Mose III, 19

Mlaahi nɛ kɔɔ klɔuklɔu peemi kɛ dami sane yemi he

1 Yawɛ de Mose ke

2 ⓗ e de Israel ma kpekpemi ɔ tsuo ke, “Nyɛɛ pee nyɛ he klɔuklɔu, ejakaa imi Yawɛ, nyɛ Mawu ɔ, i ngɛ klɔuklɔu.

3 ⓘ Nyɛ ti nɔ tsuaa nɔ nɛ bu e nyɛ kɛ e tsɛ; nɛ e ye Hejɔɔmi ligbi ɔ kaa bɔ nɛ i fa nyɛ ɔ. Imi ji Yawɛ, nyɛ Mawu ɔ nɛ.

4 ⓙ “Nyɛ ko je ye se nɛ nyɛ ya ja amagahi; nɛ nyɛ ko pee dade mawuhi ha nyɛ he. Imi ji Yawɛ, nyɛ Mawu ɔ nɛ.

5 “Ke nyɛ gbe lohwe nɛ a kɛ maa sã tue mi jɔmi bɔ ha imi Yawɛ, nyɛ Mawu ɔ, mlaahi nɛ i wo nyɛ ɔ, nyɛɛ ye a nɔ, konɛ e sa ye hɛ mi.

6 Á ye lo ɔ ligbi nɛ a maa gbe lohwe ɔ, aloo e nɔ jena. Ke eko piɛ nɛ ye ligbi etɛ ɔ, á sã,

7 Ke kaa nɔ ko ye eko ligbi etɛne ɔ, i be e bɔ ngɔe, ejakaa a hĩɔ.

8 Nɔ tsuaa nɔ nɛ maa ye eko ɔ, a gbla e tue, ejakaa e ble Yawɛ nɔ́ klɔuklɔu ɔ. A ma je lɛ we, nɛ a be lɛ bue ngɔ si ye ma a mi bi ɔmɛ a nɔ hu.

9 ⓚ “Ke nyɛ ngɛ nyɛ ngmɔ ní kpae ɔ, nyɛ ko kpa ní ɔ kɛ ya su ngmɔ ɔ tue haa. Nyɛ ko muɔ nɔ́ nɛ ma pue si ngɛ ní kpami ɔ se hulɔ.

10 Wai ngmɔtsɛ kó kpa wai yiblii ɔmɛ tsuo ngɛ e wai tso ɔmɛ a nɔ. Wai yiblii nɛ maa nɔɔ si ngɛ wai ngmɔ ɔ mi ɔ hu e ko ya kukuɔ. E si ha ohiatsɛmɛ, kɛ nibwɔhi. Imi ji Yawɛ, nyɛ Mawu ɔ nɛ.

11 ⓛ “Nyɛ ko ju; nyɛ ko sisi nɔ, nɛ nyɛ ko ye nyɛ sibi lakpa.

12 ⓜ “Nyɛ ko ngɔ ye biɛ kɛ ka lakpa kita kɛ wo ye biɛ he mu. Imi ji Yawɛ, nyɛ Mawu ɔ nɛ.

13 ⓝ “Koo fia o nyɛmi ojo, nɛ koo ju e nɔ́ ko hulɔ. Ke o ya bɔ nɔ ko apaa ke e ba tsu ní ha mo ɔ, wo lɛ hiɔ loko je nɛ na nɔ.

14 ⓞ Koo gbiɛ tue kpokutsɛ, nɛ koo fɔ hɛ yuyuilɔ blɔ mi tso. Ye o Mawu ɔ gbeye. Imi ji Yawɛ.

15 ⓟ “Nyɛɛ ye dami sane ngɛ kojomi mi; nyɛ ko hyɛ nɔ ko hɛ mi, ohiatsɛ ji lɛ jio, niatsɛ ji lɛ jio.

16 Koo pee o he sieku yelɔ kɛ hi yae kɛ hi bae ngɛ o ma mi bi ɔmɛ a kpɛti. Koo ye lakpa odase kɛ si o nyɛmi, nɛ́ a pue e muɔ si yaka gu. Imi ji Yawɛ.

17 ⓠ “Koo nyɛ o nyɛmi ngɛ o tsui mi. Ke sane ko ba a, o kɛ lɛ nɛ hla mi, konɛ e he ɔ, mo mohu o ko ba pee yayami.

18 ⓡ Koo ye mo nitsɛ o he lue, nɛ koo nyɛ o ma a mi bi ɔmɛ a ti nɔ ko nɔ ko; se mohu, moo suɔ o nyɛmi nɔmlɔ kaa bɔ nɛ o suɔ mo nitsɛ o he ɔ. Imi ji Yawɛ.

19 ⓢ “Nyɛɛ ye ye mlaa amɛ a nɔ. Nyɛ ko ha nɛ nyɛ we mi lohwehi nɛ kuɔ henɔ kpahi nɛ a kɛ mɛ nɛ fɔ. Nyɛ ko du wu munomuno enyɔ ngɛ ngmɔ kake mi; nɛ nyɛ ko wo tade nɛ a kɛ nɔ́ slɔɔto enyɔ lo bo ɔ.

20 “Ke nyumu ko kɛ nyɔguɛ yo ko nɛ a bi e si ha nyumu kpa na bɔmi be mi nɛ a kpɔ̃ we lɛ, loo e yi e he lolo ɔ, a hla munyu ɔ mi. A ko gbe mɛ, ejakaa nyɔguɛ ɔ yi e he lolo.

21 Se nyumu ɔ lɛɛ lɛ nitsɛ e ngɔ agbosu kɛ ba ha Yawɛ ngɛ kpe he bo tsu ɔ sinya a nya, nɛ a kɛ ba sã fɔ yemi bɔ.

22 Osɔfo ɔ nɛ ngɔ agbosu ɔ nɛ a kɛ ma fɔ yemi bɔ ɔ sami ɔ kɛ ya Yawɛ hɛ mi, nɛ e kɛ ya pee kusumi kɛ kpata Yawɛ ngɛ yayami nɛ nɔ ɔ pee ɔ he, nɛ Mawu kɛ maa pa lɛ.

23 “Ke nyɛ ya su Kanaan zugba a nɔ, nɛ nyɛ du tso slɔɔtoslɔɔtohi nɛ woɔ yiblii slɔɔtoslɔɔtohi nɛ a yeɔ ɔ, nyɛɛ bu a yiblii ɔmɛ kaa níhi nɛ a tsi nya kekleekle jeha etɛ ɔmɛ; jamɛ a be ɔ mi ɔ, nyɛ ko ye eko.

24 Jeha eywiɛne ɔ mi ɔ, nyɛɛ ngɔ yiblii ɔmɛ tsuo ngɔ pee sina bɔ klɛdɛɛ ha imi Yawɛ.

25 Jeha enuɔne ɔ mi lɛɛ nyɛ ma nyɛ maa ye a yiblii ɔmɛ. Ke nyɛ pee ní nɛ ɔmɛ ɔ, tso ɔmɛ maa wo yiblii babauu ha nyɛ. Imi ji Yawɛ, nyɛ Mawu ɔ nɛ.

26 ⓣ “Nyɛ ko ye lo nɛ muɔ ngɛ mi kɛ mwɔɔ. Nyɛ ko klaa, nɛ nyɛ ko ye kunya hulɔ.

27 ⓤ Nyɛ ko po huɛ ngɛ nyɛ yi kpɛti, nɛ nyɛ ko sua nyɛ kpɛni hulɔ.

28 Ke nɔ ko gbo ɔ, nyɛ ko po nyɛ he ha, nɛ nyɛ ko ngmaangmaa nyɛ he kɛ ye kɔmɔ. Imi ji Yawɛ.

29 ⓥ “Ko ha nɛ o biyo nɛ pee e he yaholɔ, nɛ e ba puɛ. Ke e pee ja a, yahomi kɛ musu bɔmi ma ba hiɛ ngɛ zugba a nɔ.

30 ⓦ Nyɛɛ ye ye Hejɔɔmi ligbi ɔmɛ, nɛ nyɛɛ ngɔ bu kɛ ha ye he klɔuklɔu ɔ; imi ji Yawɛ.

31 ⓧ “Nyɛ ko ya bi ní ngɛ klaali, kɛ kunya yeli a ngɔ; ke nyɛ pee ja a, nyɛ ma ble nyɛ he. Imi ji Yawɛ, nyɛ Mawu ɔ nɛ.

32 “Buu nɔkɔtɔma, nɛ o wo e hɛ mi nyami. Ye mi gbeye. Imi ji Yawɛ, o Mawu ɔ nɛ.

33 ⓨ “Ke nɔ ko ba to nyɛ nubwɔ ngɛ zugba a nɔ ɔ, nyɛ ko pee lɛ yayami.

34 Ke nɔ ko ba to nyɛ nubwɔ ɔ, nyɛɛ bu lɛ kaa ma a mi no nɔuu. Moo suɔ lɛ kaa bɔ nɛ o suɔ mo nitsɛ o he ɔ; ejakaa nyɛ hu nyɛ ya to nubwɔ hyɛ ngɛ Egipt zugba a nɔ. Imi ji Yawɛ, nyɛ Mawu ɔ nɛ.

35 ⓩ “Nyɛ ko sisi nɔ ngɛ nɔ́ ko kami, e jiimi, loo e hiɛmi kalemi mi.

36 Nyɛɛ ngɔ sɛnihi, sɛni tɛhi, kɛ susumi níhi nɛ da kɛ tsu ní. Imi ji Yawɛ, nyɛ Mawu ɔ nɛ je nyɛ kɛ je Egipt zugba a nɔ ɔ nɛ.

37 Nyɛ hɛ nɛ hi ye mlaa amɛ, kɛ ye blɔ nya tomi ɔmɛ tsuo nɔ, konɛ nyɛɛ ye a nɔ. Imi ji Yawɛ.”