Yeremia 50

A ngɔ Babilon

1 ⓕ Sɛ gbi nɛ Yawɛ ha mi nɛ kɔɔ Babilon ma a, kɛ ma mi bi ɔmɛ a he ji nɛ ɔ nɛ:

2 “Nyɛɛ fiɛ munyu nɛ ɔ kɛ ha je ma amɛ! Nyɛɛ si aflaangaa, nɛ nyɛɛ fiɛ! Nyɛ ko laa nɔ́ ko nɔ; nyɛ de ke, ‘A ngɔ Babilon oo, a ngɔ Babilon! Babilon mawu ɔ nɛ a tsɛɛ Marduk ɔ, a kpata e hɛ mi. A pue Babilon wɔ ɔmɛ a hɛ mi si, nɛ a ywia amaga amɛ dukuduku.’

3 “Je ma ko hia kɛ je omleyi je kɛ ma nɛ e ba tua Babilonia. A ma kpata zugba a hɛ mi, nɛ a maa pee lɛ butuu; nɛ nɔ ko nɔ ko be lejɛ ɔ hie hu. Nimli kɛ lohwehi tsuo maa tu fo kɛ je.”

Israel maa kpale kɛ ba

4 Yawɛ ke, “Jamɛ a be ɔ, Israel bi ɔmɛ, kɛ Yuda bi ɔmɛ tsuo maa wo yana kɛ ba, nɛ a ma ba hla imi, a Mawu ɔ, ye se blɔ.

5 A ma bi ke a tsɔɔ mɛ Zion blɔ, nɛ a maa nyɛɛ nɔ kɛ ba. A ma de ke, ‘Nyɛ ha nɛ waa ngɔ wa he ya mɛtɛ Yawɛ he. Nyɛ ha nɛ waa kɛ lɛ nɛ so neneene somi nɛ a be mi poe gblegbleegble.’

6 “Ye ma a ngɛ kaa tohi nɛ a hyɛli ɔmɛ ha nɛ a nane kpata ngɛ yo ɔmɛ a nɔ. A ngɛ kaa tohi nɛ a ngmɛɛ a he, nɛ a wo lalaalo ngɛ yo ɔmɛ a nɔ hluu kɛ ya si a hi he po laa mɛ.

7 Nɔ tsuaa nɔ nɛ maa na mɛ ɔ ma tua mɛ. Nɔ́ nɛ a he nyɛli ɔmɛ deɔ ji ‘Wɔɔ lɛɛ wa tɔ we. Mɛ lɛ a pee yayami kɛ si Yawɛ, Mawu dami sane yelɔ ɔ nɛ a nɛmɛ ɔmɛ ngɔ a hɛ ngɔ fɔ e nɔ ɔ.’

8 ⓖ “Israel bi, nyɛɛ tu fo kɛ je Babilonia! Nyɛɛ je Kaldea bi ɔmɛ a zugba a nɔ! Nyɛ he nɛ sɔ! Nyɛɛ pee kekleekle nihi nɛ maa je lejɛ ɔ, kaa bɔ nɛ to akpakpohi nyɛɛɔ to kuu a hɛ mi ɔ.

9 Ma ya sú je mahi babauu nɛ a he wa kɛ je omleyi je kɛ wo Babilonia he. A ma gba ta kɛ wo zugba a, nɛ a maa ngɔ lɛ. Ta buli kpanakpanaahi ji mɛ. A dɛ nya da, nɛ ke a tsɛ̃ kɛ̃ɛ̃ ɔ, e bi nɔ́ he kɔkɔɔkɔ.

10 A maa ha ní ngɛ Babilonia zugba a nɔ kɛ yaa si nɔ tsuaa nɔ ma na bɔ nɛ e suɔ. Imi, Yawɛ lɛ i de.”

A ma kpata Babilonia hɛ mi

11 Bɔ nɛ Yawɛ de ji nɛ ɔ nɛ: “Babilonia bi, nyɛ kpata ye zugba a hɛ mi. Nyɛ kle tɔfutɔfu kaa na yihi nɛ ye niye ní kpakpa, nɛ nyɛ kpaa ngmlaa kɛ he wami kaa okpɔngɔ. Nyɛ bua jɔɔ nyɛ he, nɛ nyɛ nyaa.

12 Se nyɛ nitsɛmɛ nyɛ ma nguaa a hɛ mi ma ba pue si, nɛ ahlua maa bɔ lɛ. Babilon ma ba pee ma nɛ a bui ngɛ je ma amɛ a kpɛti pe kulaa; e ma ba pee ma doku, kɛ nga kplanaa nɛ nyu be nɔ.

13 Imi Yawɛ, ye mi mi fu Babilon, nɛ nɔ ko nɔ ko be lejɛ ɔ hie hu; e maa pee ma doku kulaa, nɛ nɔ tsuaa nɔ nɛ ma ba be ngɛ lejɛ ɔ, e he mi maa po, nɛ e nya maa kpɛ e he.

14 “Nyɛ kɛ̃ɛ̃ tsɛ̃li, nyɛ gba ta kɛ wo Babilon he nɛ nyɛ sa ma a yi. Nyɛ tsɛ̃ nyɛ kɛ̃ɛ̃ mi bi ɔmɛ tsuo kɛ wo ma a he, ejakaa a pee yayami kɛ si imi Yawɛ.

15 Nyɛ he ose kɛ wo ma a he! Jehanɛ lɛɛ Babilon ha yi. Ma a sisi tomi ɔmɛ, kɛ e gbogbo ɔmɛ ku kɛ pueɔ si. I ngɛ Babilonia bi ɔmɛ a tue gblae. Lɔ ɔ he ɔ, nyɛ hu nyɛɛ ye nyɛ nitsɛmɛ nyɛ he lue; bɔ nɛ a pee ni komɛ ɔ, nyɛ hu nyɛɛ pee mɛ kɛ to nane mi.

16 Nyɛɛ fie ní duli, kɛ ní kpali kɛ a dɛ mi ha kɛ je Babilon. Nibwɔhi nɛ ngɛ ma a mi ɔ, a maa ye ta nɛ ba tua mɛ ɔ gbeye, nɛ a maa je kɛ ho mɛ nitsɛmɛ a zugba nɔ ya.”

Israel maa kpale kɛ ba

17 Bɔ nɛ Yawɛ de ji nɛ ɔ nɛ: “Israel bi ngɛ kaa tohi nɛ jatahi fie mɛ, nɛ a gbɛ mɛ ngɔ fĩa. Kekleekle ɔ, Asiria matsɛ ba tua mɛ, nɛ e ye mɛ; lɔ ɔ se ɔ, Babilonia matsɛ, Nebukadnezar ba kpe a wuhi.

18 Enɛ ɔ he je ɔ, imi Yawɛ Tabohiatsɛ, Israel Mawu ɔ, ma gbla matsɛ Nebukadnezar kɛ e zugba a tue kaa bɔ nɛ i pee Asiria matsɛ ɔ.

19 Ma kpale Israel bi ɔmɛ kɛ ba mɛ nitsɛmɛ a zugba a nɔ ekohu. A maa ye niye ní nɛ baa ngɛ Karmel yo ɔ nɔ, kɛ Bashan zugba a nɔ ɔ. A ma na ní maa ye bɔ nɛ a suɔ ngɛ Efraim kɛ Gilead zugba a nɔ.

20 Ke jamɛ a be ɔ su ɔ, a ma hla kaa a maa na Israel he yayami ko lo, se a be nae. Yuda hu a be yi wu tso nɔ́ ko nae ngɛ he e, ejakaa ni nɛmɛ nɛ i he a yi wami ɔ, ma ngɔ a he yayami ɔmɛ kɛ pa mɛ. Imi, Yawɛ lɛ i de.”

Mawu maa gbla Babilonia tue

21 Bɔ nɛ Yawɛ de ji nɛ ɔ nɛ: “Nyɛ ya tua Merataim, kɛ Pekod bi ɔmɛ. Nyɛɛ gbe mɛ, nɛ nyɛ kpata a hɛ mi. Nɔ́ tsuaa nɔ́ nɛ i fa nyɛ ke nyɛɛ pee ɔ, nyɛɛ pee. Imi, Yawɛ lɛ i de.

22 Ta ose pɛ ngɛ zugba a nɔ, nɛ níhi babauu a hɛ mi kpata.

23 Babilonia, hamle ngua a nɛ ngɛ je ɔ tsuo ywiae dukuduku ɔ, hyɛ bɔ nɛ lɛ hu a ku lɛ ngɔ pue si mwɔnɛ nɛ ɔ! Kɛ ba lɛ kɛɛ loko Babilonia ba plɛ pee ma doku ngɛ je ma amɛ a kpɛti ɔ?

24 Babilonia, o kɛ imi, Yawɛ hwu ta. Nɛ klama nɛ i tsɔ mo ɔ, o du klama a; ejakaa o li tete kaa i tsɔ mo klama ko.

25 I bli ye ta hwumi níhi a to he ɔ, nɛ i kɛ abofu je ta hwumi ní ɔmɛ kpo, ejakaa imi Yawɛ Tabohiatsɛ ɔ, i ngɛ ní tsumi nɛ ma tsu ngɛ Babilonia.

26 Nyɛ ya tua Babilonia kɛ je he tsuaa he, nɛ nyɛɛ ywia ngma tomi he ɔmɛ. Nyɛɛ to ta yibu ní ɔmɛ kaa ngma nɛ a to lɛ glekugleku! Nyɛ kpata zugba a hɛ mi! Nyɛ ko si nɔ ko nɔ ko ngɛ nɔ!

27 Nyɛɛ gbe a ta buli ɔmɛ tsuo! Nyɛ kpata a hɛ mi pɛsɛpɛsɛ! Babilonia bi ɔmɛ a yi fi wawɛɛ nitsɛ. A tue gblami be ɔ su!”

28 Ni komɛ tu fo kɛ je Babilonia kɛ ba Yerusalem nɛ a ba bɔ ma a amaniɛ bɔ nɛ Yawɛ ye e he lue ngɛ nɔ́ nɛ Babilonia bi ɔmɛ pee lɛ Yawɛ e we ɔ he.

29 ⓗ “Nyɛ ha nɛ nihi nɛ le kɛ̃ɛ̃ tsɛ̃mi ɔ, a ya nɛ a ya tua Babilon. Nyɛ ha nɛ ni nɛmɛ tsuo nɛ tsuɔ kɛ̃ɛ̃ he ní ɔ, a ya sa ma a yi kɛ kpe, nɛ nɔ ko nɔ ko nɛ ko tu fo kɛ je. Nyɛɛ gbla e tue ngɛ níhi nɛ e pee ɔ tsuo he. Bɔ nɛ e pee ni kpa amɛ ɔ, nyɛɛ pee lɛ ngɔ to nane mi ja nɔuu; ejakaa e wo e he nɔ ngɛ imi Yawɛ, Israel Nɔ Klɔuklɔu ɔ, ye nɔ.

30 Enɛ ɔ he je ɔ, a maa gbe e nihewi ɔmɛ tsuo ngɔ pue si ngɛ gbɛjegbɛ ɔmɛ a nɔ ngɛ ma a mi; nɛ a ma kpata e ta buli ɔmɛ tsuo a hɛ mi jamɛ a ligbi ɔ. Imi, Yawɛ lɛ i de.

31 “Babilonia bi, nyɛ woɔ nyɛ he nɔ. Enɛ ɔ he je ɔ, imi Nyɔmtsɛ Yawɛ Tabohiatsɛ ɔ, i kɛ nyɛ maa to ní. Nyɛ be ɔ su; be ɔ nɛ ma gbla nyɛ tue ɔ su.

32 Nyɛ, ma he nɔ woli nɛ ɔmɛ ɔ, nyɛ ma tɛ nɔ́ nɛ nyɛ maa nɔɔ si, nɛ nɔ ko nɔ ko be nyɛ nɔ woe. Ma mɛ nyɛ ma amɛ a he la, nɛ nɔ́ tsuaa nɔ́ nɛ bɔle mɛ kɛ kpe ɔ hɛ mi ma kpata.”

33 Bɔ nɛ Yawɛ Tabohiatsɛ ɔ de ji nɛ ɔ nɛ: “A wa Israel bi ɔmɛ, kɛ Yuda bi ɔmɛ tsuo yi mi. Ni nɛmɛ nɛ nuu mɛ ɔ hɛɛ mɛ kpɛii, nɛ a kplɛɛ we kaa a maa ngmɛɛ a he nɛ a ho.

34 Se nɔ nɛ ma ba kpɔ mɛ ɔ, e he wa; e biɛ ji Yawɛ Tabohiatsɛ. Lɛ nitsɛ e maa ye a sane ɔ ha mɛ; e kɛ he jɔmi maa ba zugba a nɔ, se Babilonia bi ɔmɛ lɛɛ e maa hao mɛ.”

35 Yawɛ ke, “Ta ma ba tua Babilonia zugba a! Ta ma ba na Babilonia bi ɔmɛ, ma nimeli ɔmɛ, kɛ ní leli ɔmɛ.

36 Ta ma ba na lakpa gbali ɔmɛ, nɛ a ma plɛ pee kuasiahi! Ta ma ba na ta buli ɔmɛ, nɛ sawale maa nu mɛ!

37 Ta ma ba na okpɔngɔ ɔmɛ, kɛ zugba lɛ ɔmɛ; ta ma ba na ma se ta buli tsuo nɛ ngɛ Babilonia a; a he wami maa ta, nɛ a maa pee kaa yihi pɛ! A maa ha a juetli tsuo!

38 Pahi tsuo a mi nyu maa mii ta, nɛ nyu hwɔ maa ba zugba a nɔ! Amaga gbeyegbeyehi sɔuu ji zugba a nɔ, nɛ lɔ ɔmɛ ma mi bi ɔmɛ ngɔ a tsui kɛ ha.

39 ⓘ “Lɔ ɔ he ɔ, Babilon ma ba pee pu mi lohwehi a hi he, nɛ afukpɔngɔhi, kɛ ogbeteehi maa hi lejɛ ɔ. Se nɔmlɔ adesa ko nɔmlɔ adesa ko lɛɛ be lejɛ ɔ hie hu gblegbleegble.

40 ⓙ Ma kpata Babilon hɛ mi pɛsɛpɛsɛ kaa bɔ nɛ i pee Sodom, kɛ Gomora, kɛ kɔpehi nɛ bɔle ɔ. Nɔ ko nɔ ko be lejɛ ɔ hie hu. Imi, Yawɛ lɛ i de.

41 “Ma ko je omleyi je kɛ ma. Je ma agbo ko, kɛ matsɛmɛ babauu hia kɛ je tsitsaa lokoo kɛ ma.

42 A hɛɛ kɛ̃ɛ̃ kɛ akplɔ; a yi mi wa, nɛ mɔbɔ nami ko kulaa be a mi. A he ose, nɛ a hi okpɔngɔhi a nɔ kɛ ma; nɛ lejɛ ɔ tsuo pee hoo kaa wo nɛ ngɛ fiae gudugudu. A mia kɛ ma nɛ a kɛ Babilonia ba hwu ta.

43 Benɛ Babilonia matsɛ ɔ nu sane nɛ ba a, e nine mi je wu. E tsui po wawɛɛ nitsɛ, nɛ e kpatu pee kaa yo nɛ nu kɔɔmi.

44 “Kaa bɔ nɛ jata hiaa kpo vlai kɛ jeɔ pu mi ngɛ Yordan pa a he kɛ baa lohwehi a ní yemi he ɔ, ja imi Yawɛ, ma ba tlukaa nɛ ma ba fie Babilonia bi ɔmɛ kɛ je a ma a mi kɛ fo. Kɛkɛ ɔ, hɛ mi nyɛɛlɔ ɔ nɛ ma hla a, lɛ ji nɔ nɛ maa ye ma a nɔ. Mɛnɔ lɛ e kɛ mi sɔ? Mɛnɔ ma nyɛ nɛ e kɛ mi maa to ní? Te nɔ yelɔ nɛ ma nyɛ ye hɛ mi maa da?

45 Lɔ ɔ he ɔ, yi mi nɛ i to kɛ wo Babilon ma a he, kɛ bɔ nɛ i to nɛ ma pee ma mi bi ɔmɛ ji nɛ ɔ nɛ. Nyɛɛ bu tue! A bimɛ tsɔwitsɔwi po a maa gbla mɛ ngɛ zugba kɛ je, nɛ nɔ tsuaa nɔ he mi maa po.

46 Ke Babilon hɛ mi kpata a, ose nɛ a ma he ɔ nya maa wa wawɛɛ nitsɛ, bɔ nɛ zugba po ma mimiɛ. Je ma kpa amɛ tsuo maa nu ose nɛ ɔ he.”