Ma a we amanehlu be la
1 ⓣ Yawɛ, ma la daa kɛ tsɔɔ kaa o suɔmi ɔ be nyagbe. Ma sɛɛ ha yi nɔhi tsuo ke anɔkuale yelɔ ji mo.
2 I le kaa o suɔmi ɔ maa hi si daa. O we anɔkuale yemi ɔ hu be nyagbe; e ngɛ kɛ yaa neneene kaa bɔ nɛ hiɔwe ngɛ ɔ.
3 O de ke, “I kɛ nɔ nɛ i hla lɛ ɔ so somi ko. I ka ye tsɔlɔ David kita ke,
4 ⓤ ‘Ma ha nɛ o nina maa ye matsɛ daa; o matsɛ yemi ɔ maa hi si kɛ maa ya neneene.’ ”
5 Yawɛ, hiɔwe ma je nyakpɛ níhi nɛ o ngɛ pee ɔ a yi; a ma la kɛ je o yi kaa o yeɔ anɔkuale.
6 Yawɛ, mɛnɔ lɛ ngɛ hiɔwe nɛ ngɛ kaa mo? Hiɔwe nibɔ ní ɔmɛ te nɔ́ nɛ kɛ mo sɔ?
7 A buu mo ngɛ ni klɔuklɔuhi a kpe ɔ mi; mɛ tsuo pɛpɛɛpɛ a yeɔ mo gbeye.
8 Yawɛ Tabohiatsɛ Mawu! Mɛnɔ lɛ ngɛ he wami kaa mo Yawɛ? O yeɔ anɔkuale ngɛ nɔ́ tsuaa nɔ́ mi.
9 Ke wo gli, nɛ oslɔke ngɛ fiae ɔ, mo lɛ o jɔɔ he.
10 Rahab, wo mi lohwe ɔ nɛ he ngɛ gbeye ɔ, mo lɛ o kpata e hɛ mi pɛsɛpɛsɛ. O kɛ o he wami kpetekpleenyɛ ɔ ye o he nyɛli ɔmɛ a nɔ kunimi.
11 O níhi ji hiɔwe ɔ kɛ zugba a tsuo; mo lɛ o bɔ je ɔ kɛ e mi níhi tsuo.
12 O bɔ omleyi je, kɛ leneyi je. Tabor yo ɔ, kɛ Hermon yo ɔ ngɛ lae kɛ ngɛ o yi jee.
13 He walɔ kpetekpleenyɛ ji mo; o he wami ɔ kle!
14 O matsɛ yemi ɔ, dami sane yemi nɔ a to lɛ sisi kɛ fɔ. Suɔmi kɛ anɔkuale yemi jeɔ kpo ngɛ o nɔ́ tsuaa nɔ́ peemi mi.
15 A gbaa nihi nɛ le bɔ nɛ a laa kɛ jaa mo. Mo Yawɛ, o maa na mɛ mɔbɔ daa.
16 Mo o he ɔ, a bua jɔɔ a he daa nɛ; a jeɔ o yi, ejakaa o hi.
17 Mo lɛ o haa nɛ a yeɔ kunimi nguahi. Mo lɛ o naa wɔ mɔbɔ loko wa yeɔ manye.
18 Yawɛ, mo lɛ o hla wa he falɔ ɔ kɛ ha wɔ; mo, Israel Mawu klɔuklɔu ɔ, mo lɛ o ha wɔ wa matsɛ.
Mawu wo David si
19 Be ko ɔ, o kɛ o tsɔli klɔuklɔu ɔmɛ tu munyu ngɛ nina mi, nɛ o de mɛ ke, “I fi katsɛ ko jlasi. I ngɔ matsɛ sɛ ɔ kɛ ha nɔ ko nɛ i hla kɛ je ma mi bi ɔmɛ a kpɛti.
20 ⓥ I ngɔ ye nu klɔuklɔu ɔ kɛ pɔ ye tsɔlɔ David, nɛ i wo lɛ matsɛ.
21 Ye nine maa hi e he be tsuaa be, nɛ ma wo lɛ he wami.
22 E he nyɛli a nine be e nɔ sue; yayami peeli be nyɛe maa ye e nɔ.
23 Ma kpata e he nyɛli a hɛ mi; ni nɛmɛ nɛ nyɛɔ lɛ ɔ, ma gbe mɛ tsuo.
24 Ma suɔ lɛ, ma ye lɛ anɔkuale, nɛ ma ha e maa ye kunimi daa.
25 Ma ha nɛ e matsɛ yemi ɔ ma blɛke kɛ je Mediterenia wo ɔ nya kɛ ya su Yufrate pa a he.
26 E ma tsɛ mi ke, ‘Tsaatsɛ, ye Mawu, ye he bulɔ, kɛ ye yi wami helɔ.’
27 ⓦ Imi hu ma ngɔ lɛ kɛ pee ye bitɛte; ma pee lɛ matsɛ nɛ kle pe je nɛ ɔ mi matsɛmɛ ɔmɛ tsuo.
28 Ma suɔ lɛ, nɛ ma na lɛ mɔbɔ daa; somi nɛ i kɛ lɛ so ɔ se be poe gblegbleegble.
29 E weku kpa se be poe gblegbleegble; e maa hi kaa bɔ nɛ hiɔwe ngɛ ɔ pɛpɛɛpɛ. Daa nɛ ɔ, e nina ko maa hi sɛ ɔ nɔ.
30 “Se ke e nina ya yi ye mlaa amɛ a nɔ, nɛ́ a bɛ a je mi kaa bɔ nɛ i fa mɛ ke a pee ɔ,
31 ke a kua ye blɔ nya tomi ɔmɛ, nɛ a yi ye mlaa amɛ a nɔ ɔ
32 lɛɛ ma gbla a tue ngɛ a yayami ɔmɛ a he, nɛ ma ha a maa na nɔ́.
33 Se kɛ̃ ɔ, suɔmi nɛ i ngɛ kɛ ha mɛ ɔ, jamɛ a suɔmi ɔ be tae gblegbleegble; si ko nɛ i wo David ɔ hu, i be ye nya se kpalee.
34 Somi ɔ nɛ i kɛ lɛ so ɔ, i be se jee; si nɛ i wo lɛ ɔ, i be tsakee.
35 “I kɛ ye biɛ klɔuklɔu ɔ wo si kaa i be David lakpa yee gblegbleegble.
36 E nina maa hi si kɛ maa ya neneene. Ma bu e matsɛ yemi ɔ he be abɔ nɛ pu ngɛ hiɔwe ɔ.
37 E matsɛ yemi ɔ maa hi si daa kaa nyɔhiɔ, jamɛ a anɔkuale odase ɔ nɛ ngɛ hiɔwe ɔ.”
Aywilɛho la, benɛ a ye matsɛ ɔ nɔ ɔ
38 Se nɔ nɛ o pɔ lɛ nu ɔ, o mi mi fu lɛ; o kua lɛ, nɛ o hɛ lɛ ngɔ fɔ he.
39 Somi nɛ o kɛ o tsɔlɔ ɔ so ɔ, o je se; o sake e matsɛ pɛɛ ɔ ngɔ fɔ zugba, nɛ o ble lɛ.
40 Gbogbo nɛ a fia kɛ wo ma a he ɔ, o ku lɛ tsuo pue si, nɛ mɔ ɔmɛ plɛ pee ní kokoehi.
41 Nihi tsuo nɛ guu lejɛ ɔ, juɔ e níhi; e plɛ pee muɔ nɔ́ ha e he nihi po.
42 O ha nɛ e he nyɛli ɔmɛ ye kunimi, nɛ mɛ tsuo a na bua jɔmi.
43 Ee, o ha nɛ e ta hwumi ní ɔmɛ pee yaka, nɛ e nyɛ we ta a nya nɛ e da.
44 O he e hiɔ ɔ ngɛ e dɛ, nɛ o sake e matsɛ sɛ ɔ ngɔ fɔ zugba.
45 O po e nihe mi be ɔ nɔ kpiti, nɛ o ha nɛ e hɛ mi pue si.
Kue fami
46 Yawɛ, mɛni be o maa laa o he kɛ ya si? O maa laa o he kɛ maa ya neneene lo? O mi mi fumi nɛ ngɛ kaa la nɛ ngɛ tsoe ɔ, mɛni be lɛ e se maa po?
47 Mo kai kaa ye wami be ɔ ngɛ kuku. Mɛni he je lɛ o bɔ nɔmlɔ adesa yaka gu ɔ?
48 Te nɔmlɔ nɛ ngɛ je mi, nɛ lɛɛ e be gboe? Mɛnɔ ma nyɛ ma je e he kɛ je gbenɔ dɛ mi?
49 Nyɔmtsɛ, suɔmi nɛ o je kpo blema a, jije jamɛ a suɔmi ɔ ngɛ? Níhi nɛ o wo David si ke o maa pee ɔ, jije ní ɔmɛ ngɛ?
50 Nyɔmtsɛ, ahlua nɛ a ngɛ o tsɔli ɔmɛ bɔe ɔ, o hɛ ko je nɔ. Jɛmihi tsuo nɛ a ngɛ mi jɛe ɔ, i ma ye nya ngɔ to nɔ.
51 Yawɛ, nɔmlɔ nɛ o pɔ lɛ nu ɔ, hyɛ kaa o he nyɛli ɔmɛ ngɛ lɛ ahlua bɔe! He tsuaa he nɛ e gu, kɛkɛ jɛmi nyɛɛ e se.
52 A je Yawɛ yi daa. Amen! Amen!