La 110

Yawɛ kɛ matsɛ nɛ e hla a

1 ⓔ Yawɛ de ye nyɔmtsɛ ɔ ke, “Hii si ngɛ ye hiɔ nɔ kɛ yaa si be nɛ ma ngɔ o he nyɛli ɔmɛ kɛ pee nɔ́ nɛ o kɛ o nane maa nɔ.”

2 Yawɛ ma ha mo he wami kpetekpleenyɛ kɛ je Zion. E ma de mo ke, “Ye o he nyɛli ɔmɛ a nɔ.”

3 Ligbi ɔ nɛ o maa hia ta kɛ wo o he nyɛli ɔmɛ ɔ, o ma mi bi ɔmɛ maa ngɔ a he kɛ ha ngɛ mɛ nitsɛmɛ a suɔmi nya. Nihewi babauu ma ba pue si ngɛ yo klɔuklɔu ɔmɛ a nɔ kaa makɛ bɔ́.

4 ⓕ Yawɛ ka kita nɛ ɔ, nɛ e be e nya se kpalee, “Osɔfo ji mo kɛ yaa neneene kaa Melkizedek pɛ.”

5 Nyɔmtsɛ ɔ ngɛ o hiɔ nɔ; ligbi ɔ nɛ e mi mi maa wo la a, e ma kpata matsɛmɛ ɔmɛ a hɛ mi.

6 E maa gbla je ma amɛ a tue; nɛ ma amɛ a mi ma hyi tɔ kɛ ni gbogboehi. E ma kpata matsɛmɛ ɔmɛ a hɛ mi ngɛ je ɔ mi tsuo.

7 Matsɛ ɔ maa nu pa nɛ ngɛ blɔ ɔ he ɔ mi nyu, lɔ ɔ maa wo lɛ he wami, nɛ e maa ye kunimi.