Mose III, 20

Tue gbomi he tue gblami

1 Yawɛ de Mose ke

2 e de Israel bi ɔmɛ ke, “Ke nyɛ ti nɔ ko, loo nubwɔ ko nɛ ngɛ nyɛ kpɛti ngɔ e bi kɛ ha nɛ a kɛ ja mawu ɔ nɛ a tsɛɛ Molek ɔ, ma a tsuo nɛ fia lɛ tɛ nɛ e gbo.

3 Ke nɔ ko ngɔ e bi kɛ ha Molek, nɛ e kɛ nɔ́ nɛ ɔ ble ye bo tsu klɔuklɔu ɔ, nɛ e kɛ puɛ ye biɛ klɔuklɔu ɔ, ye hɛ maa dɔ kɛ wo jamɛ a nɔ ɔ, nɛ ma je lɛ we; a be lɛ bue ngɔ si ye ma a mi bi ɔmɛ a nɔ hu.

4 Ke nɔ ko ngɔ e bi ha Molek, nɛ ma a mi bi ɔmɛ ku a hɛ ngɔ fɔ nɔ, nɛ a gbi lɛ ɔ,

5 imi nitsɛ ye hɛ maa dɔ kɛ wo jamɛ a nɔ ɔ, kɛ e weku li, kɛ nɔ tsuaa nɔ nɛ piɛ e he kɛ ya sɔmɔ Molek ɔ. Ma je mɛ we, nɛ a be mɛ bue ngɔ si ye ma a mi bi ɔmɛ a nɔ hu.

6 “Ke nɔ ko je ye se nɛ e ya bi ní ngɛ klaali, kɛ kunya yeli a ngɔ ɔ, imi Mawu ɔ, ye hɛ maa dɔ kɛ wo lɛ, nɛ ma je lɛ we; a be lɛ bue ngɔ si ye ma a mi bi ɔmɛ a nɔ hu.

7 Lɔ ɔ he ɔ, nyɛɛ tsukɔ nyɛ he nɛ nyɛɛ pee klɔuklɔu, ejakaa imi ji Yawɛ, nyɛ Mawu ɔ nɛ.

8 Nyɛ hɛ nɛ hi ye mlaa amɛ a nɔ, nɛ nyɛɛ ye a nɔ. Imi ji Yawɛ nɛ peeɔ nyɛ klɔuklɔu ɔ nɛ.”

9 ⓐ Yawɛ wo mlaa nɛ ɔmɛ hulɔ. Nɔ tsuaa nɔ nɛ maa gbiɛ e tsɛ, loo e nyɛ ɔ, á gbe lɛ; e gbenɔ ɔ sa lɛ nitsɛ.

10 ⓑ Ke Israel no ko kɛ e nyɛmi Israel no e yo na bɔmi ɔ, a puɛ gba; á gbe nyumu ɔ kɛ yo ɔ tsuo.

11 ⓒ Ke nɔ ko kɛ e tsɛ e yo na bɔmi ɔ, e pue e tsɛ ɔ hɛ mi si. Á gbe nyumu ɔ kɛ yo ɔ tsuo. A gbenɔ ɔ sa mɛ nitsɛmɛ.

12 ⓓ Ke nyumu ko kɛ e binyumu e yo na bɔmi ɔ, á gbe mɛ ni enyɔ ɔmɛ tsuo. A bɔ musu; lɔ ɔ he ɔ a gbenɔ ɔ sa mɛ nitsɛmɛ.

13 ⓔ Ke nyumu kɛ nyumu na bɔmi kaa nyumu kɛ yo bɔɔ ɔ, mɛ ni enyɔ ɔmɛ tsuo a bɔ musu. Á gbe mɛ; a gbenɔ ɔ sa mɛ nitsɛmɛ.

14 ⓕ Ke nyumu ko ngɔ nɔ kɛ e bi tsuo ɔ, e bɔ musu; a sã mɛ ni etɛ ɔmɛ tsuo, konɛ nɔ ko kó tsu musu ní nɛ ɔ eko ngɛ nyɛ kpɛti hu.

15 ⓖ Ke nyumu ko kɛ lohwe na bɔmi ɔ, á gbe e kɛ lohwe ɔ tsuo.

16 Ke yo ko ngɔ e he ngɔ ha lohwe ko, nɛ e kɛ lɛ na bɔmi ɔ, á gbe yo ɔ kɛ lohwe ɔ tsuo. A gbenɔ ɔ sa mɛ nitsɛmɛ.

17 ⓗ Ke nyumu ko kɛ e nyɛmiyo na bɔmi ɔ, e tsɛbi ji lɛ jio, e nyɛbi ji lɛ jio, a tsu zo ní. A je mɛ we; a ko bu mɛ ngɔ si Mawu ma a mi bi ɔmɛ a nɔ hu. E nyɛmiyo e kɛ na bɔmi ɔ nɛ, lɔ ɔ he ɔ, nyumu ɔ musu tloo lɛ nitsɛ.

18 ⓘ Ke nyumu ko kɛ yo ko na bɔmi be mi nɛ yo ɔ ku nine ɔ, a je mɛ ni enyɔ ɔmɛ tsuo we; a ko bu mɛ ngɔ si Mawu ma a mi bi ɔmɛ a nɔ hu; a tɔ mlaa nɛ kɔɔ he tsɔmi ngɛ nine kumi be mi ɔ nɔ.

19 ⓙ Ke nyumu ko kɛ e nyɛ nyɛmiyo, loo e tsɛ nyɛmiyo na nyumu kɛ yo bɔmi ɔ, musu tloo mɛ, ejakaa nyɛmimɛ ji mɛ.

20 Ke nyumu ko kɛ e tsɛ nyɛminyumu e yo na bɔmi ɔ, e pue e tsɛ nyɛminyumu ɔ hɛ mi si. E kɛ yo ɔ tsuo a musu tloo mɛ; a be fɔe kɛ yaa si a gbenɔ be.

21 ⓚ Ke nɔ ko ngɔ e nyɛminyumu e yo ɔ, a be fɔe kɛ yaa si a gbenɔ be. Nyumu ɔ bɔ musu, nɛ e pue e nyɛminyumu ɔ hɛ mi si.

22 Yawɛ de ke, “Nyɛ hɛ nɛ hi ye mlaa amɛ, kɛ ye blɔ nya tomi ɔmɛ tsuo a nɔ, nɛ nyɛɛ ye a nɔ, konɛ nyɛɛ hi Kanaan zugba a nɛ i kɛ nyɛ yaa nɔ ɔ nɔ; ke pi ja a, zugba a maa fie nyɛ kɛ je lejɛ ɔ.

23 Nyɛ ko pee nihi nɛ i ngɛ mɛ fiee kɛ je zugba a nɔ ɔ a kusumi níhi. Mɛɛ lɛɛ a pee musu níhi nɛ i ngɛ nyɛ a he mlaa woe nɛ ɔ, lɔ ɔ he ɔ, i hla we mɛ saasaa.

24 Se nyɛɛ lɛɛ i wo nyɛ si ke, ma ngɔ zugba kpakpa nɛ baa ní saminya nɛ ɔ kɛ ha nyɛ nɛ e pee nyɛ weto ní. Imi ji Yawɛ, nyɛ Mawu ɔ nɛ; imi nɛ i hla nyɛ kɛ je je ma amɛ a mi kɛ to ɔ nɛ.

25 Lɔ ɔ he ɔ, nyɛɛ le slɔɔto nɛ ngɛ lohwe nane eywiɛɛywiɛtsɛmɛ, lohwe pɛlitsɛmɛ, níhi nɛ sãã si nɛ a he tsɔ, kɛ ní nɛmɛ nɛ a he tsɔ we ɔ a kpɛti. Nyɛ ko ye lohwehi nɛ a he tsɔ we. Ke nyɛ ye níhi nɛ i de ke a he tsɔ we ɔ, nyɛ ble nyɛ he.

26 Nyɛɛ pee nyɛ he klɔuklɔu, ejakaa imi Yawɛ ɔ, i ngɛ klɔuklɔu. I hla nyɛ kɛ je je ma amɛ a kpɛti, konɛ nyɛɛ pee ye ma.

27 “Nyumu tsuaa nyumu, loo yo tsuaa yo nɛ hiaa, loo a biɔ ní ngɛ e ngɔ ɔ, a fia lɛ tɛ nɛ e gbo; e gbenɔ ɔ sa lɛ nitsɛ.”