Yeremia - Introduction

NYA TSƆƆMI

Gbalɔ Yeremia hi si maa pee jeha lafa ekpa, loo nɔ́ loko a fɔ Kristo. E fiɛ Mawu munyu ɔ be babauu nitsɛ. E bɔ Mawu ma a kɔkɔ, nɛ e de mɛ ke yayamihi nɛ a ngɛ pee, kɛ amagahi nɛ a ngɛ jae he je ɔ, Mawu kɛ haomi maa ba ma a nɔ. Niinɛ, ní nɛ ɔmɛ tsuo ba mi, nɛ Yeremia na kɛ lɛ nitsɛ e hɛngmɛ. Babilonia matsɛ, Nebukadnezar ba tua Yerusalem; a sã ma a kɛ Yawɛ we ɔ, nɛ a nuu Yuda matsɛ ɔ, kɛ ma mi bi ɔmɛ babauu kɛ ho Babilonia zugba a nɔ ya. Yeremia gba hu ke Yuda bi ɔmɛ nɛ a maa nuu kɛ ya Babilonia a maa kpale kɛ ba mɛ nitsɛmɛ a zugba a nɔ hwɔɔ se ko, nɛ a ma ba bɔ ma a ekohu.

A ma nyɛ maa dla Yeremia womi nɛ ɔ mi enuɔ. (1) Mawu tsɛ Yeremia ke e ba pee gbalɔ. (2) Sɛ gbihi nɛ je Mawu ngɔ kɛ ha Yuda ma a, kɛ Yuda matsɛmɛ Yosia, Yehoyakim, Yehoyakin, kɛ Zedekia. (3) Gbami slɔɔtohi, Yeremia he sane pɔtɛɛ komɛ, kɛ ní kpa komɛ nɛ Yeremia womi ngmalɔ, Baruk bua nya kɛ to. (4) Sɛ gbihi nɛ je Nyɔmtsɛ ɔ ngɔ nɛ kɔɔ je ma komɛ a he. (5) Blema sane kpiti ko nɛ gbaa wɔ bɔ nɛ a plɛ kɛ kpata Yerusalem ma a hɛ mi, kɛ bɔ nɛ a nuu ma mi bi ɔmɛ kɛ ho Babilon ya.

Yeremia ji nɔ ko nɛ suɔ e ma a, nɛ e nuɔ nɔ́ he ha nɔ wawɛɛ nitsɛ. Ke ma a pee yayami kikɛ nɛ ɔ, nɛ́ e hia kaa e ngɔ Mawu sɛ gbi ya ha mɛ kaa Mawu maa gbla a tue ɔ, e haoɔ lɛ wawɛɛ nitsɛ. Ngɛ womi nɛ ɔ mi hehi fuu ɔ, wa naa bɔ nɛ Yeremia na nɔ́ ngɛ gbami ní tsumi nɛ Mawu tsɛ lɛ ke e ba tsu ɔ mi. Nyɔmtsɛ ɔ munyu ɔ ngɛ kaa la nɛ ngɛ tsoe ngɛ Yeremia tsui mi, nɛ e nya hí tsimi.

Yeremia womi nɛ ɔ mi munyu nguanguahi pe kulaa a, kɔɔ níhi nɛ maa ba ngɛ Yeremia be kɛ e mi haomi ɔ se. Munyu nɛ ɔmɛ deɔ wɔ ke hwɔɔ se ɔ, Mawu kɛ e ma a maa so somi he ko. A maa ngma somi nɛ ɔ ngɛ ni ɔmɛ a tsui mi, nɛ a maa ye nɔ. Nɛ e be hiae kaa tsɔɔlɔ ko nɛ ba kai mɛ hu (31.31-34).

Bɔ nɛ a dla womi ɔ mi ha

• Mawu tsɛ Yeremia 1.1-19
• Gbamihi nɛ Yeremia gba ngɛ matsɛmɛ nɛ ɔmɛ a yi nɔ: Yosia, Yehoyakim, Yehoyakin, kɛ Zedekia 2.1—25.38
• Níhi nɛ ba ngɛ Yeremia wami be mi 26.1—45.5
• Gbamihi nɛ Yeremia gba kɛ si je ma amɛ 46.1—51.64
• A kpata Yerusalem ma a hɛ mi 52.1-34