Ngɔɔ o hɛ ngɔ fɔ Mawu nɔ
1 Mawu, moo bu ye he, ejakaa i ngɔ ye hɛ kɛ fɔ o nɔ.
2 I de Yawɛ ke, “Yawɛ, ye Nyɔmtsɛ ji mo; o se ɔ, i pa be nɔ́ kpakpa ko hu.”
3 Hyɛ bɔ nɛ Yawɛ e ni klɔuklɔuhi nɛ ngɛ je ɔ mi ɔ a hɛ mi ngɛ nyami ha! Mɛ ji ni nɛmɛ nɛ i naa a he bua jɔmi.
4 Nihi nɛ a he sɔɔ kɛ ya nyɛɛɔ mawu kpahi a se ɔ, a haomi maa hiɛ babauu. I be mɛ futue kɛ pee a tɛlimi kusumi ɔmɛ; i be a biɛ ta woe tete.
5 Yawɛ ji ye nɔ́ tsuaa nɔ́; lɛ nɛ e haa mi nɔ́ tsuaa nɔ́ nɛ hia mi. Nɔ́ nɛ maa ba ye nɔ hwɔɔ se hu, Yawɛ dɛ mi lɛ e ngɛ.
6 O ke mi ní kpakpahi babauu; niinɛ, i ngɛ weto ní kpakpahi.
7 Ma je Yawɛ yi, ejakaa e ha mi juɛmi. Nyɔ mi po, ye he nile kɛ mi tuɔ munyu.
8 ⓟ I susuɔ Yawɛ he daa. Nɛ́ Yawɛ ngɛ ye kasa nya nɛ ɔ, nɔ́ ko nɔ́ ko be mi pee.
9 Enɛ ɔ he je ɔ, imi nɔmlɔ ɔ tsuo, i na bua jɔmi, kɛ he jɔmi.
10 ⓠ Ejakaa o maa bu ye he, nɛ gbenɔ he wami be ye he blɔ nae. Nɔ nɛ o suɔ lɛ ɔ, o be e he ngmɛɛe nɛ e hɛ mi nɛ kpata.
11 O maa tsɔɔ mi blɔ ɔ nɛ yaa wami mi ɔ. Lejɛ ɔ, ngɛ o hɛ mi ɔ, ma na bua jɔmi nitsɛnitsɛ, bua jɔmi nɛ se be poe kɛ maa ya neneene.