Kunimi yemi he sina
1 ⓟ Nyɛɛ na Yawɛ si; ejakaa e hi, nɛ e suɔmi ɔ ngɛ kɛ yaa neneene.
2 Israel ma a nɛ de ke, “E suɔmi ɔ ngɛ kɛ yaa neneene.”
3 Israel osɔfo ɔmɛ nɛ a de ke, “E suɔmi ɔ ngɛ kɛ yaa neneene.”
4 Nihi nɛ yeɔ Yawɛ gbeye ɔ, a de ke, “E suɔmi ɔ ngɛ kɛ yaa neneene.”
5 Benɛ i ngɛ amanehlu mi ɔ, i tsɛ Yawɛ; Yawɛ he mi nɔ, nɛ e je mi.
6 ⓠ Nɛ Yawɛ kɛ mi ngɛ nɛ ɔ, i yi gbeye; mɛni adesa ma nyɛ maa pee mi.
7 Yawɛ kɛ mi ngɛ. Lɛ nɔuu lɛ e maa piɛ ye he. Nihi nɛ sume mi ɔ, ye hɛngmɛ kɛkɛ ma kɛ na kaa i ye a nɔ kunimi momo.
8 E hi kaa o sa we ngɛ Yawɛ ngɔ, pe nɔ́ nɛ o maa ngɔ o hɛ kɛ fɔ nɔmlɔ nɔ.
9 E hi kaa o sa we ngɛ Yawɛ ngɔ, pe nɔ́ nɛ o maa ngɔ o hɛ kɛ fɔ ganɔhi a nɔ.
10 He nyɛli babauu ba bɔle mi kɛ kpe; se ngɛ Yawɛ he wami nya a, i kpata a hɛ mi!
11 A bɔle mi kɛ kpe; a sa ye yi, se ngɛ Yawɛ he wami nya a, i kpata a hɛ mi!
12 A buble mi kaa hwo; se a ngla kaa mio tso mi la. Yawɛ he wami nya a, i kpata a hɛ mi!
13 A ba tua mi kɛ hɛdɔ, nɛ a miɔ nɛ a maa ye ye nɔ, se Yawɛ piɛ ye he.
14 ⓡ Yawɛ lɛ woɔ mi he wami; ma la kɛ je e yi, ejakaa e he ye yi wami.
15 Nyɛɛ bu tue, kunimi la ngɛ pɛe ngɛ dali ɔmɛ a bo tsu ɔmɛ a mi ke, “Yawɛ kɛ e he wami kpetekpleenyɛ ɔ tsu ní nguanguahi!
16 Yawɛ nine ho hiɔwe ya; Yawɛ kɛ e hɛ mi nyami kpetekpleenyɛ ɔ tsu ní nguanguahi!”
17 I be gboe, se mohu ma hi je mi, nɛ ma jaje níhi nɛ Yawɛ pee ɔ kɛ tsɔɔ.
18 Yawɛ gbla ye tue wawɛɛ mohu, se e ha we nɛ ma gbo.
19 Nyɛ bli Yawɛ we ɔ agbo[3] ɔmɛ ha mi; ma sɛ mi nɛ ma ya na Yawɛ si!
20 Yawɛ we agbo ɔ ji nɛ ɔ nɛ; nihi nɛ peeɔ nɔ́ nɛ da a, mɛ pɛ nɛ a maa sɛ mi.
21 Yawɛ, o nɔ́ ji sina; ejakaa o bu mi tue, nɛ o he ye yi wami.
22 ⓢ Tɛ ɔ nɛ tsu fiali ɔmɛ sake fɔ he ɔ, lɔ ɔ nɔuu ba pee kɔ nya tɛ. ⓣ
23 Yawɛ dɛ mi enɛ ɔ je; hyɛ bɔ nɛ e ngɛ nyakpɛ ha!
24 Yawɛ kunimi yemi ligbi ji mwɔnɛ ɔ; nyɛ ha nɛ wa nya, nɛ wa na bua jɔmi.
25 ⓤ Yawɛ, wa kpa mo pɛɛ, he wa yi wami koo! Yawɛ, wa kpa mo pɛɛ, ha nɛ waa ye kunimi koo!
26 ⓥ A gbaa nɔ nɛ ma ngɛ Yawɛ biɛ mi ɔ! Wa ngɛ mo gbae kɛ je Yawɛ we ɔ.
27 Yawɛ ji Mawu; e ha wɔ la. Nyɛɛ hɛɛ tã kuɔmi ngɛ nyɛ dɛ, nɛ nyɛɛ bɔ sala kɛ ya bɔle bɔ sami la tɛ ɔ koli ɔmɛ.
28 Mo ji ye Mawu; ma na mo si. Mo ji ye Mawu; ma wo o hɛ mi nyami.
29 Nyɛɛ na Yawɛ si; ejakaa e mi mi hi, nɛ e suɔmi ɔ ngɛ daa.