Mose III, 2 - Laravel

Niye ní bɔhi

1 Ke nɔ ko ngɔ niye ní kɛ ma bɔ sami ha Yawɛ ɔ, é wɛɛ lɛ bukɔbukɔ kɛ pee mamu. E pue nɔ oliv nu, kɛ tsopa kɛ e he via,

2 nɛ e ngɔ kɛ ba ha Aaron bimɛ ɔmɛ nɛ ji osɔfo ɔmɛ. Osɔfo ɔ nɛ piti mamu bukɔbukɔ kɛ e nɔ nu, kɛ tsopa kɛ e he via a tsuo e dɛ kɔkɔ kake, nɛ e sã ngɛ bɔ sami la tɛ ɔ nɔ. Enɛ ɔ daa si kaa okadi ngɛ bɔ ɔ nɛ nɔ ɔ kɛ ba a tsuo nane mi kɛ ha Yawɛ. Enɛ ɔ ji bɔ nɛ a kɛ la sãã, nɛ jee via ha Yawɛ.

3 Mamu nɛ piɛ ngɛ niye ní bɔ sami ɔ se ɔ, peeɔ osɔfo Aaron kɛ e bimɛ ɔmɛ a nɔ́; ejakaa bɔhi nɛ a kɛ la sãã ha Yawɛ ɔ mi nɔ́ klɔuklɔu pe kulaa ji lɔ ɔ nɛ.

4 Ke niye ní nɛ a sã ngɛ flɔɔnɔɔ mi nɔ ko ngɔ kɛ ma bɔ sami ɔ, é pee keeki nɛ a kɛ mamu bukɔbukɔ nɛ a wo mi nu sã, loo e pee akpɔɔnɔɔ nɛ a pɔ he nu.

5 Ke niye ní nɛ a sã ngɛ ngɛyu mi nɔ ko kɛ ma bɔ sami ɔ, é pee nɔ́ nɛ a kɛ kplolo mamu bukɔbukɔ nɛ a kɛ nu futu mi lɛ pee.

6 É ku niye ní ɔ mi tsɔwitsɔwi, nɛ́ e plɛ nu ngɔ pue nɔ; niye ní bɔ ji nɛ ɔ nɛ.

7 Jehanɛ, ke niye ní nɛ a hoo ngɛ buɛ mi nɔ ko ngɔ kɛ ma bɔ sami ɔ, e pee mamu bukɔbukɔ nɛ a wo mi nu.

8 A sã jio, a si jio, e ngɔ kɛ ba kaa niye ní bɔ nɛ a kɛ ma ha Yawɛ. É ngɔ kɛ ba ha osɔfo ɔ, konɛ osɔfo ɔ hu nɛ ngɔ kɛ ya bɔ sami la tɛ ɔ hɛ mi.

9 Osɔfo ɔ nɛ ngɔ bɔbɔyoo ko kɛkɛ kaa okadi ngɛ niye ní ɔ tsuo nane mi. É sã nɔ́ nɛ ɔ ngɛ bɔ sami la tɛ ɔ nɔ. Enɛ ɔ ji bɔ nɛ a kɛ la sãã, nɛ jee via ha Yawɛ.

10 Nɔ́ nɛ maa piɛ ngɛ se ɔ peeɔ osɔfo Aaron kɛ e bimɛ ɔmɛ a nɔ́; ejakaa bɔhi nɛ a kɛ la sãã ha Yawɛ ɔ mi nɔ́ klɔuklɔu pe kulaa ji lɔ ɔ nɛ.

11 A kɛ masa nɔ́ ko kó pee niye ní bɔ ɔmɛ tsuo nɛ a kɛ ba haa Yawɛ ɔ eko; nyɛ ko sã masa nɔ́ ko loo hwo kaa bɔ nɛ a kɛ la sãã ha Yawɛ.

12 Nyɛ ma nyɛ maa ngɔ masa, loo hwo kɛ ba ha Yawɛ kaa ngmɔ nɔ kekleekle niba ní, se nyɛ ko sã ngɛ bɔ sami la tɛ ɔ nɔ kaa bɔ nɛ jee via.

13 Nyɛɛ wo nyɛ niye ní bɔ ɔmɛ tsuo a mi ngo; ejakaa ngo ji somi nɛ ngɛ nyɛɛ kɛ Mawu nyɛ kpɛti; lɔ ɔ he ɔ, ngo nɛ piɛ niye ní bɔ ɔmɛ tsuo a he.

14 Ke nɔ ko ngɔ e ngmɔ nɔ kekleekle niba ní kɛ ma bɔ sami ha Yawɛ, nyɛ Mawu ɔ kaa niye ní bɔ ɔ, é pee kpokploku nɛ a hluɛ, nɛ a sĩ, loo blɛfo nɛ a wɛɛ kplolo.

15 A wo mi nu, nɛ a kɛ tsopa kɛ e he via nɛ pue nɔ. Niye ní bɔ ji nɛ ɔ nɛ.

16 Osɔfo ɔ nɛ ngɔ niye ní bɔ nɛ ɔ bɔbɔyoo kɛkɛ kaa okadi ngɛ niye ní bɔ ɔ tsuo nane mi. É sã nɔ́ nɛ ɔ, kɛ tsopa kɛ e he via a tsuo kaa bɔ nɛ a kɛ la sãã ha Yawɛ.