WOMI EYWIƐNE
(<x>230 90-106</x>)
Mawu kɛ adesa
1 Nyɔmtsɛ, mo ji wa wesa he ngɛ yi nɔhi tsuo a mi.
2 Benɛ o na we nɛ o bɔ yo ɔmɛ; benɛ o na we nɛ o bɔ je ɔ, mo ji Mawu nɛ ngɛ kɛ je neneene kɛ yaa si neneene.
3 O deɔ adesa ke, “Kpale kɛ ya o je he!” Kɛkɛ ɔ, nɔmlɔ plɛɔ peeɔ tabo zu.
4 ⓧ Moo lɛɛ jeha akpe ngɛ kaa ligbi kake ha mo; e ngɛ kaa hiɛmɛ a je hiɛ nɛ be momo, aloo be bɔɔ kɛkɛ ngɛ nyɔ mi.
5 O ngɔɔ wɔ kɛ yaa kaa bɔ nɛ pa muɔɔ níhi kɛ yaa a; wa wami be ɔ tsuo ngɛ kaa mahe nɛ a hwɔ. Wa ngɛ kaa hu nɛ puɛɔ flɔflɔɔflɔ mɔtu.
6 Mɔtu ɔ, e blɛkeɔ saminyayoo, se gbɔkuɛ ɔ, e nglaa, nɛ e gboɔ.
7 O mi mi la a kpataa wa hɛ mi; o mi mi la a woɔ wa he gbeye.
8 O ngɔ wa he yayami ɔmɛ ngɔ pue o hɛ mi; wa diblii mi yayami ɔmɛ tsuo ngɛ o hɛ mi paa.
9 Ke o mi mi fu wɔ ɔ, o poɔ wa wami be ɔ nɔ kpiti kaa a woɔ mumi.
10 Wa wami be ɔ tsuo ji jeha nyingmi kpaago. Ke wa ngɛ he wami ɔ, wa naa nyingmi kpaanyɔ, se lɛ tsuo peeɔ haomi kɛ aywilɛho sɔuu. Wa wami se poɔ tlukaa; nɛ wa bee kɛ yaa kaa lohwe pɛlitsɛmɛ nɛ te kɛ bee.
11 Mɛnɔ lɛ le bɔ nɛ o mi mi fumi ɔ nya wa ha? Bɔ nɛ o he ngɛ gbeye ɔ, ja lɛ o mi mi fumi ɔ ngɛ.
12 Ha nɛ waa na kaa wa wami se kɛ we kulaa, konɛ waa le ní.
13 Mɛni be o mi mi fumi ɔ se maa po? Yawɛ, naa wɔ, o tsɔli ɔmɛ mɔbɔ!
14 Naa wɔ mɔbɔ daa mɔtu, konɛ wa na bua jɔmi wa wami be ɔ tsuo.
15 Bɔ nɛ o ha nɛ wa na amanehlu wawɛɛ jeha komɛ nɛ be ɔ, ha nɛ wa na bua jɔmi, nɛ wa nya ja nɔuu ngɛ be nɛ wa ngɛ mi nɛ ɔ mi.
16 Ha nɛ wɔ, o tsɔli ɔmɛ, waa na o ní tsumi ɔmɛ. Ha nɛ wa bimɛ ɔmɛ nɛ a na o he wami kpetekpleenyɛ ɔ.
17 Nyɔmtsɛ, wa Mawu, naa wɔ mɔbɔ! Ha nɛ wa ní tsumi nɛ ya nɔ! Ee, ha nɛ wa ní tsumi nɛ ya nɔ!