Mawu, jé mi kɛ je he nyɛli a dɛ mi
(<x>230 57:7-11</x>; <x>230 60:5-12</x>)
1 Mawu, i ngɔ ye hɛ kɛ fɔ mo pɛ o nɔ; ma la kɛ je ye tsui mi kɛ je o yi.
2 Makɛ mla a, ma te si nɛ ma fia saku kɛ je o yi.
3 Nyɔmtsɛ, ma na mo si ngɛ je ma amɛ a hɛ mi; ma la kɛ je o yi ngɛ je ma amɛ a hɛ mi.
4 Ejakaa o suɔmi nɛ ngɛ daa a kle kɛ su hiɔwe lokoo, nɛ o we anɔkuale yemi ya su bɔku mi tɔɔ.
5 Mawu, ha nɛ o he wami kpetekpleenyɛ ɔ nɛ je kpo ngɛ hiɔwe lokoo ɔ, konɛ a na o hɛ mi nyami ɔ ngɛ je ɔ mi tsuo.
6 Ngɔɔ o he wami kpetekpleenyɛ ɔ kɛ he wa yi wami. Bu wa kue fami ɔ tue, ejakaa mo nitsɛ o ma nɛ o suɔ lɛ ji wɔ.
7 Mawu de ngɛ e he klɔuklɔu ɔ ke, “Ma hwɔ lele kɛ gba Shekem mi, nɛ ma dla Sukot kɔ̃ ɔ mi kɛ ha ye ma a.
8 Ye mahi ji Gilead kɛ Manase. Efraim ji ye dade pɛɛ, nɛ Yuda ji ye matsɛ tso.
9 Moab ji ye hedu buɛ. Ma sake ye tokota kɛ pue Edom nɔ kɛ tsɔɔ kaa a ye e nɔ. Ma he ose kɛ ye Filistia nɔ kunimi.”
10 Mɛnɔ maa ngɔ mi kɛ ya ma nɛ a fia gbogbo kɛ wo he ɔ mi? Mɛnɔ ma ya sɛ mi Edom?
11 Mawu, anɛ pi mo nɛ o kua wɔ ɔ lo? Mawu, o kɛ wa tabo ɔ tsa yɛ ta!
12 Piɛ wa he, konɛ waa kɛ he nyɛlɔ ɔ nɛ to ní. Ejakaa nɔmlɔ adesa he wami pi nɔ́ ko!
13 Nɛ́ Mawu kɛ wɔ ngɛ nɛ ɔ, wa maa ye kunimi. Lɛ ji nɔ nɛ maa ye wa he nyɛli ɔmɛ a nɔ ha wɔ.