Yesaya 56

Je ma amɛ tsuo maa pee Mawu ma

1 Bɔ nɛ Yawɛ ngɛ e ma a dee ji nɛ ɔ nɛ: “Nyɛɛ pee nɔ́ nɛ da, kɛ nɔ́ nɛ sa, ejakaa e be kɛe kulaa nɛ ma ba he nyɛ yi wami.

2 Nihi nɛ baa a je mi saminya, nɛ a pee we yayami, se mohu a yeɔ Hejɔɔmi ligbi ɔ pɛpɛɛpɛ, nɛ a ble we lɛ ɔ, ma gbaa mɛ.”

3 Nubwɔ nɛ kɛ e he ba mɛtɛ Yawɛ ma a he ɔ, e ko de ke, “Yawɛ be suɔe kaa ma piɛ e ma mi bi ɔmɛ a he kɛ ja lɛ.” Nyumu nɛ a puɛ lɛ, nɛ e be bi ɔ, e ko susu kaa Mawu be lɛ ngɔe kɛ piɛ e ma a he.

4 Bɔ nɛ Yawɛ ngɛ nɔ ɔ dee ji, “Ke o yeɔ Hejɔɔmi ligbi ɔ, nɛ o peeɔ ye suɔmi nya ní, nɛ o yeɔ ye somi ɔ nɔ pɛpɛɛpɛ ɔ,

5 ye ma a ma kai o biɛ ngɛ ye we ɔ pe binyumuhi, loo biyihi nɛ o ngɛ po. Ma ha mo biɛ kpakpa nɛ a ma kai kɛ maa ya neneene.”

6 Jehanɛ, nibwɔhi nɛ kɛ a he ba mɛtɛ ma a he, nɛ a suɔ Mawu sane, nɛ a jaa lɛ, nɛ a yeɔ Hejɔɔmi ligbi ɔ kɛ e somi ɔ nɔ pɛpɛɛpɛ ɔ, bɔ nɛ Yawɛ ngɛ mɛ dee ji,

7 ⓞ “Ma ngɔ nyɛ kɛ ba Zion, ye yo klɔuklɔu ɔ nɔ; ma ha nyɛ bua maa jɔ ngɛ ye sɔlemi we ɔ, nɛ bɔ ɔmɛ tsuo nɛ nyɛ maa sã ngɛ ye bɔ sami la tɛ ɔ nɔ ɔ, ma he. Ejakaa a ma tsɛ ye we ɔ je mahi tsuo a sɔlemi we.”

8 Nyɔmtsɛ Yawɛ nɛ ngɛ e ma Israel nya buae kɛ je ma se kɛ ma we ɔ, bɔ nɛ e ngɛ dee ji, “Ma bua ni kpahi a nya kɛ piɛ nihi nɛ a bua a nya momo ɔ a he.”

A bu Israel ma nimeli ɔmɛ fɔ

9 Yawɛ de je ma amɛ nɛ je ma se ɔ ke á ba kaa lohwe dikali, nɛ a ba tsɔtslɔɔ e ma mi bi ɔmɛ a mi.

10 E ke, “Ma hɛ mi nyɛɛli ɔmɛ nɛ sa kaa a kaa ye ma a hɛ mi ɔ, hɛ yuyuili ji mɛ tsuo; a li nɔ́ ko nɔ́ ko! A ngɛ kaa we he bumi gbehi nɛ kpa we ngmlaa; daa nɛ ɔ, mahe mi kɛkɛ a hii nɛ a hii nlae. Lɔ ɔ ji nɔ́ nɛ a suɔ!

11 A ngɛ kaa gbehi nɛ li tɔ biɛ! Ma nɔ yeli nɛ ɔmɛ be juɛmi kokooko! Nɔ tsuaa nɔ peeɔ nɔ́ nɛ e suɔ; mɛ nitsɛmɛ a se nami pɛ a hlaa.

12 Dã tɔli nɛ ɔmɛ deɔ ke, ‘Nyɛɛ ba nɛ wa ya hla wai nɛ waa nu. Wa maa nu dã bɔ nɛ wa ma nyɛ mwɔnɛ ɔ! Hwɔɔ lɛɛ e maa pee gbeye!’ ”