WOMI ENUƆNE
(<x>230 107-150</x>)
A je Mawu yi, ejakaa e hi
1 ⓑ “Nyɛɛ na Yawɛ si, ejakaa e hi, nɛ e suɔmi ɔ ngɛ kɛ yaa neneene!”
2 Nyɛ nihi tsuo nɛ Yawɛ he nyɛ yi wami, nɛ e kpɔ nyɛ kɛ je nyɛ he nyɛli a dɛ mi ɔ, nyɛɛ hi enɛ ɔ dee kpamisa, nɛ nyɛ kɛ je e yi.
3 E ngɔ nyɛ kɛ je ma se kɛ ba kɛ je beleku je, kɛ bonyoku je, kɛ je omleyi je, kɛ leneyi je.
4 Ni komɛ wo lalaalo ngɛ nga kplanaa nɔ; a nɛ blɔ ko blɔ ko nɛ a kɛ ya ma a mi nɛ a ya hi lejɛ ɔ.
5 Hwɔ ye mɛ, nɛ kuma ye mɛ hluu kɛ ya si a mumu nya ta.
6 Kɛkɛ nɛ a kpa ngmlaa kɛ tsɛ Yawɛ, nɛ e je mɛ kɛ je a haomi ɔ mi.
7 E ngɔ mɛ kɛ gu blɔ tlɔmɔɔ nɔ hluu kɛ ya su ma ko mi he nɛ a maa hi.
8 E sa kaa nimli nɛ ɔmɛ nɛ a na Yawɛ si; ejakaa e tsu nyakpɛ níhi ha mɛ; e suɔmi ɔ ngɛ daa.
9 Nihi nɛ kuma ye mɛ ɔ, e ha mɛ nyu nɛ a nu; ni nɛmɛ nɛ hwɔ ye mɛ ɔ, e ha mɛ ní nɛ a ye nɛ a tɔ.
10 Ni komɛ hi si ngɛ diblii, kɛ mɔbɔ si himi mi; a wo mɛ tsu; a kpla mɛ kɔsɔkɔsɔ, nɛ a na nɔ́;
11 ejakaa a tsɔ Hiɔwe No Mawu ɔ hɛ mi atuã, nɛ a bui e munyu, kɛ e ga womi ɔmɛ fɛɛ.
12 A tsu ní kpakpataa hluu kɛ ya si pɔ tɔ mɛ. Ke a nɔ si ɔ, nɔ ko be nɛ woɔ a nɔ.
13 Kɛkɛ nɛ a kpa ngmlaa kɛ tsɛ Yawɛ, nɛ e je mɛ kɛ je a haomi ɔ mi.
14 E je mɛ kɛ je diblii, kɛ mɔbɔ si himi ɔ mi, nɛ e kplɔ kɔsɔkɔsɔ ɔmɛ ngɛ a he ngɔ pue si.
15 E sa kaa nimli nɛ ɔmɛ nɛ a na Yawɛ si, ejakaa e tsu nyakpɛ níhi ha mɛ; e suɔmi ɔ ngɛ daa.
16 E ku akɔblee agbo ɔmɛ, nɛ e poo agbo se lami dade ɔmɛ a mi.
17 Ni komɛ ya je kuasia, nɛ a blɔ yayami ɔmɛ, kɛ yayamihi nɛ a pee ɔ ha nɛ a na nɔ́.
18 Niye ní ko niye ní ko pee we mɛ akɔnɔ; a su gbenɔ muɔ nya haa.
19 Kɛkɛ nɛ a kpa ngmlaa kɛ tsɛ Yawɛ, nɛ e je mɛ kɛ je a haomi ɔ mi.
20 E ngɔ e munyu ɔ kɛ tsa mɛ. E je mɛ kɛ je hɛ mi kpatami nɛ ko ba a nɔ ɔ mi.
21 E sa kaa nimli nɛ ɔmɛ nɛ a na Yawɛ si, ejakaa e tsu nyakpɛ níhi ha mɛ; e suɔmi ɔ ngɛ daa.
22 E sa kaa a sã bɔhi kɛ na lɛ si; a kɛ bua jɔmi nɛ la nyami la kɛ gba níhi nɛ e tsu ɔ.
23 Nihi kɛ lɛ ye jua ngɛ wo hɛ mi, nɛ a kɛ na a nya mi ngma.
24 A na níhi nɛ Yawɛ tsu; a na nyakpɛ níhi nɛ e tsu ngɛ wo ɔ nɔ ɔ.
25 E fa nɛ ahumi fia, nɛ wo oslɔkehi te si.
26 Oslɔke ɔmɛ wo lɛ ɔmɛ a nɔ kɛ ya hiɔwe kɛ ba si, kɛ ya wo ɔ sisi tɔɔ. Haomi nɛ ba a nɔ ngɛ lɛ ɔ mi ɔ ha a kã nya ta.
27 Nɛ e pee ja a, a ngɛ kpae, nɛ a ngɛ si tɛe kaa dã deli, nɛ a pa li bɔ nɛ a maa pee hu.
28 Kɛkɛ nɛ a kpa ngmlaa kɛ tsɛ Yawɛ, nɛ e je mɛ kɛ je a haomi ɔ mi.
29 E tsi ahumi ɔ nya nɛ e kpa fiami; oslɔke ɔmɛ a he jɔ, nɛ wo ɔ ngmɛ dii.
30 Ni ɔmɛ a bua jɔ a he jehanɛ, ejakaa nɔ́ tsuaa nɔ́ nya ba si. Yawɛ kɛ mɛ ba su lɛsimuɔ he ɔ nɛ a yaa a fiafiaafia.
31 E sa kaa nimli nɛ ɔmɛ nɛ a na Yawɛ si, ejakaa e tsu nyakpɛ níhi ha mɛ; e suɔmi ɔ ngɛ daa.
32 A je e yi; ma kpekpemi ɔ tsuo nɛ je e yi; á je e yi ngɛ ma nimeli a kpe ɔ mi hulɔ.
33 Yawɛ ha pahi mii kulaa, nɛ nyu hɛngmɛhi tsi, nɛ a bɛ hu.
34 Zugba nɛ baa ní saminya a plɛ pee ngo zɔ zugba; ejakaa nihi nɛ hi lejɛ ɔ, yayami sɔuu a pee.
35 Yawɛ ha nga kplanaa plɛ pee taku kɛ e mi nyu babaaba; nɛ zugba gbigbli plɛ pee he nɛ nyu hɛngmɛhi hia si ngɛ.
36 Ni nɛmɛ nɛ hwɔ ye mɛ ɔ, e ha a to si ngɛ lejɛ ɔ; nɛ a po ma, nɛ a hi lejɛ ɔ.
37 A hu zugba a, nɛ a du wai yiblii ngɛ nɔ; nɛ a kpa ní babauu.
38 Yawɛ gbaa e ma a; e ha nɛ a he ba hiɛ babauu nitsɛ; a lohwehi hu e ha we nɛ a nɔ nɛ gbɔ́.
39 Benɛ a he nyɛli ba ye Mawu ma a nɔ, nɛ a wa mɛ yi mi, nɛ a pee mɛ nisɛ ní babauu ɔ,
40 Mawu hu kɛ a ganɔ ɔmɛ to ní saminya, nɛ e ha nɛ a ya wo lalaalo ngɛ nga kplanaa nɔ he nɛ blɔ ko blɔ ko be.
41 Se nihi nɛ e fi mɛ ɔ, e je mɛ kɛ je a haomihi a mi; nɛ e ha a ngmɛdu he ba hiɛ babauu kaa tohi.
42 Nihi nɛ peeɔ nɔ nɛ da a naa nɔ́ nɛ ɔ, nɛ a bua jɔɔ he; se yayami peeli lɛɛ a maa a nya.
43 Nɔ nɛ ji ní lelɔ ɔ, e susu ní nɛ ɔmɛ a he. Nihi tsuo nɛ a susu Yawɛ suɔmi nɛ ngɛ daa a he.