Yawɛ mlaa a
1 A gbaa ni nɛmɛ nɛ piami ko be a he ngɛ a si himi mi, nihi nɛ baa a je mi ngɛ Yawɛ mlaa a nya.
2 A gbaa nihi nɛ yeɔ e mlaa amɛ a nɔ, ni nɛmɛ nɛ kɛ a tsui tsuo hlaa e se blɔ,
3 nihi nɛ pee we nɔ́ nɛ dɛ, se mohu a baa a je mi kaa bɔ nɛ Yawɛ suɔ ɔ.
4 Yawɛ, o wo o mlaa amɛ, konɛ a ye nɔ sisiisi.
5 I na nɛ i nyɛ ye o mlaa amɛ a nɔ sisiisi.
6 Ke i hyɛ saminya, nɛ i ye o mlaa amɛ tsuo a nɔ ɔ, lɛɛ zo be mi gbee.
7 Ke i kase o mlaa kpakpa nɛ ɔmɛ ɔ, ma je o yi kɛ tsui nɛ mi tsɔ.
8 Ma ye o mlaa amɛ a nɔ; ko kua mi pɛsɛpɛsɛ!
Ye Yawɛ mlaa a nɔ
9 Ke niheyo ngɛ hlae nɛ e ba e je mi bɔ nɛ sa a, kɛ e maa pee kɛɛ? Bɔ nɛ e maa pee ji e maa ye o mlaa amɛ a nɔ.
10 I suɔ kaa ma nyɛɛ o se kɛ ye tsui tsuo, ko ha nɛ ma je o mlaa amɛ a he.
11 I ngɔ o munyu ɔ kɛ to ye tsui mi tɔɔ, konɛ ma ko pee yayami kɛ si mo.
12 Yawɛ, ma je o yi; tsɔɔ mi o mlaa amɛ.
13 Mlaahi tsuo nɛ je o nya a, imi hu ma fiɛ.
14 Ye bua jɔɔ o mlaa amɛ a he pe ní nami babauu.
15 Ma susu o mlaa amɛ a he, nɛ o blɔ ɔmɛ maa hi ye hɛ mi daa.
16 Ye bua jɔɔ o mlaa amɛ a he; ye hɛ be o munyu ɔmɛ a nɔ jee.
Yawɛ mlaa a haa nɔ bua jɔmi
17 O tsɔlɔ ji mi, naa mi mɔbɔ; ha nɛ ye yi nɛ na wami, konɛ ma ye o mlaa a nɔ.
18 Bli ye hɛngmɛ, konɛ ma na nyakpɛ níhi nɛ ngɛ o mlaa a mi.
19 Nubwɔ ji mi ngɛ je ɔ mi; koo ngɔ o mlaa a kɛ laa mi.
20 Daa nɛ ɔ, i ngɛ ye tsui yee kaa ma le o mlaa amɛ.
21 O kaa he woli a hɛ mi; á gbiɛ nihi nɛ tlaa blɔ kɛ jee o mlaa amɛ a he.
22 Mo je mi kɛ je a we ahlua bɔmi, kɛ he guɛ gbemi mi; ejakaa i ye o mlaa amɛ a nɔ.
23 Ke ganɔhi ya kpe nɛ a ngɛ ye yi nɔ soe tete po, imi, o tsɔlɔ lɛɛ o mlaa amɛ a he pɛ ma susu.
24 O mlaa amɛ jɔɔ ye bua; mɛ nɔuu ji ye ga woli.
Yé Yawɛ mlaa a nɔ
25 I tlɔ zugba mɔbɔmɔbɔ; ha nɛ ma na he wami ekohu kaa bɔ nɛ o wo si ɔ.
26 I jaje níhi nɛ i pee ɔ tsuo kɛ tsɔɔ mo, nɛ o he mi nɔ; tsɔɔ mi o mlaa amɛ.
27 Ha nɛ ma nu o mlaa amɛ a sisi, konɛ ma susu nyakpɛ níhi nɛ o pee ɔ a he.
28 Kɔmɔ yemi sɔuu ha nɛ i pee vii. Wó mi he wami ekohu kaa bɔ nɛ o wo si ɔ.
29 Je mi kɛ je yayami peemi mi. Naa mi mɔbɔ, konɛ o tsɔɔ mi o mlaa a.
30 I pee ye yi mi ke anɔkuale pɛ ma ye; i ngɔ o mlaa amɛ kɛ to ye hɛ mi.
31 Yawɛ, i pɛtɛ o mlaa amɛ a he wawɛɛ; ko ha zo nɛ gbe mi.
32 Ma ye o mlaa amɛ a nɔ kɛ gɛjɛmi; ejakaa o ha nɛ i nu mlaa amɛ a sisi saminya.
Ha nɛ ma nu mlaa a sisi
33 Yawɛ, tsɔɔ mi o mlaa amɛ a sisi, konɛ ma ye a nɔ sisiisi.
34 Ha nɛ ma nu mlaa a sisi, konɛ ma ye nɔ kɛ ye tsui tsuo.
35 Ha nɛ ma ye mlaa a nɔ; ejakaa e haa mi bua jɔmi.
36 Ha nɛ ma suɔ o mlaa amɛ mohu pe kaa ma na ní kpɔtɔɔ.
37 Níhi nɛ a he be se nami ɔ, ko ha ma hyɛ. Mo ha ye yi nɛ na wami kaa bɔ nɛ o wo si ɔ.
38 Si nɛ o wo nihi nɛ buɔ mo tue ɔ, ha nɛ e ba mi ha imi, o tsɔlɔ ɔ hulɔ.
39 Ahlua nɛ i ngɛ gbeye yee kaa a maa bɔ mi ɔ, ha nɛ e tsɔ ye he kɛ ho, ejakaa o mlaa amɛ hi.
40 Hyɛ kaa i suɔ o mlaa amɛ; ha mi wami he, ejakaa o peeɔ nɔ nɛ da.
Ngɔɔ hɛ kɛ fɔ Yawɛ mlaa a nɔ
41 Yawɛ, je o we anɔkuale suɔmi nɛ ngɛ daa a kpo kɛ tsɔɔ mi, nɛ o he ye yi wami kaa bɔ nɛ o wo si ɔ.
42 Kɛkɛ ɔ, ma na heto ma ha ni nɛmɛ nɛ ngɛ mi ahlua bɔe ɔ, ejakaa i ngɔ ye hɛ kɛ fɔ o munyu ɔ nɔ.
43 Ha nɛ ma nyɛ ma tu anɔkuale be tsuaa be; ejakaa i ngɔ ye hɛ kɛ fɔ o mlaa amɛ a nɔ.
44 Ma ye o mlaa a nɔ daa; ma ye nɔ kɛ maa ya neneene;
45 nɛ ma hi si ngɛ he jɔmi mi; ejakaa o mlaa nɔ i hlaa kaa ma ye.
46 Matsɛmɛ a hɛ mi tete po ma fiɛ o mlaa a, nɛ e be mi zo pee.
47 I naa o mlaa amɛ a he bua jɔmi, ejakaa i suɔ o mlaa amɛ.
48 I buu o mlaa amɛ, nɛ i suɔ mɛ hulɔ; o mlaa amɛ a he ma susu.
Ngɔɔ hɛ kɛ fɔ Yawɛ mlaa a nɔ
49 Mo kai si nɛ o wo imi, o tsɔlɔ ɔ; ejakaa i ngɔ ye hɛ kɛ fɔ nɔ.
50 Benɛ i ngɛ nɔ nae pohu ye bua jɔ, ejakaa o wo mi si ke o ma he ye yi wami.
51 Nihi nɛ woɔ a he nɔ ye ye he fɛu hluu, se kɛ̃ ɔ, i ngmɛɛ we o mlaa a he.
52 Yawɛ, nyakpɛ níhi nɛ o tsu blema lokoo ɔ, ke i susu a he ɔ, ye bua jɔɔ saminya.
53 Se ke i na yiwutsotsɛmɛ nɛ a ngɛ o mlaa a tɔ̃e ɔ, ye mi mi woɔ la wawɛɛ nitsɛ.
54 O mlaa amɛ plɛ pee lahi nɛ i laa ngɛ ye wami be kpiti nɛ ɔ mi ngɛ je ɔ mi.
55 I kaiɔ mo Yawɛ nyɔ mi, nɛ i susuɔ o mlaa a he.
56 I ye o mlaa amɛ a nɔ, nɛ o gbaa mi.
Pɛtɛ Yawɛ mlaa a he saminya
57 Yawɛ, mo pɛ i suɔ; i ngɛ si woe ke ma ye o mlaa amɛ a nɔ.
58 I ngɛ mo pɛɛ kpae kɛ ye tsui tsuo ke o na mi mɔbɔ kaa bɔ nɛ o wo si ɔ.
59 I susu ye je mi bami he, nɛ i ngɛ si woe ke ma ye o mlaa amɛ a nɔ.
60 I ngɛ esɔ hee nɛ ma ye o mlaa amɛ a nɔ; tsle tomi be mi ha mi.
61 Yiwutsotsɛmɛ tsɔ mi klamahi lɛɛ, se ye hɛ ji o mlaa a nɔ.
62 Nyɔ mi kpɛti i teɔ si nɛ i naa mo si, ejakaa o mlaa amɛ da saminya.
63 O tsɔli ɔmɛ nɛ sɔmɔɔ mo, kɛ nihi nɛ yeɔ o mlaa amɛ a nɔ ɔ, ye huɛmɛ ji mɛ tsuo.
64 Yawɛ, o suɔmi nɛ ngɛ daa a hyi je ɔ tɔ; moo tsɔɔ mi o mlaa amɛ.
Yawɛ mlaa he jua wa
65 Yawɛ, o ye o siwo ɔ nɔ, o kɛ imi, o tsɔlɔ ɔ ye saminya.
66 Ha mi juɛmi, kɛ nile; ejakaa i he o mlaa a ye.
67 Loko o gbla ye tue ɔ, i pɔɔ blɔ tlami, se jehanɛ lɛɛ i yeɔ o munyu ɔ nɔ.
68 O hi, nɛ o peeɔ kpakpa saminya! Moo tsɔɔ mi o mlaa amɛ.
69 Nihi nɛ woɔ a he nɔ ɔ tuɔ lakpa munyuhi kɛ siɔ mi; se imi lɛɛ i kɛ ye tsui tsuo yeɔ o mlaa amɛ a nɔ.
70 Mɛɛ lɛɛ a nui nɔ́ ko nɔ́ ko sisi, se imi lɛɛ i naa o mlaa a he bua jɔmi.
71 E hi ha mi kaa o gbla ye tue, konɛ ma kase o mlaa amɛ.
72 O mlaa a nɛ o ha mi ɔ hi ha mi pe je nɛ ɔ mi sika tsu, kɛ sika hiɔ babauu.
Yawɛ mlaa a da
73 Mo nitsɛ lɛ o bɔ mi, nɛ o baa ye yi. Ha mi juɛmi nɛ kɔɔ nɔ́ se, konɛ ma kase o mlaa amɛ.
74 Nihi nɛ yee mo gbeye ɔ maa na mi, nɛ a bua maa jɔ a he; ejakaa i ngɔ ye hɛ kɛ fɔ o munyu ɔ nɔ.
75 Yawɛ, i le kaa o ye dami sane, nɛ o gbla ye tue bɔ nɛ sa mi, ejakaa moo lɛɛ anɔkuale pɛ o yeɔ.
76 Ha nɛ o suɔmi nɛ ngɛ daa a nɛ jɔɔ ye bua kaa bɔ nɛ o wo imi, o tsɔlɔ ɔ si ɔ.
77 Naa mi mɔbɔ, konɛ ye yi nɛ na wami, ejakaa ye bua jɔɔ o mlaa a he.
78 Nihi nɛ woɔ a he nɔ ɔ, ha zo nɛ gbe mɛ; ejakaa a po ye nya yaka gu; se imi lɛɛ o mlaa amɛ a he pɛ ma susu.
79 Ha nɛ nihi tsuo nɛ suɔ mo nɛ ɔ a ba ye ngɔ, konɛ a ba kase o mlaa amɛ.
80 Ha nɛ ma ye o mlaa amɛ a nɔ sisiisi, konɛ zo ko gbe mi!
Ba kpɔ mi
81 Yawɛ, i hyɛ mo blɔ hluu kaa o ma ba kpɔ mi, nɛ pɔ tɔ mi jehanɛ; se i ngɔ ye hɛ kɛ fɔ o siwo ɔ nɔ.
82 Ye hɛngmɛ tlɔ blɔ; i hyɛ blɔ hluu kaa o maa ye o siwo ɔ nɔ lo. Lɔ ɔ he ɔ, i ngɛ bie ke, “Mɛni be po nɛ o ma ha ye bua maa jɔ?”
83 Ejakaa ye he be se nami hu kaa wai tɔ nɛ a je se; se kɛ̃ ɔ, ye hɛ ji o mlaa amɛ a nɔ.
84 Mɛni be o tsɔlɔ ɔ ma pa to e tsui si kɛ ya su? Nihi nɛ ngɛ mi yi mi wae ɔ, mɛni be po o maa gbla a tue ha mi?
85 Nihi nɛ woɔ a he nɔ tsua muɔhi kɛ tsɔ mi klama, konɛ a nine nɛ su ye nɔ.
86 A ngɛ lakpa toe kɛ ngɛ mi yi mi wae gu. Se o mlaa amɛ maa si kpɛii, lɔ ɔ he ɔ, ba he mi!
87 E piɛ nguɛ nya nɛ a ko gbe nya ha mi ngɛ je ɔ mi; se kɛ ɔ, i kua we o mlaa amɛ.
88 O naa mɔbɔ; he ye yi wami, konɛ ma ye o mlaa amɛ a nɔ.
Wo hɛ kɛ fɔ Yawɛ mlaa a nɔ
89 Yawɛ, o munyu ɔ maa hi si daa; e ngɛ kɛ yaa neneene ngɛ hiɔwe lokoo.
90 O we anɔkuale yemi maa gblee yi nɔhi tsuo a mi. Mo lɛ o ngɔ zugba a kɛ ma si nɛ e maa si kpɛii nɛ ɔ nɛ.
91 Níhi tsuo ngɛ kaa bɔ nɛ o fa mɛ ɔ kɛ ba su mwɔnɛ ɔ, ejakaa o tsɔli ji mɛ tsuo.
92 Ke pi o mlaa a nɛ haa mi bua jɔmi ɔ, jinɛ ye hɛ mi kpata momo ngɛ ye amanehlu ɔ mi.
93 Ye hɛ be o mlaa amɛ a nɔ jee gblegbleegble, ejakaa a nɔ o gu kɛ he ye yi wami.
94 O nɔ́ ji mi, he ye yi wami; ejakaa i bɔ mɔde kaa ma ye o mlaa amɛ a nɔ.
95 Yiwutsosɛmɛ woɔ mi ka nɛ a kpata ye hɛ mi; se imi lɛɛ o mlaa amɛ a he mohu i susuɔ.
96 I na le kaa sé ngɛ nɔ́ tsuaa nɔ́ he, se o mlaa a lɛɛ tɔmi ko kulaa be he.
I suɔ Yawɛ mlaa a
97 I suɔ o mlaa a kaa nɔ́ ko! Ke je na kikɛ nɛ ɔ, e he pɛ i susuɔ.
98 I le ní pe ye he nyɛli tsuo, ejakaa o mlaa a kɛ mi ngɛ daa.
99 I nuɔ nɔ́ sisi pe ye tsɔɔli ɔmɛ tsuo, ejakaa o mlaa amɛ a he i susuɔ.
100 I kɔɔ munyu se pe nikɔtɔmahi po; ejakaa i yeɔ o mlaa amɛ a nɔ.
101 I kpa je mi bami yayami ɔmɛ tsuo; ejakaa i suɔ kaa ma ye o mlaa amɛ a nɔ.
102 I ji o munyu ɔmɛ a he; ejakaa mo lɛ o tsɔɔ mi ní.
103 O mlaa a ngɔɔ loo! E ngɔɔ pe hwo tete po.
104 O mlaa a jeɔ nile ha mi, lɔ ɔ he ɔ, i hiee je mi bami yaya.
Yawɛ mlaa a ji la
105 O munyu ɔ ji kane nɛ i kɛ hyɛɔ ye nane nya; o munyu ɔ ji la nɛ haa ye blɔ mi tɛ̃ɔ.
106 O mlaa amɛ da saminya, lɔ ɔ he ɔ, imi hu i ngɛ mo si woe veveeve ke ma ye a nɔ sisiisi.
107 Yawɛ, mo he ye yi wami kaa bɔ nɛ o wo si ɔ, se ye we amanehlu ɔ nya wa nitsɛnitsɛ.
108 Yawɛ, mo he ye bɔ nɛ i kɛ ngɛ mo si nae ɔ, nɛ o tsɔɔ mi o mlaa amɛ.
109 I dla ye he kɛ to ha gbenɔ be tsuaa be, se kɛ̃ ɔ, i je we ye hɛ kɛ ji o mlaa a he.
110 Yiwutsotsɛmɛ tsɔɔ mi klama mohu, se i tɔ̃ we o mlaa amɛ a nɔ.
111 O mlaa amɛ ji ye weto ní kɛ yaa neneene. O mlaa amɛ haa ye tsui nɔɔ ye mi fuaa.
112 I to ye yi mi kaa ma ye o mlaa amɛ a nɔ daa; ma ye a nɔ kɛ yaa si ye gbenɔ ligbi.
Yawɛ mlaa a baa nɔ yi
113 Nihi nɛ suɔ mo fa kɛ fa a, i sume mɛ; i suɔ o mlaa amɛ mohu.
114 Mo ji ye he bulɔ, kɛ ye yi baalɔ; i ngɔ ye hɛ kɛ fɔ o siwo ɔ nɔ.
115 Nyɛ yayami peeli, nyɛɛ je ye nɔ kɛ ya se! Ye Mawu ɔ mlaa amɛ a nɔ ma ye.
116 Wo mi he wami kaa bɔ nɛ o wo mi si ɔ; ha nɛ ye yi nɛ na wami. I ngɔ ye hɛ kɛ fɔ o nɔ kulaa; koo gbe mi zo.
117 Pɛtɛ ye he, konɛ ye yi nɛ na wami, nɛ ye hɛ maa hi o mlaa amɛ a nɔ daa.
118 Nihi tsuo nɛ yi o mlaa amɛ a nɔ ɔ, niinɛ, o bui a he akɔtaa; ga yayahi nɛ a kɛ sisiɔ nɔ ɔ peeɔ yaka.
119 Yiwutsotsɛmɛ tsuo nɛ ngɛ je mi ɔ, o buu mɛ kaa kuku nɔ dade. Lɔ ɔ he ɔ, o mlaa amɛ pɛ lɛ i suɔ.
120 O he sawale nu mi, nɛ ye he ngɛ doe blibliibli; ejakaa o kojomi ɔmɛ ngɛ gbeye.
Bu Yawɛ mlaa a tue
121 Nɔ́ nɛ da, kɛ nɔ́ nɛ sa lɛ i peeɔ, lɔ ɔ he ɔ, koo ngmɛɛ ye he ha nihi nɛ ngɛ mi yi mi wae ɔ.
122 Moo da mi ha o tsɔlɔ ɔ, nɛ e hi ha lɛ. Ko ha nɛ he nɔ woli nɛ wa mi yi mi.
123 I hyɛ blɔ hluu kaa o ma ba he ye yi wami, kaa o maa ye o siwo ɔ nɔ; se jehanɛ ye hɛ se gbo.
124 Mo nɛ o suɔmi be nyagbe, naa imi, o tsɔlɔ ɔ mɔbɔ, nɛ o tsɔɔ mi o mlaa amɛ.
125 O tsɔlɔ ji mi, ha mi nile, konɛ ma nu o mlaa amɛ a sisi.
126 Yawɛ, nihi ngɛ o mlaa a tɔ̃e; be su nɛ o maa pee he nɔ́ ko.
127 Imi lɛɛ i suɔ o mlaa amɛ pe sika tsu, ee, pe sika tsu ngmingmiingmi.
128 Lɔ ɔ he ɔ, i buɔ o mlaa amɛ tsuo, se blɔhi nɛ dɛ ɔ lɛɛ i sume.
Ye Yawɛ mlaa a nɔ
129 O mlaa amɛ ngɛ nyakpɛ; lɔ ɔ he ɔ, i yeɔ a nɔ kɛ ye tsui tsuo.
130 Ke a tsɔɔ o mlaa a sisi ɔ, e ngɛ kaa la, nɛ e haa kuasia po leɔ ní.
131 I paa ye nya mi hatoo kaa nɔ nɛ nɔ́ ko ngɛ lɛ jloe kɛ hyɛɛ o mlaa amɛ blɔ.
132 Mo plɛ nɛ o hyɛ mi nɛ o na mi mɔbɔ kaa bɔ nɛ o peeɔ kɛ haa nihi tsuo nɛ suɔ mo ɔ.
133 Moo ye o siwo ɔ nɔ; ko ha nɛ ma nɔ si; ko ha nɛ yayami nɛ ye ye nɔ.
134 Mo kpɔ mi kɛ je nihi nɛ waa mi yi mi ɔ a dɛ mi, konɛ ma ye o mlaa a nɔ.
135 Mo je o he si, nɛ o na imi, o tsɔlɔ ɔ mɔbɔ, nɛ o tsɔɔ mi o mlaa amɛ.
136 Ye hɛngmɛ tslaa nyu babaaba kaa pa nɛ ngɛ bee, ejakaa nimli adesahi yi o mlaa amɛ a nɔ.
Yawɛ mlaa a da
137 Yawɛ, dalɔ ji mo, nɛ o mlaa amɛ hu da pɛpɛɛpɛ!
138 Mlaa amɛ nɛ o wo ɔ, a da, anɔkuale sɔuu.
139 Ye mi mi ngɛ mi sããe kaa la, ejakaa ye he nyɛli ɔmɛ bui o mlaa amɛ.
140 Ke o wo si ɔ, o yeɔ nɔ sisiisi; lɔ ɔ he ɔ, imi, o tsɔlɔ ɔ, i suɔ o siwo ɔ tsɔ!
141 Imi lɛɛ nɔ wayoo nɛ a bui ha nɔ́ ko nɔ́ ko ji mi, se ye hɛ ji o mlaa amɛ a nɔ.
142 Dalɔ ji mo, nɛ ja o ngɛ kɛ yaa neneene; o mlaa a, anɔkuale sɔuu.
143 Ke i ngɛ haomi mi, nɛ i ngɛ kɔmɔ yee ɔ, o mlaa amɛ lɛɛ a haa nɛ ye bua jɔɔ saminya.
144 O mlaa amɛ da kɛ yaa neneene. Ha mi juɛmi nɛ kɔɔ nɔ́ se, bɔ nɛ pee nɛ ye yi nɛ na wami.
Ba he ye yi wami
145 I ngɛ ngmlaa kpae kɛ ngɛ mo tsɛe kɛ ye tsui tsuo. Yawɛ, mo ha nɛ ma ye o mlaa amɛ a nɔ.
146 Mo i ngɛ tsɛe ɔ nɛ; mo he ye yi wami, nɛ ma ye o mlaa amɛ a nɔ.
147 I teɔ si makɛ mla, nɛ i kpaa ngmlaa kɛ tsɛɔ mo ke o ba piɛ ye he. I ngɔ ye hɛ kɛ fɔ o siwo ɔ nɔ.
148 Nyɔ mi tsuo i hwɔ we mahe; o siwo ɔ he i hii susue.
149 Bu ye gbi tue koo; ejakaa o suɔmi ɔ be nyagbe. Yawɛ, moo lɛɛ nɔ́ nɛ da pɛ o peeɔ; naa mi mɔbɔ, nɛ o baa ye yi.
150 Nihi nɛ ngɛ mi yi mi wae nɛ bui o mlaa a, a ngɛ hɛe kɛ ngɛ ye he sue.
151 Se Yawɛ, o ngɛ ye kasa nya haa, nɛ o mlaa amɛ tsuo maa si kpɛii.
152 I le kɛ je blema lokoo kaa o wo mlaa amɛ nɛ a hi si kɛ ya neneene.
Ba piɛ ye he
153 Hyɛ amanehlu nɛ i ngɛ nae nɛ ɔ, nɛ o ba je mi kɛ je mi, ejakaa ye hɛ ji o mlaa a nɔ.
154 Ba ye ye sane ɔ ha mi, nɛ o kpɔ mi. He ye yi wami kaa bɔ nɛ o wo si ɔ.
155 A be yiwutsotsɛmɛ a yi wami hee; ejakaa a bui o mlaa amɛ.
156 Se Yawɛ, mo nɛ o naa mɔbɔ babauu, nɛ o peeɔ nɔ́ nɛ da; mo he ye yi wami.
157 Nihi nɛ waa mi yi mi, kɛ ye he nyɛli ɔmɛ a he hiɛ babauu, se kɛ̃ ɔ, ye hɛ ji o mlaa a nɔ.
158 Ke i na nihi nɛ yi mo anɔkuale kikɛ nɛ ɔ, a he peeɔ mi tãi; ejakaa a yi o mlaa amɛ a nɔ.
159 Yawɛ, i suɔ o mlaa amɛ kaa nɔ́ ko! O suɔmi nɛ ngɛ daa a he ɔ, mo he ye yi wami.
160 O munyu ɔ tsuo, anɔkuale sisiisi; o mlaa amɛ da, nɛ eko tsuaa eko maa si kpɛii kɛ yaa neneene.
I suɔ Yawɛ mlaa a kɛ ye tsui tsuo
161 Ganɔhi waa mi yi mi yaka, se kɛ̃ ɔ, i buɔ o mlaa amɛ.
162 O munyu ɔ ngɔɔ ye nya. Ye bua jɔɔ kaa nɔ ko nɛ e nine ya su ta yibu ní nɛ he jua wa nɔ.
163 I sume lakpa kulaa, i hiee lɛ; se o mlaa lɛɛ i suɔ.
164 I jeɔ o yi si kpaago daa ligbi, ejakaa o mlaa amɛ da.
165 Nihi nɛ suɔ o mlaa amɛ ɔ, a naa he jɔmi nitsɛnitsɛ, nɛ nɔ́ ko nɔ́ ko be hae nɛ a maa tla blɔ.
166 Yawɛ, mo o nɔ ye hɛ ngɛ, ba he ye yi wami; i peeɔ níhi nɛ o mlaa a tsɔɔ ɔ.
167 I yeɔ o mlaa amɛ a nɔ pɛpɛɛpɛ; i suɔ o mlaa amɛ kɛ ye tsui tsuo.
168 I yeɔ o mlaa amɛ, kɛ blɔ nya tomi ɔmɛ tsuo a nɔ; o le ye yami kɛ bami mi fitsofitso.
Ba piɛ ye he
169 Yawɛ, ngmlaa nɛ i ngɛ kpae kɛ ngɛ mo tsɛe ɔ, bu tue koo! Ha nɛ ma nu nɔ́ sisi kaa bɔ nɛ o wo si ɔ!
170 Moo bu ye kue fami ɔ tue nɛ o ba kpɔ mi kaa bɔ nɛ o wo si ɔ!
171 Ma je o yi daa; ejakaa o tsɔɔ mi o mlaa amɛ.
172 Ma la o mlaa a he la; ejakaa o mlaa amɛ tsuo da saminya.
173 Pee klaalo nɛ o ba piɛ ye he; ejakaa i yeɔ o mlaa amɛ a nɔ.
174 Yawɛ, i ngɛ mo blɔ hyɛe; ba he ye yi wami koo! O mlaa a pɛ lɛ haa ye bua jɔɔ ye he.
175 Ha nɛ ye yi nɛ na wami, konɛ ma je o yi; ha nɛ o mlaa amɛ nɛ a tsɔɔ mi blɔ.
176 I ngɛ lalaalo woe kaa to nɛ laa; mo hla imi, o tsɔlɔ ɔ koo! Ejakaa i je we ye hɛ ngɛ o mlaa amɛ a nɔ.