A fa kue kɛ tsɛ balɔ
1 Mawu, mo he ye yi wami! Nyu ɔ ba su ye kuɛ mi;
2 i ngɛ pue ngɛ mɔsɔ nɛ mi kuɔ mi, nɛ si dami he ko kulaa be ha mi. I ya su nyu nɛ mi kuɔ mi, nɛ nyu ɔ miɔ nɛ e laa ye yi.
3 I kpa ngmlaa kɛ tsɛ balɔ hluu nɛ pɔ tɔ mi, nɛ ye kuɔ si kpɔ; i hyɛ blɔ hluu kɛ ya si ye hɛngmɛ se gbo.
4 ⓗ Nihi nɛ ye he ngɛ mɛ tsɛ̃e yaka gu ɔ, a he hiɛ babauu pe ye yi bwɔmi. Ye he nyɛli lakpatsɛmɛ nɛ ngɛ ye hɛ mi hlae nɛ a kpata a, yiwutsotsɛmɛ kpanakuhi ji mɛ. Anɛ níhi nɛ pi ojo nɛ i ye kɛ na a, lɔ ɔmɛ hu ma ngɔ kɛ ha lo?
5 Mawu, o le kaa i je kuasia, nɛ ye tɔmi ɔmɛ ngɛ o hɛ mi paa.
6 Nyɔmtsɛ Yawɛ Tabohiatsɛ, nihi nɛ ngɔɔ a hɛ kɛ fɔɔ o nɔ ɔ, ko ha nɛ a pee nɔ́ ko nɛ ba ha nɛ zo nɛ gbe mɛ. Israel Mawu, ni nɛmɛ nɛ jaa mo ɔ, ko ha nɛ ye ní peemi ba ha nɛ a hɛ mi nɛ pue si.
7 Ejakaa o he ɔ, a ngɛ mi ahlua bɔe, nɛ zo gbe mi kpɔtɔɔ.
8 I plɛ pee nubwɔ ha ye nyɛmimɛ; i plɛ pee nɔ kpa ngɛ ye weku li a kpɛti.
9 ⓘ Ejakaa ye hɛ dɔ wawɛɛ ngɛ o we ɔ he; nɛ ahlua nɛ ni ɔmɛ ngɛ mo bɔe ɔ ba pue ye nɔ.
10 Ke i ngɛ kɔmɔ yee nɛ i ngɛ hwɔ hae ɔ, ahlua mohu nɛ nihi bɔɔ mi.
11 Ke i ha kpekpe ya bo ɔ, kɛkɛ i plɛ pee blakpa fiami nɔ́ ha mɛ.
12 Nihi nɛ hii si ngɛ agbo nya a, ye he munyu sɔuu a hii tue, nɛ dã deli ɔmɛ hu imi la a hii woe.
13 Yawɛ Mawu, imi lɛɛ pɛɛ i ngɛ mo kpae; be nɛ sa o hɛ mi ɔ, he mi nɔ ngɛ o suɔmi babauu nɛ be nyagbe ɔ he.
14 Moo lɛɛ o yeɔ anɔkuale daa; jé mi kɛ je mɔsɔ ɔ mi, konɛ ma ko pu ngɛ mi. Kpɔ mi kɛ je ye he nyɛli ɔmɛ a dɛ mi; nɛ o je mi kɛ je nyu nɛ mi kuɔ ɔ mi.
15 Ko ha nɛ nyu kpekpemi ɔ nɛ sa mi kɛ ho, loo ma tlɔ nyu ɔ sisi, loo ma ya sɛ muɔ voo ɔ mi, nɛ e ba ma e nya nɛ e mi mi.
16 Yawɛ, he mi nɔ koo; ejakaa o suɔmi nɛ ngɛ daa a hi saminya; o mɔbɔ nami nɛ hiɛ babauu ɔ he ɔ, mo plɛ nɛ o hyɛ mi.
17 Koo ngɔ o hɛ mi kɛ laa imi, o tsɔlɔ ɔ; ejakaa i ngɛ haomi mi; pee esɔ nɛ o ba je mi.
18 Hɛɛ mo kɛ su ye he, konɛ o ba kpɔ mi. Ba kpɔ mi kɛ je ye he nyɛli ɔmɛ a dɛ mi.
19 O le bɔ nɛ a bɔ mi ahlua, bɔ nɛ a gbe mi zo, kɛ bɔ nɛ a ha ye hɛ mi pue si. O le ye he nyɛli ɔmɛ tsuo pɛpɛɛpɛ.
20 Ahlua nɛ a bɔ mi ɔ ha i ye ye tsui kɛ be nɔ, nɛ ye kɔni mi jɔ. I nɛ́ nɔ ko nɔ ko nɛ maa na mi mɔbɔ, loo nɛ e maa jɔɔ ye bua; i hyɛ blɔ yaka gu.
21 ⓙ A ha mi duɔ ngɛ niye ní nane mi; nɛ benɛ kuma ngɛ mi yee ɔ, a ha mi dã nɛ kuã ke ma nu.
22 ⓚ Ke a tsɛ ní yemi, loo a sã bɔ ngɛ nyami ligbi nɔ ɔ, ha nɛ e plɛ pee klama nɛ ma kpata a hɛ mi.
23 Ha nɛ a hɛngmɛ nɛ yu, konɛ a ko hyɛ nɔ́ hu! Ha nɛ a se tso nɛ kpɛ.
24 O mi mi nɛ fu mɛ wawɛɛ; o mi mi la nɛ nya wa nɛ ɔ nɛ ba a nɔ tlukaa.
25 ⓛ Ha nɛ a hi he nɛ pee ma doku; nɔ ko nɔ ko kó hi a bo tsu ɔmɛ a mi hu.
26 Ejakaa nihi nɛ o gbla a tue ɔ, a waa mɛ yi mi; nihi nɛ o plaa mɛ ɔ, a pa amɛ a he ní a sɛɛɔ.
27 Gbla a tue sisiisi ngɛ a tɔmi ɔmɛ a he; koo ngɔ ekoeko kɛ pa mɛ kɔkɔɔkɔ.
28 ⓜ Ha nɛ a gbe a biɛ ngɛ nihi nɛ ngɛ je mi kɛ mwɔɔ ɔ a womi ɔ mi, nɛ a ko ngma a biɛ kɛ piɛ nihi nɛ peeɔ nɔ́ nɛ da a he.
29 Se imi lɛɛ ye ní ngɛ mɔbɔ; i ngɛ nɔ́ nae. Mawu, wo ye nɔ, nɛ o he ye yi wami!
30 Ma la kɛ je Mawu yi, ma na lɛ si, nɛ ma tsɔɔ kaa lɛ ji ngua.
31 Lɔ ɔ maa sa Yawɛ hɛ mi pe na niheyo, loo na ku a tsɛ nɛ a kɛ maa sã bɔ ha lɛ.
32 Ke nɔ́ nali na a, a bua maa jɔ. Nyɛ ni nɛmɛ nɛ nyɛ ngɛ Mawu se blɔ hlae ɔ, nyɛ nɔ gbagba nɛ te.
33 Ejakaa Yawɛ buɔ dɛgutsɛmɛ tue, nɛ lɛ nitsɛ e nihi nɛ a wo mɛ tsu ɔ, e hɛ ji a nɔ.
34 Hiɔwe kɛ zugba, nyɛ je Mawu yi. Wo kɛ e mi nibɔ níhi tsuo, nyɛ je Mawu yi!
35 Ejakaa Mawu ma he Yerusalem yi wami, e maa pee Yuda ma amɛ ehe ekohu. E tsɔli ɔmɛ maa hi lejɛ ɔ, nɛ zugba a maa pee a nɔ́.
36 E tsɔli ɔmɛ a nina maa ngɔ zugba a kɛ pee a gbosi ní, nɛ ni nɛmɛ nɛ suɔ lɛ ɔ maa hi lejɛ ɔ.