Yesaya 66

Yawɛ ngɛ je ma amɛ kojoe

1 ⓞ Bɔ nɛ Yawɛ ngɛ dee ji nɛ ɔ nɛ: “Hiɔwe ji ye matsɛ sɛ, nɛ zugba ji nɔ́ nɛ i kɛ ye nane maa nɔ. Mɛni tsu nyɛ maa ma ha mi mɔ, nɛ jije ye he jɔɔmi he ngɛ? ⓟ

2 Ye nine nya níhi ji ni nɛ ɔmɛ tsuo, lɔ ɔ he ɔ, ye níhi ji mɛ tsuo. Nihi nɛ baa a he si, nɛ a naa a he yayami nɛ a tsakeɔ a tsui, nihi nɛ yeɔ mi gbeye, nɛ a buɔ mi tue ɔ, mɛ ji nihi nɛ i suɔ.

3 “Ma mi bi ɔmɛ peeɔ nɔ́ nɛ mɛ nitsɛmɛ a suɔ. E si we mɛ kpu kaa a maa ngɔ na, loo nɔmlɔ adesa kɛ sã bɔ. Slɔɔto ko be mi ke a ngɔ to kɛ sã bɔ, loo a ku gbe kuɛ kɛ pee. Slɔɔto be mi ke a ngɔ ngma kɛ ba sã niye ní bɔ, aloo a ngɔ kpotoo muɔ kɛ ba. Tsopa kɛ e he via a ngɛ sãe jio, amaga nɛ a ngɛ jae jio, slɔɔto ko kulaa be mi ha mɛ. Musu ní nɛ ɔmɛ a he a nyaa.

4 Lɔ ɔ he ɔ, imi hu ma ha amanehlu nɛ a ngɛ gbeye yee ɔ maa ba a nɔ. Ejakaa i tsɛ mɛ, se nɔ ko nɔ ko he we nɔ; i tu munyu, se a bui tue fɛɛ. Yayami mohu a pee ngɛ ye hɛ mi; nɛ níhi nɛ sɛ ye hɛ mi ɔ, lɔ ɔmɛ mohu a he a nya.”

5 Nyɛ ni nɛmɛ nɛ nyɛ yeɔ Yawɛ gbeye, nɛ nyɛ buɔ lɛ, nyɛ ta tue, “Akɛnɛ nyɛ yeɔ mi anɔkuale ɔ, nyɛ ma mi bi ɔmɛ ekomɛ nyɛɔ nyɛ, nɛ a kɛ nyɛ pee we nɔ́ ko nɔ́ ko, se nyɛ he fɛu mohu a yeɔ. A deɔ ke, ‘Yawɛ nɛ je e he wami kpo nɛ e he nyɛ yi wami, konɛ waa na bɔ nɛ nyɛ ma nya ha.’ Se mɛ nitsɛmɛ a hɛ mi si mohu a ma pue!

6 Nyɛɛ bu tue! Bubuubui ngɛ pɛe ngɛ ma a mi! Bubuubui ngɛ pɛe ngɛ Yawɛ we ɔ. Ngmlaa nɛ ngɛ pɛe ɔ tsɔɔ kaa Yawɛ ngɛ e he nyɛli ɔmɛ a tue gblae.

7 ⓠ “Ye ma klɔuklɔu ɔ ngɛ kaa yo ko nɛ kpatu fɔ binyumu be mi nɛ e nui kɔɔmi.

8 Mɛnɔ nu enɛ ɔ eko hyɛ, nɛ mɛnɔ na enɛ ɔ eko hyɛ? Anɛ ligbi kake too kɛkɛ nɛ zugba nɔ hyiɔ kɛ nimli babauu? Anɛ si kake too kɛkɛ nɛ a fɔɔ je ma lo? Se Zion lɛɛ e nɛ nɔ́; benɛ kɔɔmi miɔ nɛ ta e he kɛkɛ e fɔ e binyumu ɔmɛ momo.

9 Ke fɔmi su gbongu mi ɔ, anɛ ma ko ha a fɔ bi ɔ lo? Imi nɛ i haa a fɔɔ bi ɔ, anɛ ma nga muklii ɔ nya lo?” Yawɛ, o Mawu ɔ lɛ de.

10 Nyɛ nihi tsuo nɛ nyɛ suɔ Yerusalem ɔ, nyɛ bua nɛ jɔ nyɛ he nɛ nyɛɛ kɛ lɛ nɛ nya. Nyɛ nihi tsuo nɛ nyɛ ye kɔmɔ ha lɛ ɔ, jehanɛ lɛɛ nyɛɛ kɛ lɛ tsuo nyɛ na bua jɔmi!

11 E ní nɛ e na a, nyɛ maa ye eko, nɛ nyɛ bua maa jɔ kaa bimwɔyo ngɛ e nyɛ nyɔ nya!

12 Yawɛ ke, “Ma ha nyɛ ma ná ní kpɔtɔɔ. Je ma amɛ a juetli ma ba hyi nyɛ ma a mi tɔ kaa pa nɛ hyi ywia nga. Nyɛ maa pee kaa bimwɔyo nɛ e nyɛ hɛɛ lɛ dɔdɔɔdɔ ngɛ e tɛ nɔ; bɔɔ kɛkɛ e kɛ lɛ to e kasa nya ngɛ lɛ nyɔ hae, kɛkɛ ɔ, e ngɔ lɛ ngɔ fɔ e tɛ nɔ ekohu.

13 Bɔ nɛ binyɛ haa e bi naa bua jɔmi ɔ, jã ma ha nyɛ bua maa jɔ nyɛ he ngɛ Yerusalem.

14 Ke enɛ ɔ ba mi ɔ, nyɛ ma na bua jɔmi. Nyɛ ma na he wami he. Lɔ ɔ loko nyɛ maa le kaa imi Yawɛ ɔ, nihi nɛ buɔ mi tue ɔ, i piɛɔ a he, nɛ i kɛ abofu gblaa ye he nyɛli a tue.”

15 Yawɛ maa nyɛɛ la mi kɛ ba. E maa hi ta zugba lɛ nɛ ngɛ kaa lasiogblee mi kɛ ba, nɛ e ma ba kpata e he nyɛli ɔmɛ a hɛ mi.

16 Nihi tsuo nɛ yeɔ fɔ ngɛ je ɔ mi ɔ, Yawɛ maa ngɔ la kɛ klaate kɛ kpata a hɛ mi. Nɛ nihi babauu ma gbo.

17 Yawɛ ke, “Nihi nɛ tsukɔɔ a he, nɛ a peeɔ a he klɔuklɔu kɛ haa wɔ jami, nɛ a toɔ slɛnɛɛ kɛ yaa abɔɔhi a mi ya yeɔ kpotoo lo, kɔkue, kɛ níhi nɛ a hiee ɔ, a nyagbe maa pee gbeye.

18 I le níhi nɛ a ngɛ susue, kɛ níhi nɛ a ngɛ pee. Be ma nɛ ma bua je ma amɛ tsuo, kɛ gbi slɔɔtoslɔɔto ɔmɛ tsuo a nya. Ke a ba a, a ma ba na ye hɛ mi nyami ɔ.

19 Jamɛ a be ɔ loko a maa le kaa imi lɛ i ngɛ a tue gblae. “Se ma he a ti ni komɛ a yi wami, nɛ ma tsɔ mɛ kɛ maa ya je ma amɛ a ngɔ, kɛ zugbahi a nɔ ngɛ tsitsaa lokoo, he nɛ a nui ye we agbo jemi, kɛ ye he wami kpetekpleenyɛ ɔ he ngɛ lolo. Ma tsɔ mɛ Spania, Libia, Lidia he nɛ kɛ̃ɛ̃ tsɛ̃li kpakpahi ngɛ ɔ, Tubal, kɛ Hela. A ma ya fiɛ ngɛ je ma nɛ ɔmɛ a mi ke Mawu kpetekpleenyɛ ji mi.

20 Jamɛ a be ɔ, a kɛ a nyɛmimɛ Israel fɔfɔɛhi tsuo nɛ ngɛ je ma amɛ a mi ɔ maa ba; a maa ngɔ mɛ ba ke imi Yawɛ kaa bɔ. A maa ngɔ mɛ kɛ ba ye yo klɔuklɔu ɔ nɔ ngɛ Yerusalem. A maa hi okpɔngɔhi, teji okpɔngɔhi, kɛ afukpɔngɔhi a nɔ kɛ ba. A maa hi ta zugba lɛhi, kɛ apakɛɛhi hu a mi. A maa hɛɛ a nyɛmimɛ ɔmɛ kɛ maa ba kaa bɔ nɛ Israel bi hɛɛɔ a ngma bɔ ngɛ níhi nɛ a he tsɔ mi kɛ baa Yawɛ we ɔ.

21 Ma pee a ti ni komɛ osɔfohi, nɛ ma pee a ti ni komɛ hu Levi bi.

22 ⓡ “Bɔ nɛ zugba he, kɛ hiɔwe he nɛ ma pee ɔ maa hi si daa ngɛ ye he wami nya a, ja nyɛ nina, kɛ nyɛ biɛ tsuo maa hi si.

23 Nyɔhiɔhe nyami be tsuaa Nyɔhiɔhe nyami be, kɛ Hejɔɔmi ligbi tsuaa Hejɔɔmi ligbi ɔ, nimli adesahi nɛ ngɛ je ma amɛ tsuo a mi ɔ ma ba ja mi ngɛ Yerusalem.” Yawɛ lɛ de.

24 ⓢ “Ke a je hiɛ ɔ, a ma ya na nihi nɛ kua mi ɔ a gbogboehi nɛ pueɔ si. Gɔgɔ nɛ gbogboe ɔmɛ wo ɔ be gboe gblegbleegble, nɛ la nɛ ngɛ mɛ sããe ɔ hu a be nyɛe maa gbe; a maa pee he mi nyɛɛmi nɔ́ ha nimli adesahi tsuo.”