Yeremia 51

A maa gbla Babilonia tue ekohu

1 Bɔ nɛ Yawɛ de ji nɛ ɔ nɛ: “Ma ha nɛ kɔɔhiɔ nɛ puɛɔ ní maa fia ngɛ Babilonia zugba a nɔ, nɛ e ma kpata nihi a hɛ mi.

2 Ma ha nɛ he nyɛli ma ba sa Babilonia zugba a yi kɛ kpe; a ma kpata zugba a hɛ mi pɛsɛpɛsɛ. Babilonia zugba a maa pee falifali kaa zugba nɛ kɔɔhiɔ muɔ jakati ngɛ nɔ kɛ ho; nɔ́ ko nɔ́ ko be piɛe ngɛ nɔ.

3 Nyɛ ko ngmɛ a ta buli ɔmɛ blɔ nɛ a kpla a gbaja amɛ. Nyɛ ko ngmɛ mɛ blɔ nɛ a tsɛ̃ a kɛ̃ɛ̃ ɔmɛ. Nyɛ ko ha nɛ a nihewi ɔmɛ a yi nɛ na wami! Nyɛ kpata tabo ɔ tsuo hɛ mi!

4 A maa plaa mɛ ngɔ pue si ngɛ Kaldea gbɛjegbɛ ɔmɛ a nɔ, nɛ a ma gbo ngɛ lejɛ ɔ.

5 Niinɛ, Israel kɛ Yuda pee yayami kɛ si imi, Israel Nɔ Klɔuklɔu ɔ. Se imi Yawɛ Tabohiatsɛ Mawu ɔ, imi lɛɛ i kua we mɛ.

6 Nyɛɛ tu fo kɛ je Babilonia nɛ nyɛ kɛ he nyɛ yi wami. Nyɛ ko ha nɛ a gbe nyɛ ngɛ Babilonia bi ɔmɛ a he yayami ɔ he. Amlɔ nɛ ɔ, i ngɛ ye he lue yee ngɛ a nɔ, nɛ i ngɛ a tue gblae bɔ nɛ sa mɛ.

7 ⓚ Babilonia ngɛ kaa sika tsu kplu ko ngɛ ye dɛ mi nɛ ha je ɔ tsuo tɔ dã. Je ma amɛ tsuo nu wai ngɛ kplu nɛ ɔ mi, nɛ a fo godo.

8 Babilonia nɔ si tlukaa, nɛ e hɛ mi kpata. Nyɛ nya awe ha lɛ! Nyɛɛ to e pa amɛ a nɔ tsopa kaa alini e ma na he wami lo.

9 ⓛ Nibwɔhi nɛ ngɛ Babilonia a de ke, ‘Jinɛ wa ka kaa wa maa piɛ a he, se wa ya nyɛ we. Lɔ ɔ he ɔ, nyɛ ha nɛ waa je e he; nɔ tsuaa nɔ nɛ pue e ma mi blɔ. Mawu gbla Babilonia tue wawɛɛ nitsɛ; Mawu kpata zugba a hɛ mi pɛsɛpɛsɛ.’ ”

10 Yawɛ ke, “Ye ma, nyɛ he ose, nɛ nyɛ de ke, ‘Yawɛ wo wɔ nguɔ! Nyɛ ha nɛ waa ya Yerusalem, nɛ wa ya bɔ ma a nɔ́ nɛ Yawɛ, wa Mawu ɔ pee.’ ”

11 Yawɛ ha nɛ Media matsɛmɛ ɔmɛ a mumi te si, konɛ a ya kpata Babilonia hɛ mi. Bɔ nɛ e to nɛ e maa ye e he lue, nɛ e maa gbla Babilonia tue ngɛ lɛ Yawɛ, e we ɔ nɛ a ble ɔ he ji nɛ ɔ nɛ. Tatsɛmɛ ɔmɛ nɛ nyɛɛ ta a hɛ mi ɔ fa ke, “Nyɛɛ duɔ nyɛ kɛ̃ɛ̃ mi bi ɔmɛ a nya! Nyɛ wo nyɛ tsɛ̃i ɔmɛ a nɔ!

12 Nyɛ wo aflaangaa amɛ a nɔ kɛ pee okadi nɛ a kɛ ma tua Babilon gbogbo ɔmɛ. Nyɛɛ hla buli kpakpahi, nɛ nyɛ ha nɛ a ya da a blɔ hehi! Nyɛ ha nɛ ka woli ɔmɛ nɛ a dla a he!” Bɔ nɛ Yawɛ to kaa e maa pee Babilonia bi ɔmɛ ɔ, ja e pee ɔ nɛ.

13 ⓜ Pahi fuu ngɛ jamɛ a zugba a nɔ, nɛ a juetli hu hiɛ babauu. Se a nyagbe ɔ su; a po a wami kpa a.

14 Yawɛ Tabohiatsɛ ɔ ka e he kita ke e maa ngɔ nihi babauu kaa baalɛhi kɛ ba tua Babilonia. A maa ye kunimi, nɛ a ma hwɔ lele.

Mawu yi jemi la

15 Yawɛ lɛ bɔ je ɔ ngɛ e he wami nya. Nile lɛ e kɛ bɔ je ɔ, nɛ jamɛ a nile ɔ nɔuu e kɛ bli hiɔwe mi.

16 Ke e wo gbi kikɛ nɛ ɔ, nyu nɛ ngɛ hiɔwe ɔ keɔ wawɛɛ nitsɛ; Yawɛ haa nɛ afua teɔ si kɛ jeɔ zugba a nyagbe he ɔmɛ. E haa oslabai gbaa, be mi nɛ hiɔmi ngɛ nɛe, nɛ e jeɔ kɔɔhiɔ kpo kɛ jeɔ e nito he ɔ.

17 Nimli adesahi tsuo biɛ; a li nɔ́ ko nɔ́ ko. Sika gali a hɛ mi pue si pɛ, ejakaa amagahi nɛ a puɛɛ ɔ, ní guhi ji mɛ; wami ko wami ko be a mi.

18 Amaga amɛ ɔ, se nami ko be a he, yakayaka níhi, kɛ zo níhi kɛkɛ ji mɛ. Be mi nɛ Yawɛ ma ba gbla ma a tue ɔ, a we amaga amɛ hu a maa ku mɛ dukuduku.

19 Yakob Mawu ɔ be kaa mɛ; lɛ ji nɔ nɛ pee nɔ́ tsuaa nɔ́, nɛ e hla Israel kɛ pee lɛ nitsɛ e ma. E biɛ ji Yawɛ Tabohiatsɛ.

Yawɛ hamle ɔ

20 Yawɛ ke, “Babilonia, ye hamle ji mo; o ngɛ kaa ye ta hwumi ní. I ngɔ mo kɛ kpata je mahi, kɛ matsɛ yemihi a hɛ mi.

21 I ngɔ mo kɛ kpata okpɔngɔhi kɛ a nɔ hili a hɛ mi. I ngɔ mo kɛ kpata ta zugba lɛhi kɛ a kudɔli a hɛ mi.

22 I ngɔ mo kɛ gbe nyumuhi kɛ yihi, nikɔtɔmahi kɛ jokuɛwi, nihewi kɛ yihewi.

23 I ngɔ mo kɛ kpata to hyɛli kɛ a to ɔmɛ a hɛ mi. I ngɔ mo kɛ kpata ngmɔ huli kɛ a na kpakplaahi a hɛ mi. Amlaalohi kɛ ma ní tsuli hu, mo nɔuu i kɛ kpata a hɛ mi.”

A maa gbla Babilonia tue

24 Yawɛ ke, “Yayamihi tsuo nɛ Babilonia kɛ Babilonia ma mi bi ɔmɛ pee Yerusalem he je ɔ, ma gbla a tue nɛ nyɛ maa na kɛ nyɛ hɛngmɛ.

25 Mo Babilonia nɛ o ngɛ kaa yoku, nɛ o ngɛ je ɔ tsuo hɛ mi kpatae, i kɛ mo na! Ma nu mo, nɛ ma kpɛne mo kɛ je tɛ sa amɛ a nɔ ba ko si, nɛ o maa pee kaa yo nɛ sã.

26 Tɛhi nɛ maa je o mi ɔ, a be eko ngɔe kɛ ma tsu; a kɛ be kɔ nya tɛ, loo tsu sisi tomi tɛ pee. Mohu ɔ, o maa pee kaa zugba kplanaa kɛ ya neneene. Imi, Yawɛ lɛ i de.

27 “Nyɛɛ si aflaangaa. Nyɛ kpa titimati nɛ je ma amɛ nɛ a nu! Nyɛ ha nɛ je ma amɛ nɛ a mia, nɛ a kɛ Babilonia ya hwu ta! Nyɛ de Ararat, Mini, kɛ Ashkenaz matsɛ yemi ɔmɛ ke a ya tua Babilonia. Nyɛ hla tatsɛ nɛ e nyɛɛ a hɛ mi. Nyɛɛ ngɔ okpɔngɔhi babauu kaa baalɛhi kɛ ba.

28 Nyɛ ha nɛ je ma amɛ nɛ a mia, nɛ a kɛ Babilonia ya hwu ta. Nyɛ ya kpee Media matsɛmɛ ɔmɛ, a we amlaalo ɔmɛ, ma ní tsuli ɔmɛ, kɛ a nɔ yemi he ɔmɛ tsuo kɛ ba.

29 Yawɛ to e yi mi kaa e ma ha nɛ Babilonia zugba a maa pee kaa nga kplanaa nɔ, nɛ nɔ ko nɔ ko be lejɛ ɔ hie. Yawɛ yi mi tomi nɛ ɔ ba mi. Enɛ ɔ he je ɔ, zugba ngɛ mimiɛe, nɛ e ngɛ hosoe.

30 Babilonia ta buli ɔmɛ kpa ta hwumi, nɛ a hii si ngɛ a mɔ ɔmɛ a mi. A kɔni mi jɔ̃, nɛ a pee kaa yihi. Babilonia agbo ɔmɛ ku kɛ pueɔ si, nɛ we ɔmɛ sã.

31 Tsɔli babauu ngɛ fo nɔ kɛ yaa nɛ a ya bɔ Babilonia matsɛ ɔ amaniɛ ke he nyɛli ba ngɔ e ma a tsuo.

32 A ngɔ pa pomi he ɔmɛ, a mɛ mɔ ɔmɛ a he la, nɛ sawale nu Babilonia ta buli ɔmɛ.

33 E be kɛe kulaa nɛ a maa poo a mi ngɔ pue si kaa blɛfo ngɛ ngma mi sami he. Imi Yawɛ Tabohiatsɛ, Israel Mawu ɔ lɛ i de.”

34 Babilonia matsɛ, Nebukadnezar poo Yerusalem mi nɛ e ye. E muɔ níhi kɛ je ma a mi, nɛ ma a fɔɔ si kaa buɛ mi gu. E mi ma a kaa bɔ nɛ sinɔ ngua miɔ nɔ́ ɔ. E ye ma a mi ní kpakpa amɛ, nɛ e sake nɔ́ nɛ piɛ ɔ ngɔ pue he.

35 Nyɛ ha nɛ Zion bi ɔmɛ nɛ a de ke, “Yi mi nɛ Babilonia bi ɔmɛ wa wɔ ɔ, a gbla a tue kɛ to nya!” Nyɛ ha nɛ Yerusalem bi ɔmɛ nɛ a de ke, “Haomi nɛ ba wa nɔ ɔ, a gbla Babilonia bi ɔmɛ a tue kɛ to nya!”

Yawɛ maa piɛ Israel he

36 Lɔ ɔ he ɔ, bɔ nɛ Yawɛ de Israel bi ɔmɛ ji nɛ ɔ nɛ: “Ma ye nyɛ sane ɔ ha nyɛ, nɛ ma gbla nyɛ he nyɛli ɔmɛ a tue ha nyɛ. Ma ha nɛ Babilonia wo ɔ, kɛ pa amɛ ma gbli.

37 Ma ha nɛ Babilon maa pee ma doku; e maa pee nga mi gbehi a hi he, nɛ nɔ ko nɔ ko be lejɛ ɔ hie hu. Nihi nɛ ma ba be ngɛ lejɛ ɔ, a nya maa kpɛ a he, nɛ a maa ye gbeye.

38 Babilonia bi ɔmɛ tsuo maa hi huãe kaa jata; a maa hi pɛe kaa jata bimɛ.

39 Ke a he mi akɔnɔ te si ɔ, ma tsɛ mɛ ní yemi; ma ha mɛ dã nɛ a nu nɛ a de. Kɛkɛ ɔ, a maa sɛ mahe vii mi, nɛ a be si tee hu.

40 Lɔ ɔ se ɔ, ma ngɔ mɛ kɛ ho nɛ a ya gbe mɛ kaa bɔ nɛ a gbeɔ jijɔ, loo apletsi, loo agbosu. Imi, Yawɛ lɛ i de.”

Babilon hɛ mi kpata

41 Bɔ nɛ Yawɛ de ngɛ Babilon he ji nɛ ɔ nɛ: “Kɛ e ba lɛ kɛɛ nɛ a ngɔ Babilon, ma nɛ je ɔ tsuo jeɔ e yi ɔ! Kɛ e ba lɛ kɛɛ loko Babilon ba pee nɔ́ nɛ a hiee ngɛ je ma amɛ tsuo a kpɛti kikɛ nɛ ɔ!

42 Wo ɔ te si kɛ wo Babilon, nɛ wo oslɔke ɔmɛ nɛ ngɛ pɛe ɔ ha e nɔ.

43 Babilon ma amɛ plɛ pee níhi nɛ a hiee; zugba a pee kaa nga kplanaa nɛ nyu be nɔ. Nɔ ko nɔ ko be lejɛ ɔ, nɛ nɔ ko hu ba bi ngɛ lejɛ ɔ.

44 Ma gbla Babilonia mawu ɔ nɛ a tsɛɛ Bel ɔ tue, nɛ ma je e ju ní ɔmɛ kpo; je ma amɛ be lɛ jae hu. “Babilon gbogbo ɔmɛ ku kɛ pueɔ si.

45 Ye ma, Israel, nyɛɛ tu fo kɛ je lejɛ ɔ! Nyɛɛ tu ye mi mi fumi nɛ nya wa a nya fo, konɛ nɔ tsuaa nɔ nɛ he e yi wami.

46 Nyɛ nine mi nɛ ko je wu; sanehi nɛ nyɛ nu ɔ hu a ko po nyɛ tsui. Daa jeha a, a ke sane he ko kɛ̃ maa ba. Ke sane ɔ kɔ we yi wu tso níhi nɛ a ngɛ pee ngɛ zugba a nɔ a he ɔ, lɛɛ matsɛ kɛ matsɛ lɛ na.

47 Lɔ ɔ he ɔ, be ma nɛ i kɛ Babilonia amaga amɛ maa to ní. Babilonia zugba a tsuo hɛ mi ma pue si, nɛ Babilonia bi ɔmɛ tsuo a hɛ mi ma kpata.

48 ⓝ Nihi maa je omleyi je kɛ ba kpata Babilonia hɛ mi. Jamɛ a be ɔ, níhi tsuo nɛ ngɛ hiɔwe kɛ zugba a nɔ ɔ ma hwɔ lele.

49 ⓞ Babilonia kpata nihi babauu a hɛ mi ngɛ je ɔ mi tsuo. Enɛ ɔ he je ɔ, ja a kpata Babilonia hu hɛ mi kokooko, ejakaa e gbe Israel bi babauu. Imi, Yawɛ lɛ i de.”

Mawu sɛ gbi kɛ ha Israel bi nɛ ngɛ Babilonia

50 Yawɛ ma a nɛ ngɛ Babilonia a, bɔ nɛ e ngɛ mɛ dee ji nɛ ɔ nɛ: “Nyɛ nɛ nyɛ je klaate nya! Nyɛɛ ho esɔesɔ! Nyɛ ko to tsle! Nyɛɛ kɛ we he kɛ mohu lɛɛ, se kɛ̃ ɔ, nyɛ susu imi Yawɛ, ye he; nɛ nyɛ hɛ ko je Yerusalem nɔ.

51 Nyɛ deɔ ke, ‘Wa hɛ mi pue si! Ahlua bɔ wɔ! Wa yi ta pɛ! Ejakaa he klɔuklɔuhi ngɛ Yawɛ we ɔ, nibwɔhi ba ngɔ.’

52 Lɔ ɔ he ɔ, i ngɛ dee ke, be ma nɛ i kɛ Babilon amaga amɛ maa to ní, nɛ a maa nu nihi nɛ plaa a he nɛ a ngɛ kɛmɛe ngɛ zugba a nɔ tsuo.

53 Ke Babilon kuɔ kɛ ho hiɔwe ya nɛ e ya ma mɔ nɛ he wa ngɛ lejɛ ɔ tete po, ma tsɔ nihi kɛ ya lejɛ ɔ nɛ a ya kpata e hɛ mi. Imi, Yawɛ lɛ i de.”

Babilon hɛ mi kpata pɛsɛpɛsɛ

54 Yawɛ ke, “Nyɛɛ bu tue! Ngmlaa nɛ nya wa ngɛ pɛe ngɛ Babilon. A wo yana boboobo ngɛ lejɛ ɔ, ejakaa zugba a hɛ mi kpata!

55 I ngɛ Babilon hɛ mi kpatae nɛ nɔ ko pa be e he nue hu. Ta buli ɔmɛ a he sɔ kɛ ba sɛ ma a mi, nɛ a ba tua a he nyɛli ɔmɛ gidigidi kɛ ngmlaa kaa bɔ nɛ oslɔke kuɔ kɛ ba pueɔ wo dɔ mi ɔ.

56 A ba kpata Babilon hɛ mi; a nuu Babilon ta buli ɔmɛ, nɛ a ku a kɛ̃ɛ̃ ɔmɛ. Mawu nɛ woɔ yayami he hiɔ ji mi, ma gbla Babilon tue bɔ nɛ sa lɛ.

57 Ma ha nɛ a ma nimeli ɔmɛ, ní leli ɔmɛ, amlaalo ɔmɛ, ma ní tsuli ɔmɛ, kɛ ta buli ɔmɛ maa tɔ dã. Ke a hwɔ si ɔ, a be si tee hu. Imi, matsɛ ɔ lɛ i de. Ye biɛ ji Yawɛ Tabohiatsɛ.

58 A maa hule Babilonia gbogbohi kɛ a hɛ mi gbajagbajaa a ngɔ pue si, nɛ a maa mɛ agbo gagaaga amɛ a he la. Je ma amɛ tsu yaka ní pɛ; a gbo dengme kɛ ha la nɛ e ba sã. Imi, Yawɛ Tabohiatsɛ ɔ lɛ i de.”

Yeremia ngɔ sɛ gbi kɛ mane Babilonia

59 Matsɛ Zedekia tsɔli ɔmɛ a kpɛti nɔkɔtɔma kake ji Neria bi Seraya, Maseya bibi ɔ. Yuda matsɛ, Zedekia yi nɔ jeha eywiɛne ɔ, benɛ lɛ Zedekia a yaa Babilonia a, Seraya kɛ lɛ ya. I ngɔ sɛ gbi kɛ ha Seraya kɛ ho.

60 I ngma amanehlu tsuo nɛ maa ba Babilonia nɔ, kɛ ní kpahi tsuo nɛ kɔɔ Babilonia he kɛ wo womi mi.

61 I de Seraya ke, “Ke o su Babilon ɔ, moo kane níhi tsuo nɛ a ngma ngɛ hiɛ ɔ kɛ ha ma a.

62 Lɔ ɔ se ɔ, moo sɔle nɛ o de ke, ‘Yawɛ, o de ke o ma kpata hiɛmɛ nɛ ɔ hɛ mi pɛsɛpɛsɛ, nɛ nɔmlɔ, loo lohwe be hiɛ ɔ hie hu. O de ke hiɛmɛ nɛ ɔ maa pee ma doku kɛ ya neneene.’

63 ⓟ Seraya, ke o kane womi nɛ ɔ gbe nya a, o fi tɛ kɛ wo he, nɛ o ya sake kɛ fɔ Yufrate pa a mi,

64 nɛ o de ke, ‘Bɔ nɛ Babilonia ma mu kɛ ya nyu sisi ji nɛ ɔ nɛ. Babilonia ma mu, nɛ e be hiae hu, ejakaa Yawɛ ma kpata zugba a hɛ mi pɛsɛpɛsɛ.’ ” Yeremia sɛ gbi ɔ nya ta ngɛ hiɛ ɔ.