Abɛ 1

Abɛhi a he se nami

1 ⓐ Israel matsɛ, Salomo, David bi ɔ abɛhi ji nɛ ɔmɛ nɛ.

2 Abɛ nɛ ɔmɛ ma ha nɛ o maa le ní; a maa wo mo ga kpakpa, nɛ a ma ha nɛ o maa nu sanehi nɛ a mi kuɔ a sisi.

3 Abɛ ɔmɛ maa tsɔɔ mo anɔkuale yemi, dami sane yemi, kɛ nɔ́ nɛ da peemi.

4 Nɔ nɛ li nɔ́ ɔ, abɛ ɔmɛ ma ha nɛ e nɔ bɔ ma tsɔ; se niheyo lɛɛ e ma na juɛmi, kɛ hɛ mi si kami.

5 Ke ní lelɔ nu abɛ nɛ ɔmɛ ɔ, e nile ɔ maa hiɛ kɛ pue nɔ; juɛmitsɛ hu e juɛmi ɔ mi ma blɛke pe kekle ɔ,

6 konɛ a nyɛ nɛ a nu abɛhi, kɛ ní leli a munyuhi nɛ a mi kuɔ ɔ a sisi saminya.

A wo nihewi ga

7 ⓑ Loko o ma na nile ɔ, ja o ye Yawɛ gbeye. Kuasiahi bui nile, nɛ slɔmi gbi hu a sume.

8 Ye bi, ke o tsɛ ngɛ mo tsɔsee ɔ, bu tue! Ke o nyɛ hu ngɛ mo ní tsɔɔe ɔ, ko kua!

9 Ejakaa lɔ ɔmɛ nɛ ma dla mo nɛ o ba o je mi saminya, kaa bɔ nɛ duku kpakpa, loo kuɛ ní haa nɔ he peeɔ fɛu ɔ.

10 Ye bi, ke yayami peeli ngɛ mo mlɔɔe ɔ, koo nyɛɛ a se.

11 Ke a de mo ke, “Ha nɛ waa ho nɛ wa ya hla nɔ ko waa gbe! Ha wa ya wo nɔ ko nɛ pee we nɔ́ ko ka, nɛ waa gbe lɛ yaka gu!

12 Waa mii mɛ hɛ ngmengmle kaa a yaa gbeje; waa ngɔ mɛ kaa yɔkɔ ngɔɔ gbogboe, be mi nɛ a ngɛ kpakpataa!

13 Wa ma na ní kpakpahi nɛ a he jua wa babauu, nɛ wa we ɔmɛ ma hyi tɔtɔɔtɔ kɛ níhi nɛ wa ha.

14 Ba piɛ wa he. Ke wa ná nɔ́ ko ɔ, wɔ tsuo wa maa dla lɛ fiee!”

15 Ye bi, o kɛ kikɛmɛ a nimli ko bɔ. Koo nyɛɛ a se.

16 A he sɔɔ kɛ yayami peemi; a he sɔɔ kɛ pueɔ muɔ si.

17 Ke lohwe pɛlitsɛ ngɛ mo hyɛe nɛ o tsɔ lɛ klama a, o tsu yaka ní.

18 Se nimli kaa kikɛ nɛ ɔmɛ lɛɛ mɛ nitsɛmɛ a he klama a tsɔ ɔ nɛ; mɛ nitsɛmɛ lɛ a maa du klama a, nɛ a ma gbo.

19 Nihi tsuo nɛ guu awi yemi mi kɛ naa ní ɔ, bɔ nɛ a nyagbe ya baa ji nɛ ɔ nɛ; awi yemi mi nɔuu a gboɔ ngɛ.

Nile wo gbi

20 ⓒ Nile ngɛ ngmlaa kpae boboobo ngɛ gbɛjegbɛ nɔ, kɛ jua mi.

21 E ngɛ kpae boboobo ngɛ ma agbo ɔmɛ a nya, kɛ hehi tsuo nɛ nihi buaa a he nya ngɛ. E ngɛ dee ke,

22 “Kuasiahi! Mɛni be nyɛ maa biɛ kɛ yaa si? Fɛu yeli! Mɛni be nyɛ maa ye fɛu kɛ yaa si? Anɛ nyɛ be ní kasee?

23 Nyɛɛ bu tue nɛ ma ka nyɛ hɛ mi. Ma wo nyɛ ga kpakpa, nɛ i kɛ nyɛ maa tu nile munyu.

24 I hla nyɛ se blɔ, nɛ i tsɛ nyɛ si abɔ ke nyɛɛ ba ye ngɔ. Se nyɛ bui fɛɛ.

25 Ga tsuo nɛ i wo nyɛ ɔ, nyɛ ngɔɛ, nɛ nyɛ kplɛɛ we kaa ma kua nɔ́ ha nyɛ.

26 Lɔ ɔ he ɔ, ke haomi ba nyɛ nɔ ɔ, imi hu ma muɔ nyɛ. Ke nyɛ hɛ dɔ ɔ, ma ye nyɛ he fɛu.

27 Ke haomi ba nyɛ nɔ kaa nɔ́ nɛ kɔɔhiɔ nɛ nya wa lɛ ngɛ fiae, nɛ amanehlu ba na nyɛ kaa lasiogblee, nɛ nyɛ ngɛ nyɛ tsui yee ɔ,

28 jamɛ a be ɔ mi ɔ, nyɛ ma tsɛ mi, se i be nɔ hee. Nyɛ ma hla ye se blɔ kɛ hɛdɔ, nɛ nyɛ be mi nae.

29 Ejakaa nyɛ bui nile he akɔtaa; Yawɛ hu, nyɛ yi lɛ gbeye.

30 Nyɛ sume ga womi; nɛ ke i ka nyɛ hɛ mi hu, nyɛ kplɛɛ we.

31 Lɔ ɔ he ɔ, nɔ́ nɛ nyɛ tsu ɔ, lɔ ɔ he hiɔwo nyɛ ma na; nyɛ ní yaya amɛ nɔuu maa hao nyɛ.

32 Kuasiahi gboɔ, ejakaa a bui nile; a heɔ mɛ nitsɛmɛ a he yeɔ, nɛ nɔ́ nɛ ɔ kpataa a hɛ mi.

33 Se nɔ tsuaa nɔ nɛ buɔ mi tue ɔ, e maa hi si ngɛ he jɔmi mi, nɛ e be gbeye yee kaa haomi ko maa ba e nɔ.”