Yesaya 3

Haomi maa ba Yerusalem

1 Bu tue! Nyɔmtsɛ Yawɛ Tabohiatsɛ ɔ be blɔ ngmɛe nɛ nihi nɛ a ba ye bua Yuda ma a, kɛ Yerusalem hu. E ma ha a niye ní, kɛ nyu maa ta.

2 Nimli nɛ ɔmɛ tsuo a hɛ mi ma kpata: katsɛmɛ, ta buli, kojoli, gbali, klaali, ma nimeli,

3 asafoatsɛmɛ, nihi nɛ a hɛ mi ngɛ nyami, ma ní tsuli, kɛ kunya yeli kpanakuhi.

4 Ma wo jokuɛwi nyumuwi ganɔhi ha mɛ, nɛ bimwɔwi maa ye a nɔ.

5 A maa wa a sibi yi mi. Nihewi maa hyɛ nikɔtɔma hɛ mi, nɛ nihi nɛ bu be a he maa wo a he ha nihi nɛ a hɛ mi ngɛ nyami.

6 Be ma, nɛ we puɔ nya ko bi maa hla a ti nɔ ko, nɛ a ma de lɛ ke, “Wa nɔ́ tsuaa nɔ́ hɛ mi kpata, se moo lɛɛ o ngɛ he ha nɔ́ ko, lɔ ɔ he ɔ, ba pee wa tsɛ, nɛ o ye wa nɔ.”

7 E ma he nɔ ke, “Kpaoo! I be nyɛe ma pee ja ha nyɛ. Imi hu, i be niye ní, nɛ i be heha ní hulɔ. Nyɛ ko wo mi nyɛ nyatsɛ!”

8 Niinɛ, musu tloo Yerusalem! Yuda hɛ mi kpata! Ejakaa a deɔ nɔ́ tsuaa nɔ́, nɛ a peeɔ nɔ́ tsuaa nɔ́ kɛ siɔ Yawɛ; a jee blɔ pueɔ Mawu nitsɛ hɛ mi si.

9 A ní peepee yeɔ odase kɛ siɔ mɛ; ejakaa a jeɔ a hɛ mi paa kɛ peeɔ yayami kaa Sodom bi; a kɛ laa we. Musu tloo mɛ! Mɛ nitsɛmɛ nɛ a ye a he awi ɔ nɛ.

10 Nihi nɛ peeɔ nɔ́ nɛ da a, a bua maa jɔ, nɛ a nɔ́ tsuaa nɔ́ maa ya nɔ saminya. A maa ye a dengme gbomi mi ngɔɔmi.

11 Se yayami peeli lɛɛ musu tloo mɛ; yayami nɛ a pee ní kpahi ɔ, jehanɛ, a ma ngɔ pee mɛ nitsɛmɛ.

12 Jokuɛwi lɛ ngɛ ye ma a haoe, nɛ yihi lɛ ngɛ a nɔ yee. Ye ma, o nɔ hyɛli ɔmɛ haa o tlaa blɔ, nɛ a tɔ̃tɔ̃ɔ̃ o nane.

Yawɛ ngɛ e ma a kojoe

13 Yawɛ pee klaalo kaa e maa jaje e sane ɔ; e pee klaalo kaa e maa kojo e ma a.

14 Yawɛ kɛ ma nimeli, kɛ ganɔ ɔmɛ lɛ na sane ɔ nɛ. Munyu nɛ e kɛ ba po a nya ji nɛ ɔ nɛ: “Nyɛ kpata wai ngmɔ ɔmɛ a hɛ mi, nɛ níhi nɛ nyɛ kpɔ ngɛ ohiatsɛmɛ a dɛ ɔ, nyɛ ngɔ kɛ to nyɛ wehi a mi.

15 Nyɛ be he blɔ kulaa kaa nyɛ waa ye ma a yi mi, loo nyɛ yeɔ ohiatsɛmɛ amimi. Imi Nyɔmtsɛ Tabohiatsɛ Mawu ɔ, lɛ i de.”

A bɔ Yerusalem yi ɔmɛ kɔkɔ

16 Yawɛ ke, “Hyɛ bɔ nɛ Yerusalem yi ɔmɛ ngɛ a he tsɔɔe ha! Ke a ngɛ nyɛɛe ɔ, a woɔ a hɛ mi nɔ kɛ hii kɔɔhiɔ mi fue. Basabasa peemi pɛ a suɔ be tsuaa be. A hiaa a nane bitibiti kɛ kɔsɔɔ, nɛ a nane si ga amɛ hii pɛe ngmleingmlei.

17 Lɔ ɔ he ɔ, ma gbla a tue. Ma ha sakpa ma pue a yi mi, nɛ a maa sɛ a yi ɔ kpalokpalo.”

18 Jamɛ a ligbi ɔ, afɛu níhi tsuo nɛ Yerusalem yi ɔmɛ kɛ dlaa a he: nane si ga amɛ, níhi nɛ a kɛ hɔɔ a yi mi, a kuɛ ga amɛ,

19 a nine si ga amɛ, hɛ mi hami ní ɔmɛ,

20 a pɛɛ ɔmɛ, sɛbɛhi nɛ a woɔ ngɛ a kɔni si kɛ a mlɛ mi ɔ,

21 nine nguɛ ga amɛ, gugwɔ mi ga amɛ,

22 he dlami tade ɔmɛ, tade klɔii ɔmɛ, tade gagaa amɛ, nɔha tade ɔmɛ, sika kpɛɛ ɔmɛ,

23 kploba heha ní ɔmɛ, mele duku ɔmɛ, yi duku ɔmɛ, kɛ hɛ mi hami nɔ́ gagaa amɛ tsuo ɔ, Nyɔmtsɛ ɔ ma je ngɛ a he.

24 Nu je via be hae nɛ a he maa je via hu, a he maa je fu mohu; tangme kpa titlii a kɛ maa fi a mlɛ mi, pi mlɛ mi fimi nɔ́ saminyawiiwi ɔmɛ hu; yi nɛ a hɔɔ saminyayoo ɔ maa pee kpalokpalo; a heha ní kpakpa amɛ ma plɛ pee tako piɛ; a he fɛu ɔ ma plɛ pee zo ha mɛ!

25 A kɛ klaate maa gbe ma a mi nyumu ɔmɛ; a ti nihi nɛ ji katsɛmɛ tete po maa nɔ ngɛ ta mi.

26 Ma a agbo ɔmɛ a nya maa pee mɔbɔmɔbɔ kɛ ya; nɛ ma a nitsɛ lɛɛ e maa pee kaa yo nɛ hɛɛ e he gu kɛ hii si ngɛ zugba.