Yesaya 57

A bu Israel fɔ kaa e ja amaga

1 Ke nɔmlɔ kpakpa gbo ɔ, nɔ ko nɔ ko susuu we he, nɛ nɔ ko nɔ ko nui sisi hulɔ kaa yayami nɛ maa ba a nya Mawu ngɛ dalɔ ɔ jee kɛ je, bɔ nɛ pee nɛ ayimayi ko kó ba ye lɛ hwɔɔ se.

2 Nihi nɛ baa a je mi saminya, nɛ a peeɔ nɔ́ nɛ da a, ke a gbo ɔ, a naa tue mi jɔmi, kɛ he jɔmi.

3 Se, nyɛ yayami peeli nɛ nyɛɛ kɛ ní peeli, kɛ gba puɛli, kɛ yi yaholi tsuo sɔ ɔ, nyɛɛ ba hiɛ ɔ!

4 Mɛnɔ he fɛu nyɛ ngɛ yee ɔ? Nyɛ lakpatsɛmɛ, yayami peeli a bimɛ, mɛnɔ he nyɛ pa nyɛ nya mi hatoo, nɛ nyɛ je nyɛ lilɛ kpo bilaa kɛ wo ɔ?

5 Nyɛ nɛ nyɛ he mi akɔnɔ teɔ si, nɛ́ nyɛɛ kɛ bɔɔ ajuama ngɛ tso nguanguahi nɛ bɔ kusuu a sisi. Nyɛ ngɔɔ nyɛ bimɛ kɛ sãã bɔ ngɛ tɛ puɔhi a mi ngɛ kɔ̃ ɔmɛ a mi.

6 Nyɛ ya ngɔɔ dongo tɛhi kɛ jeɔ kɔ̃ mi, nɛ nyɛ jaa mɛ. Nyɛ ngɔɔ wai kɛ sãã bɔ kɛ haa tɛhi; nɛ nyɛ ngɔɔ ngma hu kɛ sãã bɔ ha mɛ ja nɔuu. Ní nɛ ɔmɛ tsuo nɛ nyɛ peeɔ ɔ, anɛ nyɛ susuu kaa ye bua maa jɔ he?

7 Nyɛ ya kuɔɔ yo gaga amɛ, ya sãã bɔ; nɛ nyɛ ya bɔɔ ajuama ngɛ lejɛ ɔmɛ.

8 Nyɛ ngɔɔ nyɛ amaga amɛ ngɔ maa nyɛ tsu ɔmɛ a mi ngɛ sinya se, nɛ nyɛ jaa mɛ. Nyɛ jeɔ ye se nɛ nyɛ ya ngmɛɛ nyɛ sa amɛ, nɛ nyɛ dlaa a nɔ saminyayoo. Jehanɛ, nyɛɛ kɛ nyɛ plã amɛ ya hwɔɔ si bɔ nɛ nyɛ ma nyɛ, nɛ nyɛ woɔ mɛ hiɔ sisiisi kaa bɔ nɛ nyɛɛ kɛ mɛ yeɔ nya a.

9 Nyɛ ngɔɔ nu, kɛ nu kɛ e he via fuu kɛ hiaa blɔ kɛ ya jaa mawu ɔ nɛ a tsɛɛ Molek ɔ. Bɔ nɛ pee nɛ nyɛ na mawu kpahi nɛ nyɛ ja a, nyɛ tsɔɔ nihi kɛ yaa ma se tsitsaa lokoo, kɛ yaa gbeje tete po.

10 Nyɛ gbaa nyɛ he nya babauu kɛ kpaa si; pɔ hu tɔɛ nyɛ nɛ nyɛ ma kpa. Nyɛ susuɔ kaa nyɛ amaga amɛ haa nyɛ he wami, lɔ ɔ he ɔ, nyɛ ngmɛɛ we a he.

11 Yawɛ ke, “Mɛnɔ gbeye nyɛ ya ye, loko nyɛ ye lakpa, nɛ nyɛ hɛ je ye nɔ pɛsɛɛ kikɛ nɛ ɔ? Akɛnɛ i pee dii kɛ je blema lokoo he je ɔ, nyɛ bui mi, nɛ nyɛ yi mi gbeye hulɔ, pi jã?

12 Nyɛ susuɔ kaa nɔ́ nɛ nyɛ ngɛ pee ɔ da, se ma ha nyɛ maa na paa kaa amaga amɛ nɛ nyɛ ngɛ a se nyɛɛe ɔ be nyɛe maa pee nɔ́ kpakpa ko ha nyɛ.

13 Benɛ nyɛ ngɛ ngmlaa kpae kɛ ngɛ balɔ tsɛe ɔ, nyɛ ha nɛ nyɛ amaga babauu ɔmɛ nɛ a je ngmlaa ha nyɛ koo! Kɔɔhiɔ kɛkɛ po maa bɛɛ mɛ tsuo kɛ ho; mumi nɛ a woɔ si kake pɛ ma fli mɛ kɛ ho. Se ni nɛmɛ nɛ ngɔɔ a hɛ ngɔ fɔɔ ye nɔ ɔ, a maa hi zugba a nɔ, nɛ a ma ja mi ngɛ ye yo klɔuklɔu ɔ nɔ.”

Mawu wo si ke e maa piɛ e ma a he nɛ e ma tsa mɛ

14 Yawɛ ke, “Nyɛ ha ye ma a nɛ kpale kɛ ba ye ngɔ. Nyɛ je blɔ tsimi nɔ́ tsuaa nɔ́ kɛ je a blɔ mi! Nyɛɛ je gbɛjegbɛ saminyayoo ha mɛ!

15 “Imi ji Mawu klɔuklɔu nɛ hii hiɔwe kɛ yaa neneene ɔ nɛ. I hii he klɔuklɔu ngɛ hiɔwe lokoo; se nɔ nɛ baa e he si ngɛ e mumi mi, nɛ e tsui mi tsɔ ɔ, i kɛ lɛ hiɔ si; i woɔ e mumi kã, konɛ e ngɔ e hɛ ngɔ fɔ ye nɔ, nɛ e na wami he.

16 Imi nitsɛ nɛ i ha ye ma a wami; lɔ ɔ he ɔ, i kɛ mɛ be pɛe, nɛ ye mi mi hu be mɛ fue kɛ ya neneene.

17 Ye mi mi fu mɛ, nɛ i gbla a tue, nɛ i kua mɛ; ejakaa a peeɔ yayami, nɛ a hɛ kɔ̃ɔ̃; se kɛ̃ ɔ, a wa tue, nɛ a ya nɔ pee níhi nɛ mɛ nitsɛmɛ a suɔ.

18 “I na níhi nɛ a ngɛ pee ɔ, se ma tsa mɛ. Ma tsɔɔ mɛ blɔ, nɛ ma piɛ a he; nɛ ma wo kɔmɔ yeli ɔmɛ bua!

19 ⓟ Nihi nɛ a ngɛ kpo nya, kɛ tsitsaa tsuo ma na tue mi jɔmi. Ma tsa ye ma a.

20 Se yiwutsotsɛmɛ lɛɛ a ngɛ kaa wo nɛ gli nɛ e we oslɔke ɔmɛ ngɛ kue; a ngɛ kaa wo nɛ ngɛ mu níhi, kɛ mɔsɔ jee kɛ ngɛ he puee daa nɛ.

21 ⓠ Yiwutsotsɛmɛ be he jɔmi nae gblegbleegble.” Imi, Yawɛ lɛ i de.