Munyuhi nɛ a kɛ slɔ matsɛ
1 Munyuhi nɛ Matsɛ Lemuel, Masa matsɛ ɔ nyɛ kɛ tsɔse lɛ ji nɛ ɔmɛ nɛ:
2 “Ye bi, i suɔ mo saminya. I kpa o he pɛɛ ngɛ sɔlemi mi loko i ná mo nɛ i fɔ. Mɛni munyu kpakpa sa mo pe enɛ ɔ?
3 Koo ngɔ o he wami kɛ ha yihi. Matsɛmɛ tete po nɛ nyɛɛɔ yihi a se ɔ, a hɛ mi kpataa.
4 Lemuel lee, anɔkuale mi ɔ, e sɛ matsɛmɛ, kɛ ma nɔ yeli kaa a nu wai, loo dã nɛ nya wa.
5 Ke a nu dã a, a hɛ maa je mlaa a nɔ, nɛ a ma plɛ nɔ́ nali a sane hɛ mi kɛ bu si.
6 Nyɛ ha ni nɛmɛ nɛ a hɛ mi miɔ nɛ e ma kpata a dã nɛ nya wa nɛ a nu; nɛ nyɛ ha ni nɛmɛ nɛ aywilɛho nu mɛ ɔ hu wai.
7 Ke a nu ɔ, a hɛ maa je ohia nɔ, nɛ a be kɔmɔ yee hu.
8 “Tu munyu kɛ fa mumui he; ye awusahi tsuo a sane ha mɛ.
9 Tu munyu kɛ fa a he; ye dami sane. Hyɛ nɔ́ nali, kɛ dɛgutsɛmɛ a nɔ saminya.”
Yo kpakpa
10 Yo kpakpa a, mɛnɔ ma na? E he jua wa kulaa pe june!
11 E huno ngɔɔ e hɛ kɛ fɔɔ e nɔ kɛ e tsui tsuo, nɛ e huno ɔ be ohia yee gblegbleegble.
12 Yo ɔ peeɔ e huno ɔ suɔmi nya ní; daa nɛ ɔ, e peeɔ lɛ kpakpa, pi yayami.
13 E hlaa to he bwɔmi kɛ doti kpa, nɛ e bua jɔɔ nɔ́ nɛ e kɛ loɔ ɔ he.
14 E ya ngɔɔ niye ní kɛ jee tsitsaa kɛ baa kaa bɔ nɛ jua yelɔ ya ngɔɔ tlomi kɛ jee ma se lokoo kɛ baa a.
15 E teɔ si makɛ mla, nɛ e hlaa niye ní ha e we mi bimɛ, nɛ e gbaa ní tsumi ha e mawayihi.
16 E hlaa zugba nɛ e heɔ. E bɔɔ apaa nɛ a peeɔ wai ngmɔ ha lɛ.
17 E tsuɔ ní kpakpataa; e nine si wa kɛ ní tsumi.
18 E tsuɔ ní nyɔ mi tsuo; ejakaa e le kaa e ma na he se kokooko.
19 Lɛ nitsɛ nɛ e tsɛ̃ɔ doti kpa, nɛ e kɛ loɔ bo.
20 E naa ohiatsɛ mɔbɔ, nɛ e bɔleɔ nine kɛ haa nɔ nɛ e fi lɛ.
21 Ke fĩɛ be su ɔ, e yi tsui kaa fĩɛ maa ye e we mi bimɛ, ejakaa mɛ tsuo a ngɛ kuutu tade.
22 Lɛ nitsɛ e loɔ e sa nɔ bo; nɛ e buɔ kploba nɛ ngɛ fɛu, kɛ bo nɛ hɛɛ alamua tu su.
23 Ke ma nimeli kpe ɔ, a toɔ e huno ɔ he hɛ saminya ngɛ a kpɛti.
24 Yo ɔ kpɛɔ kploba tade nɛ e juaa; e juaa mi mi fimi níhi hu kɛ haa je juali.
25 Ke o na e he wami, kɛ e he fɛu ɔ, lɛɛ ja bo kpakpa nɛ nɔ kɛ dla e he. E yi nɔ́ nɛ maa ba hwɔɔ se gbeye.
26 Nile munyu sɔuu e tuɔ, nɛ a naa ngɛ e lilɛ nɔ kaa e mi mi jɔ.
27 E hyɛɔ nɛ e we mi bimɛ nɛ ba a je mi saminya; nɛ e sume hejɔ.
28 E huno, kɛ e bimɛ tsuo buɔ lɛ, nɛ a gbaa lɛ. E huno ɔ jeɔ e yi ke,
29 “Yihi babauu ngɛ nɛ bɔɔ mɔde mohu, se moo lɛɛ, o pe mɛ tsuo!”
30 Hɛ mi nyami sisiɔ nɔ, nɛ he fɛu hu taa; se yo nɛ yeɔ Yawɛ gbeye ɔ, e sa kaa a je e yi.
31 Nyɛ je e yi ngɛ níhi nɛ e tsu ɔ a he. Nɔ tsuaa nɔ nɛ je e yi ngɛ e ní tsumi ɔmɛ a he.