Mose III, 1

Bɔhi nɛ a sãã lohwe ɔ tsuo kulaa

1 Yawɛ tsɛ Mose nɛ e kɛ lɛ tu munyu kɛ je kpe he bo tsu ɔ mi, nɛ e de lɛ ke,

2 e de Israel bi ɔmɛ ke, a kpɛti nɔ tsuaa nɔ nɛ maa ngɔ lohwe nane eywiɛtsɛ kɛ maa sã bɔ ha lɛ, Yawɛ ɔ, e ngɔ na, loo to kɛ ba.

3 Ke na nɔ ɔ kɛ ma sami bɔ sami ɔ, é ngɔ na ku nɛ kpa ko be e he kɛ ba. E kɛ na a nɛ ba kpe he bo tsu ɔ sinya a nya, konɛ e sa Yawɛ hɛ mi nɛ e ngɔ.

4 Nɔ ɔ nɛ ngɔ e nine ngɔ fɔ lohwe ɔ yi mi. A maa ngɔ ngɛ nɔ ɔ nane mi kaa bɔ nɛ e kɛ kpata Yawɛ.

5 Jehanɛ, e gbe na ku ɔ ngɛ Yawɛ hɛ mi, nɛ Aaron binyumu ɔmɛ, nɛ ji osɔfo ɔmɛ kɛ muɔ ɔ nɛ ba; lɔ ɔ se ɔ, a tsɛ̃ muɔ ɔ ngɔ pue bɔ sami la tɛ nɛ ngɛ kpe he bo tsu ɔ sinya a nya a he kɛ kpe.

6 E saa lohwe ɔ, nɛ e poo lɛ kpɔ nya kpɔ nya;

7 lɔ ɔ se ɔ, osɔfo Aaron binyumu ɔmɛ nɛ a to lɛ́ ngɛ bɔ sami la tɛ ɔ nɔ, nɛ a slɛ la.

8 Jehanɛ, a ngɔ lo nɛ a saa a, e yi ɔ, kɛ e zɔ ɔ ngɔ pue lɛ́ ɔ nɔ ngɛ bɔ sami la tɛ ɔ nɔ;

9 se e mi ní ɔmɛ, kɛ e nane ɔmɛ lɛɛ nɔ nɛ ma bɔ sami ɔ nɛ fɔ a he; nɛ osɔfo ɔ nɛ sã lɛ tsuo ngɛ bɔ sami la tɛ ɔ nɔ kaa sami bɔ. Enɛ ɔ ji bɔ nɛ a kɛ la sãã nɛ jee via ha Yawɛ.

10 Se ke to nɛ nɔ ɔ kɛ ma sami bɔ sami ɔ, é pee agbosu, aloo akpakpo nɛ kpa ko be e he.

11 É gbe lɛ ngɛ Yawɛ hɛ mi ngɛ bɔ sami la tɛ ɔ we omleyi je, konɛ Aaron binyumu ɔmɛ nɛ ji osɔfo ɔmɛ nɛ a tsɛ̃ muɔ ɔ ngɔ pue bɔ sami la tɛ ɔ he kɛ kpe.

12 Nɔ ɔ nɛ poo lo ɔ kpɔ nya kpɔ nya, nɛ osɔfo ɔ nɛ to lo ɔ, kɛ yi ɔ, kɛ zɔ ɔ tsuo ngɔ pue la a nɔ ngɛ bɔ sami la tɛ ɔ nɔ.

13 E mi ní ɔ kɛ e nane ɔmɛ lɛɛ nɔ nɛ ma bɔ sami ɔ nɛ fɔ a he, nɛ osɔfo ɔ nɛ sã lɛ tsuo ngɛ bɔ sami la tɛ ɔ nɔ. Enɛ ɔ ji sami bɔ, bɔ nɛ a kɛ la sãã nɛ jee via ha Yawɛ.

14 Ke lohwe pɛlitsɛ nɔ ɔ kɛ ma sami bɔ sami ha Yawɛ ɔ, e pee lahuɛ, loo beleku lahuɛ.

15 Osɔfo ɔ nɛ ngɔ ngɛ nɔ ɔ dɛ kɛ ba bɔ sami la tɛ ɔ he. É kika lohwe pɛlitsɛ ɔ kuɛ, nɛ e tsɔ e yi ngɛ nya; e sã yi ɔ ngɛ bɔ sami la tɛ ɔ nɔ; nɛ e tsle muɔ ɔ ngɔ pue bɔ sami la tɛ ɔ he.

16 É je lohwe ɔ kã a kɛ e mi ní ɔmɛ, nɛ́ e sake mɛ ngɔ pue bɔ sami la tɛ ɔ beleku je, he nɛ a ngɔɔ la zu ngɔ pueɔ ɔ.

17 É pɛtɛ pɛli ɔmɛ a he, nɛ́ e fɛ lohwe ɔ mi, se e ko kplɔ pɛli ɔmɛ ngɛ he; lɔ ɔ se ɔ, e sã lohwe ɔ tsuo ngɛ bɔ sami la tɛ ɔ nɔ. Enɛ ɔ ji sami bɔ, bɔ nɛ a kɛ la sãã, nɛ jeɔ via ha Yawɛ.