nɔ ko nɔ ko ba nyɛɛ we o se, nɛ nɔ ko nɔ ko ha we mo nɔ́ ko kaa hiɔwo; se mo mohu lɛ o woɔ mɛ hiɔ! Niinɛ, e slo mo kulaa ngɛ yaholi kpa amɛ tsuo a he.”

Mawu maa gbla Yerusalem tue

35 Lɔ ɔ he ɔ, Yerusalem, mo yaholɔ! Bu nɔ́ nɛ Yawɛ ngɛ mo dee ɔ tue.

36 Bɔ nɛ Nyɔmtsɛ ɔ ngɛ dee ji nɛ ɔ nɛ: “O kpa o he bo, nɛ o ha o suɔli ɔmɛ na o he gu saplapaa a. O kɛ mɛ bɔ ajuama basaa, nɛ o ja o we amaga amɛ tsuo. Jehanɛ hu o gbe o bimɛ ɔmɛ ngɔ sã bɔ kɛ ha amaga amɛ.

37 Zo ní nɛ ɔmɛ tsuo nɛ o tsu he je ɔ, ni nɛmɛ nɛ o suɔ mɛ, nɛ o kɛ mɛ fiɛ, kɛ ni nɛmɛ nɛ o sume a sane ɔ, ma bua mɛ tsuo a nya kɛ bɔle mo kɛ kpe; kɛkɛ ɔ, ma kpa o he bo tsuo ngɛ o he, konɛ mɛ tsuo a na o he gu saplapaa a.

38 Ma bu mo fɔ kaa o puɛ gba, nɛ o pue muɔ si. Ma ngɔ abofu, kɛ hunga kɛ gbla o tue, nɛ o hɛ mi ma kpata pɛsɛpɛsɛ!

39 Ma ngɔ mo ngɔ wo ni ɔmɛ a dɛ mi; nɛ a maa ku o jami he ɔmɛ. A ma kpa o he bo tsuo; a maa ngɔ o june saminyawiiwi ɔmɛ, nɛ o maa hɛɛ o he gu saplapaa.

40 “A ma sa o yi; a maa fia mo tɛ, nɛ a kɛ klaate maa poo mo kpɔ nya kpɔ nya.

41 A maa sã o we ɔmɛ, nɛ a maa gbla o tue ngɛ yihi babauu a hɛ mi. Ajuama nɛ o ngɛ bɔe basaa a, ma ha nɛ o kpa, nɛ o be o suɔli ɔmɛ hiɔ woe hu.

42 Kɛkɛ ɔ, ye mi mi la a nya maa ba si, nɛ ye hɛ be dɔe kɛ wo mo hu. Ma pee dii, nɛ ye mi mi be fue kɛ wo mo hu.

43 O kaii we nɔ́ nɛ i pee ha mo ngɛ o yihe mi ɔ, se mohu o ngɔ je mi bami yaya nɛ ɔmɛ tsuo kɛ wo ye mi mi la. Lɔ ɔ he nɛ i ha o na a he hiɔwo sisiisi ɔ nɛ. Se mɛni he je po nɛ o kpale ngɔ ajuama bɔmi basaa kɛ piɛ yayamihi nɛ o pee ɔ a he ɔ?” Nyɔmtsɛ Yawɛ lɛ de.

Biyo, o je o nyɛ

44 Yawɛ ke, “Yerusalem, abɛ nɛ nɔ tsuaa nɔ maa bu kɛ si mo ji, ‘Biyo, o je o nyɛ pɛ!’

45 O nyɛ lɛ fɔ mo niinɛ; e kua e huno kɛ e bimɛ; o je o nyɛmiyi ɔmɛ; mɛ hu a kua a hunomɛ kɛ a bimɛ. Nyɛ nyɛ ɔ, Hit no ji lɛ, se nyɛ tsɛ ɔ lɛɛ Amor no.

46 “O nyɛmiyo nɔkɔtɔma Samaria, kɛ e mi bi ɔmɛ ngɛ o kasa nya ngɛ omleyi je, nɛ o nyɛmiyo jokuɛyo Sodom, kɛ lɛ hu e mi bi ɔmɛ ngɛ o leneyi je.

47 Pi kaa o ya wo o nyɛmiyi ɔmɛ a nane ngɛ yayamihi nɛ a pee ɔ a mi kɛkɛ, se e yi be ko kulaa nɛ o ba puɛ wawɛɛ pe mɛ ngɛ blɔ tsuaa blɔ nɔ ngɛ o je mi bami tsuo mi.”

48 Nyɔmtsɛ Yawɛ ke, “I ngɛ ye he kita kae ke o nyɛmiyo Sodom, kɛ e mi bi ɔmɛ pee we yayamihi kaa níhi nɛ mo Yerusalem, kɛ o mi bi ɔmɛ pee ɔ.

49 O nyɛmiyo Sodom, kɛ e mi bi ɔmɛ woɔ a he nɔ; a ngɛ niye ní babauu, a ngɛ he jɔmi mi, nɛ a tue mi jɔ mɛ; se a yi bua ohiatsɛmɛ, kɛ nihi nɛ e fi mɛ ɔ.

50 Akɛnɛ a wo a he nɔ, nɛ a pee níhi nɛ a hiee ngɛ ye hɛ mi paa he je ɔ, i kpata a hɛ mi.

51 “Samaria pee we yayamihi nɛ o pee ɔ a mi fa tete po; ní yayamihi nɛ o pee ɔ hiɛ babauu pe e ní ɔmɛ. Ke a ngɔ mo kɛ to o nyɛmiyi ɔmɛ a he ɔ, ní yayamihi tsuo nɛ o pee ɔ ha nɛ e peeɔ kaa nɔ́ nɛ o nyɛmimɛ ɔmɛ yeɔ nguɔ!

52 O hɛ mi lɛ pue si nɛ ɔ nɛ! O ha a bu o nyɛmiyi ɔmɛ nihi nɛ da pe mo! Yayamihi nɛ o pee pe mɛ ɔ ha a da pe mo. O hɛ mi pue si; zo gbe mo kpɔtɔɔ, ejakaa o ha o nyɛmimɛ ɔmɛ pee kaa nihi nɛ mɛɛ lɛɛ a da!”

Sodom kɛ Samaria maa kpale ná ní ekohu

53 Yawɛ de Yerusalem ke, “Ma ha Sodom kɛ Samaria ma amɛ, kɛ a mi bi ɔmɛ maa kpale ná ní kpɔtɔɔ ekohu. Mo nitsɛ hu, ma ha o maa kpale ná ní ekohu, kaa mɛ nɔuu.

54 Kɛkɛ ɔ, o hɛ mi nɛ pue si, kɛ zo nɛ gbe mo ngɛ níhi nɛ o pee ɔ a he ɔ, ma ha a maa wo a bua.

55 O nyɛmiyo Sodom kɛ e mi bi ɔmɛ maa ba a zu nɔ ekohu; o nyɛmiyo Samaria kɛ e mi bi ɔmɛ hu maa ba a zu nɔ ekohu, nɛ mo Yerusalem kɛ o mi bi ɔmɛ hu nyɛ maa ba nyɛ zu nɔ ekohu.

56 Be ko nɛ be ɔ, tse o wo o he nɔ ngɛ o nyɛmiyo Sodom nɔ, nɛ e pee o nya he la,

57 loko yayamihi nɛ o pee ɔ tsuo ba je kpo? Jehanɛ lɛɛ o pee kaa lɛ, nɛ Edom bi, Filisti bi, kɛ ni kpa amɛ nɛ bɔle mo, nɛ a sume mo saasaa a, o ba pee ahlua bɔmi nɔ́ ha mɛ!

58 Zo ní nɛ o tsu, kɛ ní hiemi níhi nɛ o pee ɔ, a he tue gblami bɔɔ ko kɛkɛ ji nɛ ɔ nɛ.” Yawɛ lɛ de.

Somi ko nɛ ngɛ daa

59 Nyɔmtsɛ Yawɛ ke, “I kɛ mo maa to ní kaa bɔ nɛ mo hu o pee ɔ; ejakaa o bui somi ɔ, nɛ kita nɛ o ka a, o yi nɔ.

60 Se kɛ̃ ɔ, imi lɛɛ ma kai si nɛ i wo mo benɛ o ji yiheyo ɔ. I kɛ mo maa kpale so somi ko nɛ maa hi si daa.

61 Lɔ ɔ ma ha o ma kai o sa je mi bami ɔ, nɛ zo maa gbe mo ngɛ o nyɛmiyo nɔkɔtama Samaria, kɛ o nyɛmiyo wayoo Sodom tsuo a hɛ mi. Ma ha a maa kpale kɛ ba o ngɔ kaa biyihi nɛ imi nitsɛ i ngɔ ha mo, se pi ngɛ somi nɛ o kɛ mi so ɔ nya.

62 I kɛ mo maa so somi he, konɛ o le kaa imi ji Yawɛ.

63 Ma ngɔ o he yayami ɔmɛ tsuo kɛ pa mo; se kɛ̃ ɔ, o ma kai yayami ɔmɛ, nɛ zo maa gbe mo kpɔtɔɔ. Ma ngɔ tɔmi ɔmɛ tsuo kɛ pa mo, nɛ e maa pee mo nyakpɛ; o be nyɛe maa pa o nya mi tete po ngɛ zo ní nɛ o tsu ɔ he.” Nyɔmtsɛ Yawɛ lɛ de.