Salomo abɛhi
1 Salomo abɛhi ji nɛ ɔmɛ nɛ: Bi ní lelɔ haa e tsɛ bua jɔmi; bi kuasia yeɔ e nyɛ tsui.
2 Ke o gu blɔ yaya nɔ kɛ na ní ɔ, e he be se nami bae ha mo. Se ke o ye anɔkuale ɔ, o yi ma na wami.
3 Yawɛ be hae nɛ hwɔ nɛ ye nimli kpakpahi; nimli yayamihi lɛɛ e maa tsi mɛ blɔ, konɛ a nine ko su nɔ́ nɛ a ngɛ hlae ɔ nɔ.
4 Nɔ nɛ peeɔ hejɔ ɔ, e yeɔ ohia; se nɔ nɛ tsuɔ ní lɛɛ e naa ní.
5 Bi nɛ buaa nɔ́ nya latsa be ɔ, bi ní lelɔ ji lɛ; bi nɛ hwɔɔ si ní kpami be ɔ, bi nɛ woɔ nɔ zo ji lɛ.
6 Nɔ nɛ peeɔ nɔ́ nɛ da a, a maa gbaa lɛ babauu. Se yiwutsotsɛ lɛɛ e nya mi munyu puɛɔ nɔ́.
7 E ji gbaami kaa a ma kai nimli kpakpahi daa; yayami peeli lɛɛ e kɛ we nɛ hɛ jeɔ a nɔ.
8 Ní lelɔ yeɔ mlaa nɔ; se kuasia nɛ tuɔ munyu puu ɔ, lɛɛ e hɛ mi ma kpata.
9 Nɔ nɛ yeɔ anɔkuale ɔ, e he mi jɔɔ lɛ. Nɔ nɛ yi anɔkuale lɛɛ nine maa gbe lɛ.
10 Ke nɔ ko na nɔ́ nɛ dɛ, nɛ e ku e hɛ ngɔ fɔ nɔ ɔ, haomi lɛ e kɛ baa. Se nɔ nɛ kaa nɔ hɛ mi nɛ e yi gbeye ɔ, tue mi jɔmi lɛ e kɛ baa.
11 Nɔmlɔ kpakpa nya mi munyu ngɛ kaa nyu vu nɛ haa nɔ wami; nɔmlɔ yayami lɛɛ e nya mi munyu puɛɔ nɔ́.
12 ⓞ Ninyɛ woɔ pɛ; se suɔmi haa tɔmihi tsuo a nɔ.
13 Ní leli tuɔ juɛmi munyu; kuasiahi lɛɛ e sa nɛ a gbla a tue.
14 Ní leli tu we munyu fuu. Kuasiahi lɛɛ a tuɔ munyu puu, nɛ lɔ ɔ kɛ mɛ woɔ haomi mi.
15 Niatsɛmɛ a ní nɛ a na a buɔ a he; se ohiatsɛmɛ lɛɛ a ohia a kpataa a hɛ mi.
16 Nɔ nɛ peeɔ kpakpa a, e yi ma na wami. Se nɔ nɛ peeɔ yayami ɔ, yayami ɔ kɛ̃ a kɛ maa wo lɛ hiɔ.
17 Nihi nɛ ke a tu mɛ munyu nɛ a nuɔ ɔ, a yi ma na wami. Se ni nɛmɛ nɛ kplɛɛ we nɛ a kaa a hɛ mi ɔ, mɛɛ lɛɛ a laa blɔ.
18 Nɔ tsuaa nɔ nɛ nyɛɛ nɔ ngɛ laami mi ɔ, lakpatsɛ ji lɛ. Nɔ nɛ tuɔ nihi a he munyu kɛ puɛɔ mɛ ɔ, kuasia ji lɛ.
19 Nɔ nɛ tuɔ munyu babauu ɔ, e kɛ we nɛ e peeɔ yayami. Ní lelɔ lɛɛ e hyɛɛ e lilɛ nɔ saminya.
20 Nɔmlɔ kpakpa nya mi munyu he jua wa kaa sika hiɔ ngmingmiingmi; se yiwutsotsɛ juɛmi lɛɛ nɔ́ ko nɔ́ ko be mi.
21 Nimli kpakpahi a nya mi munyu he baa se nami ha nihi babauu. Kuasiahi lɛɛ a hɛ mi kpataa, ejakaa a be juɛmi.
22 Mawu gbaami lɛ peeɔ nɔ niatsɛ; dengme gbomi kɛ nɔ́ ko nɔ́ ko piɛ we he ha nɔ.
23 Kuasia ngɛ nɛ ɔ, yayami peemi peeɔ lɛ bua jɔmi; juɛmitsɛ lɛɛ nile ji nɔ́ nɛ haa lɛ bua jɔmi.
24 Nɔ́ nɛ yayami peelɔ ngɛ gbeye yee ɔ, lɔ ɔ ji nɔ́ nɛ maa ba e nɔ. Nɔ nɛ peeɔ kpakpa lɛɛ nɔ́ nɛ e ngɛ hlae ɔ, lɔ ɔ a ma ha lɛ.
25 Ke kɔɔhiɔ nɛ nya wa te ɔ, e fiaa yayami peeli kɛ nɔɔ si nɛ a gboɔ. Se nihi nɛ peeɔ kpakpa lɛɛ nɔ́ ko nɔ́ ko sɛ a he.
26 Koo tsɔ hejɔtsɛ kɔkɔɔkɔ. Ke o tsɔ lɛ ɔ, o he mi maa hia mo wawɛɛ nitsɛ; e maa pee mo kaa nɔ́ nɛ pe o ye kpɛte nɛ o lungu fĩa, aloo la su ku sɛ o hɛngmɛ mi.
27 Yawɛ gbeye yemi haa nɔ wami se kɛɔ; se yayami peeli lɛɛ a wami se kɛ we kulaa.
28 Nihi nɛ peeɔ kpakpa a, a hɛ kɛ nɔ fɔmi ya peeɔ bua jɔmi. Se yayami peeli lɛɛ a hɛ kɛ nɔ fɔmi maa pee yaka.
29 Nihi nɛ peeɔ nɔ́ nɛ da a, Yawɛ buu a he; yayami peeli lɛɛ e kpataa a hɛ mi.
30 Nihi nɛ peeɔ nɔ́ nɛ da a, a maa ye a he daa, se yayami peeli lɛɛ a yi be wami nae ngɛ zugba a nɔ.
31 Nihi nɛ peeɔ nɔ́ nɛ da a, a tuɔ juɛmi munyu. Se lilɛ nɛ yeɔ lakpa a, a maa po lɛ kɛ fɔ he.
32 Nihi nɛ peeɔ nɔ́ nɛ da a, a le nɔ́ nɛ sa nɛ a de. Se yayami peeli lɛɛ munyu nɛ puɛɔ nɔ́ lɛ a tuɔ.