Fiɛlɔ - Introduction

NYA TSƆƆMI

Fiɛlɔ nguaa ko susumihi nɛ a bua nya lɛ ngɛ womi nɛ ɔ mi. Fiɛlɔ nɛ ɔ susuɔ e yi mi wawɛɛ nitsɛ. Nɔ́ nɛ e kpa si ji nɔmlɔ adesa wami ɔ, pi kaa e se kɛ we kɛkɛ, se ní komɛ baa nɛ ke o hyɛ ɔ, a kɛ adebɔ mlaa yɛ. Hehi nɛ fiɛlɔ ɔ hyɛ blɔ kaa a maa ye dami sane ngɛ ɔ, e ya bɛ lɛ ja kulaa; e ya peeɔ nine mi wu jemi mohu. Ní nɛ ɔmɛ tsuo nɛ fiɛlɔ ɔ na a, nɔ́ nɛ e de kɛkɛ ji, “Wami he be se nami.” Mawu ɔ, nɛ lɛ e dɛ mi nimli adesahi tsuo a wami ngɛ ɔ, fiɛlɔ ɔ juɛmi sui e ní peemi níhi a he. Se enɛ ɔmɛ tsuo a se ɔ, ga nɛ fiɛlɔ ɔ woɔ ji kaa nɔmlɔ nɛ tsu ní wawɛɛ, konɛ níhi nɛ Mawu ha lɛ ɔ, e ye, aloo e na a he bua jɔmi bɔ nɛ sa kɛ yaa si be nɛ e suɔ.

Ke o hyɛ ɔ, kaa nɔ́ nɛ fiɛlɔ ɔ munyu ɔmɛ ekomɛ piɛ bɔɔ; munyu ɔmɛ ekomɛ haa nɛ nɔ nine mi jeɔ wu. Se e hi kaa womi nɛ ɔ hu ngɛ Baiblo ɔ mi; ejakaa e deɔ wɔ níhi babauu ngɛ nɔmlɔ adesa wami si himi he, kpakpa kɛ yayami tsuo. Nihi babauu ngɔɔ womi nɛ ɔ mi munyu ɔmɛ kɛ toɔ mɛ nitsɛmɛ a wami si himi he kaa bɔ nɛ nɔ hyɛɛ e hɛ mi ngɛ ahuhuɛ mi ɔ. Ngɛ ní nɛ ɔmɛ tsuo a mi ɔ, Mawu haa wɔ hɛ nɔ kami ko. E haa nɛ wa nuɔ wami nɛ ɔ sisi saminya pe bɔ nɛ wa susu kaa wa le ɔ.

Bɔ nɛ a dla womi ɔ mi ha

• Anɛ se nami ko ngɛ wami he lo? 1.1—2.26
• Ní komɛ nɛ a deɔ ngɛ wami he 3.1—11.8
• Nyagbe ga womi 11.9—12.8
• Kuku pomi 12.9-14