Mose II, 8

Ovɔnɔ ba zugba a nɔ

1 Lɔ ɔ se ɔ, Yawɛ de Mose ke, “Yaa Farao ɔ ngɔ nɛ o ya de lɛ ke Yawɛ ke, ‘Ha ye ma a nɛ ho nɛ a ya ja mi.

2 Ke o kplɛɛ we nɛ a ho ɔ, ma ha ovɔnɔhi maa ba o zugba nɛ ɔ tsuo nɔ kɛ gbla nyɛ tue.

3 Nilo pa a maa wo ovɔnɔhi fuu, nɛ ovɔnɔ ɔmɛ maa sɛ he tsuaa he. A maa sɛ o we mi; a maa sɛ o se tsu mi, nɛ o sa nitsɛ po a maa kuɔ. Jehanɛ a maa sɛ o tsɔli ɔmɛ kɛ o ma mi bi ɔmɛ a wehi a mi; a maa sɛ o flɔɔnɔɔhi kɛ o ní hoomi níhi a mi.

4 Ovɔnɔ ɔmɛ maa tuu kɛ mla mo nitsɛ, o we mi bi ɔmɛ, kɛ o tsɔli ɔmɛ tsuo pɛpɛɛpɛ.’ ”

5 Yawɛ de Mose ke, “Mo de Aaron ke e wo e tso ɔ nɔ ngɛ pa amɛ, kɛ nyu dɔ ɔmɛ, kɛ taku ɔmɛ a nɔ, nɛ́ e ha ovɔnɔhi nɛ ba Egipt zugba a nɔ.”

6 Aaron wo e nine nɔ ngɛ Egipt pa amɛ a nɔ, nɛ e ha ovɔnɔhi ba nɛ a ba ha Egipt zugba a nɔ.

7 Se Egipt wɔnɔ ɔmɛ hu gu a ga blɔ ɔmɛ a nɔ kɛ pee ja nɔuu, nɛ a ha ovɔnɔhi fuu ba Egipt zugba a nɔ.

8 Kɛkɛ nɛ Farao ɔ, tsɛ Mose kɛ Aaron nɛ e de mɛ ke, “Nyɛ kpa Yawɛ pɛɛ nɛ e je ovɔnɔ ɔmɛ kɛ je i kɛ ye ma mi bi ɔmɛ wa nɔ, konɛ ma ha nyɛ we bi ɔmɛ nɛ a ho nɛ a ya sã bɔ ha Yawɛ.”

9 Mose de Farao ɔ ke, “Moo lɛɛ e je o nya nɛ o de kɛkɛ kaa be nɛ ɔ mi ɔ, ma kpa pɛɛ ha mo, kɛ o ma mi bi ɔmɛ, kɛkɛ a maa gbe ovɔnɔ ɔmɛ nɛ a be eko nae ngɛ he ko, ja Nilo pa a mi pɛ.”

10 Farao ɔ de lɛ ke, “Hwɔɔ nɛ o sɔle ha mi.” Mose de lɛ ke, “Ma pee kaa bɔ nɛ o bi ɔ, konɛ o na nɛ o le kaa nɔ ko nɔ ko be nɛ ngɛ kaa Yawɛ, wa Mawu ɔ.

11 Ovɔnɔ ɔmɛ maa ta zugba a nɔ he tsuaa he pɛsɛpɛsɛ, ja Nilo pa a mi pɛ.”

12 Nɛ Mose kɛ Aaron je Farao ɔ ngɔ. Enɛ ɔ se ɔ, Mose wo e gbi nɔ nɛ e fa kue ha Yawɛ ngɛ ovɔnɔ ɔmɛ a he kaa bɔ nɛ e kɛ Farao ɔ tu ɔ.

13 Kɛkɛ nɛ Yawɛ pee kaa bɔ nɛ Mose bi ɔ; nɛ ovɔnɔhi nɛ ngɛ we ɔmɛ a mi, kɛ kpo ɔmɛ a nɔ, kɛ nga a nɔ tsuo gbo.

14 Nɛ a bua a nya glekugleku ngɔ pue si, nɛ zugba a nɔ je fu.

15 Se benɛ Farao ɔ na mumi wo he bɔɔ ɔ, e kplii e tsui ekohu, nɛ kaa bɔ nɛ Yawɛ de ɔ, e bui mɛ tue.

Pwɔmihi ba

16 Kɛkɛ nɛ Yawɛ de Mose ke, “De Aaron nɛ e ngɔ e tso ɔ kɛ fia tabo zu ɔ nɔ, nɛ tabo zu ɔ ma plɛ pee pwɔmi ngɛ Egipt zugba a tsuo nɔ.”

17 Aaron ngɔ e tso ɔ kɛ fia tabo zu ɔ nɔ, kɛkɛ nɛ tabo zu ɔ tsuo plɛ pee pwɔmi nɛ bɔni nimli, kɛ lohwehi tsuo bublemi ngɛ Egipt zugba a nɔ tsuo.

18 Pwɔmi ɔmɛ ha nɔ tsuaa nɔ. Wɔnɔ ɔmɛ ka kaa mɛ hu a maa gu a ga blɔ ɔmɛ a nɔ kɛ ha pwɔmihi nɛ ba lo; se a nyɛ we.

19 ⓤ Kɛkɛ nɛ wɔnɔ ɔmɛ de Farao ɔ ke, “Mawu nɔ́ peepee ji nɛ ɔ nɛ.” Se kɛ̃ Farao ɔ kplii e tsui; nɛ kaa bɔ nɛ Yawɛ de ɔ, e bui mɛ tue.

Pwɔlwɛhi ba

20 Yawɛ de Mose ke, “Moo bu tue! Hwɔɔ mɔtu ɔ, Farao ɔ maa ya Nilo pa a nya. Yaa nɛ o kɛ lɛ ya kpe ngɛ lejɛ ɔ, nɛ o de lɛ ke bɔ nɛ Yawɛ de ji nɛ ɔ nɛ: ‘Ha ye ma a nɛ ho nɛ a ya ja mi.

21 Se ke o ha we nɛ ye ma a nɛ ya a, ma ha nɛ pwɔlwɛhi maa bungɔ mo, kɛ o tsɔli ɔmɛ, kɛ o ma mi bi ɔmɛ tsuo. Nɛ mo nitsɛ o we ɔ mi, Egipt bi ɔmɛ a we ɔmɛ a mi, kɛ nyɛ zugba a nɔ tsuo ma hyi kɛ pwɔlwɛhi.

22 Jamɛ a be ɔ mi ɔ, ma je Goshen zugba a, he nɛ ye ma a ngɛ ɔ kɛ je mi, nɛ pwɔlwɛhi be lejɛ ɔ yae, konɛ o le kaa i ngɛ ní tsue ngɛ zugba a nɔ.

23 Ma gba ye we bi ɔmɛ, kɛ o we bi ɔmɛ a kpɛti. Ma to okadi nɛ ɔ hwɔɔmɛ a je hwɔɔ.’ ”

24 Yawɛ pee ja, nɛ pwɔlwɛhi wo fuu ngɛ Farao ɔ we ɔ, kɛ e tsɔli ɔmɛ a we ɔmɛ a mi. Nɛ pwɔlwɛ ɔmɛ kpata Egipt zugba a tsuo hɛ mi.

25 Kɛkɛ nɛ Farao ɔ tsɛ Mose kɛ Aaron nɛ e de mɛ ke, “Nyɛɛ ya nɛ nyɛ ya sã bɔ ha nyɛ Mawu ɔ ngɛ zugba nɛ ɔ nɔ.”

26 Se Mose de Farao ɔ ke, “E be dae kaa waa pee ja, ejakaa níhi nɛ waa kɛ maa sã bɔ ha Yawɛ, wa Mawu ɔ, Egipt bi hiɔ. Ke wa ngɔ Egipt bi ɔmɛ a kɔ níhi kɛ sã bɔ ngɛ a hɛ mi ɔ nɛɛ, a be wɔ tɛ fiae lo?

27 Wa maa nyɛɛ ligbi etɛ blɔ kɛ ya nga a nɔ nɛ wa ya sã bɔ ha Yawɛ, wa Mawu ɔ, kaa bɔ nɛ e maa tsɔɔ ke waa pee ɔ.”

28 Kɛkɛ nɛ Farao ɔ de mɛ ke, “Yoo, ma ha nyɛ blɔ nɛ nyɛɛ ya nɛ nyɛ ya sã bɔ ha Yawɛ, nyɛ Mawu ɔ ngɛ nga a nɔ; se nyɛ ko ya tsitsaa. Jehanɛ hu, nyɛ kpa pɛɛ ha mi.”

29 Mose de lɛ ke, “Ke i je o ngɔ pɛ i yaa nɛ ma ya kpa Yawɛ pɛɛ, konɛ hwɔɔmɛ a je hwɔɔ ɔ, pwɔlwɛ ɔmɛ nɛ a jɔɔ mo, o tsɔli ɔmɛ, kɛ o ma mi bi ɔmɛ bungɔmi. Sisimi kɛkɛ nɛ Farao ɔ ko sisi wɔ hu kaa e maa tsi ma a nya nɛ a ko ya nɛ a ya sã bɔ ha Yawɛ.”

30 Mose je Farao ɔ ngɔ, nɛ e ho nɛ e ya sɔle ha Yawɛ.

31 Yawɛ hu pee kaa bɔ nɛ Mose bi lɛ ɔ, nɛ e hwu pwɔlwɛ ɔmɛ kɛ je Farao ɔ, kɛ e tsɔli ɔmɛ, kɛ e ma mi bi ɔmɛ a he; pwɔlwɛ kake ngmelu po píɛ.

32 Se Farao ɔ kplii e tsui ekohu, nɛ e ngmɛɛ we Israel bi ɔmɛ a he nɛ a ho.