David fa kue ha Mawu
1 Yawɛ, moo piɛ ye he koo! Hyɛ kaa i yeɔ anɔkuale, nɛ i sisi we nɔ. Lɔ ɔ he ɔ, i kpa mo pɛɛ nɛ o bu kue nɛ i ngɛ fae kɛ hɛdɔ nɛ ɔ tue.
2 Mo nɛ́ o yeɔ dami sane, moo wo mi nguɔ koo!
3 Ke o hyɛ ye tsui mi, ke o ba slaa mi nyɔ mi nɛ o ka mi ɔ, o be yayami ko nae ngɛ ye he. Ye munyu peeɔ anɔkuale; nɔ́ ko piɛ we he.
4 I yeɔ o mlaa amɛ a nɔ, nɛ i kɛ basabasa peeli bɔɛ.
5 O blɔ ɔ nɔ lɛ i nyɛɛɔ daa; i sane we kɛ ji nɔ hyɛ gblegbleegble.
6 Mawu, i ngɛ kue fae kɛ ngɛ mo hae, ejakaa i le kaa o maa pee ye hiami ní ɔmɛ ha mi. Lɛɛ mo plɛ o hɛ mi kɛ kpee mi mɔ, konɛ o nu ye munyu ɔmɛ.
7 Mo je o nyakpɛ suɔmi nɛ ngɛ daa a kpo kɛ tsɔɔ nihi nɛ ngɔɔ a hɛ kɛ fɔɔ o nɔ ɔ; nɛ o kpɔ mɛ kɛ je ni nɛmɛ nɛ teɔ si kɛ woɔ mɛ ɔ a dɛ mi.
8 Moo baa ye yi kaa bɔ nɛ nɔ baa lɛ nitsɛ e hɛngmɛ yi ɔ. Ngɔɔ mi kɛ laa ngɛ o pɛli hɔ̃ ɔ sisi,
9 kɛ je yiwutsotsɛmɛ nɛ ngɛ mi yi mi wae ɔ a dɛ mi, kɛ je ye he nyɛli nɛ bɔle mi ɔ a dɛ mi.
10 Mɔbɔ nami ko be a mi; he nɔ womi munyuhi lɛ jeɔ a nya.
11 Jehanɛ lɛɛ a sa ye yi; a ngɔ a hɛ ngɔ ká mi, konɛ a tsɛ̃ mi kɛ fɔ si.
12 A ngɛ kaa jatahi nɛ ya wo mi ká; a ngɛ mlɛe nɛ a tsɔtslɔɔ mi.
13 Yawɛ, yaa nɛ o kɛ mɛ ya kpe nɛ o ye a nɔ. Ngɔɔ o klaate ɔ kɛ kpɔ mi kɛ je yiwutsotsɛmɛ a dɛi.
14 Jé mi kɛ je nihi nɛ ná je nɛ ɔ mi níhi tsuo nɛ a ngɛ hlae ɔ a dɛ mi. Ngɔɔ haomihi nɛ o ngɔ to ha mɛ ɔ kɛ gbla a tue. Ha nɛ a bimɛ ba na haomi ɔ bɔ nɛ sa, nɛ eko nɛ piɛ ha a bibimɛ.
15 Se imi lɛɛ ma na o hɛ mi, ejakaa i pee we yayami ko. Nɛ ke ye hɛ tsɛ ɔ, ma ná bua jɔmi babauu kaa i na mo hɛ mi kɛ hɛ mi.