Mose II, 7

1 Yawɛ de Mose ke, “O nɛ, i pee mo kaa Mawu ha Farao ɔ, nɛ o nyɛmi Aaron maa pee o gbalɔ.

2 O maa bɔ Aaron nɔ́ tsuaa nɔ́ nɛ ma de mo ɔ, nɛ o nyɛminyumu Aaron ma de Farao ɔ ke e ha nɛ Israel bi ɔmɛ nɛ a je e zugba a nɔ.

3 ⓢ Se ma kplii Farao ɔ tsui. Ma pee okadihi, kɛ nyakpɛ níhi babauu ngɛ Egipt zugba a nɔ, se Farao ɔ be nyɛ tue bue.

4 Enɛ ɔ se ɔ, ma nu Egipt kã nya, nɛ ma kpaka ye ma kpekpemi ɔ nɛ ji Israel bi ɔmɛ kɛ je Egipt zugba a nɔ; nɛ ma ye dami sane ha nyɛ.

5 Ke i pee ní nɛ ɔmɛ loko Egipt bi ɔmɛ maa le kaa imi ji Yawɛ.”

6 Mose kɛ Aaron bu Yawɛ tue, nɛ a pee kaa bɔ nɛ e de mɛ ke a pee ɔ.

7 Mose ye jeha nyingmi kpaanyɔ, nɛ Aaron hu ye jeha nyingmi kpaanyɔ kɛ etɛ benɛ a kɛ Farao ɔ ya tu munyu ɔ.

8 Yawɛ de Mose kɛ Aaron ke,

9 “Ke Farao ɔ de nyɛ ke nyɛɛ pee nyakpɛ nɔ́ ko nɛ nyɛ kɛ ye nyɛ he odase ɔ, mo de Aaron nɛ e sake e tso ɔ kɛ fɔ zugba ngɛ matsɛ ɔ hɛ mi; nɛ tso ɔ ma plɛ pee sinɔ.”

10 Kɛkɛ nɛ Mose kɛ Aaron je kɛ ho Farao ɔ ngɔ ya, nɛ a ya pee kaa bɔ nɛ Yawɛ fa mɛ ɔ. Aaron sake e tso ɔ ngɔ fɔ zugba ngɛ Farao ɔ kɛ e tsɔli ɔmɛ a hɛ mi; nɛ e plɛ pee sinɔ.

11 Kɛkɛ nɛ Farao ɔ hu tsɛ e ní leli ɔmɛ, kɛ kunya yeli ɔmɛ nɛ ji Egipt wɔnɔ ɔmɛ kɛ ba, nɛ mɛ hu a gu a ga blɔ ɔmɛ a nɔ kɛ pee ja nɔuu.

12 A ti nɔ tsuaa nɔ sake e tso ngɔ fɔ zugba, nɛ tso ɔmɛ plɛ pee sinɔhi. Se Aaron tso ɔ mii a tso ɔmɛ.

13 Se Farao ɔ kplii e tsui; nɛ kaa bɔ nɛ Yawɛ de ɔ, e bui Mose kɛ Aaron tue.

Haomihi ba Egipt

Nyu plɛ pee muɔ

14 Kɛkɛ nɛ Yawɛ de Mose ke, “Farao ɔ kplii e tsui; e kplɛɛ we nɛ e ha ni ɔmɛ nɛ a ho.

15 Moo bu tue! Hwɔɔ mɔtu ɔ, Farao ɔ maa ya Nilo pa a nya. Yaa nɛ o kɛ lɛ ya kpe ngɛ lejɛ ɔ. Nɛ ke o yaa a, moo hɛɛ o tso ɔ nɛ plɛ pee sinɔ ɔ ngɛ o dɛ mi,

16 nɛ o de lɛ ke, ‘Yawɛ, Hebri bi ɔmɛ a Mawu ɔ tsɔ mi o ngɔ ke ma ba de mo ke o ha ye ma a nɛ ho nɛ a ya ja mi ngɛ nga a nɔ, nɛ kɛ ba si amlɔ nɛ ɔ, o bui tue.’

17 ⓣ Bɔ nɛ Yawɛ de ji nɛ ɔ nɛ: ‘Enɛ ɔ a kɛ maa le kaa imi ji Yawɛ. Ma wo tso nɛ ngɛ ye dɛ mi ɔ kɛ fia Nilo pa a, nɛ nyu ɔ ma plɛ muɔ.

18 Lohi nɛ ngɛ pa a mi ɔ kulaa ma gbo. Nilo pa a mi nyu ɔ maa sa; e maa je fu, nɛ e maa nyɛɛ Egipt bi ɔmɛ a he mi ha mɛ.’ ”

19 Yawɛ kpale de Mose ke, “De Aaron ke, ‘Ngɔɔ o tso ɔ, nɛ o kpã o nine mi ngɛ Egipt pa amɛ, nyu dɔ ɔmɛ, kɛ taku ɔmɛ tsuo a nɔ, nɛ a mi nyu ɔ kulaa ma plɛ pee muɔ. A maa na muɔ ngɛ he tsuaa he ngɛ Egipt, ngɛ tso buɛhi, kɛ tɛ buɛhi a mi.’ ”

20 Nɛ kaa bɔ nɛ Yawɛ fa Mose kɛ Aaron ke a pee ɔ, Aaron wo tso ɔ nɔ nɛ e kɛ fia Nilo pa a hɛ mi ngɛ Farao ɔ kɛ e tsɔli ɔmɛ tsuo a hɛ mi. Nyu ɔ tsuo plɛ pee muɔ.

21 Lohi nɛ ngɛ pa a mi ɔ kulaa gbo, nɛ Nilo pa a he fu tsɔ bɔ nɛ Egipt bi ɔmɛ nyɛ we nɛ a nu pa a mi nyu ɔ. Nɛ nyu nɛ ngɛ Egipt zugba a nɔ tsuo plɛ pee muɔ.

22 Egipt kunya yeli ɔmɛ gu a ga blɔ ɔmɛ a nɔ nɛ a pee ja nɔuu. Se Farao ɔ lɛɛ e kplii e tsui kaa sa a. Nɛ kaa bɔ nɛ Yawɛ de ngɔ to ɔ, e bui mɛ tue fɛɛ.

23 Farao ɔ plɛ e he nɛ e ho we mi ya; enɛ ɔ kulaa pue we e tsui nɔ.

24 Egipt bi ɔmɛ tsua vuhi ngɛ Nilo pa a tue nɛ́ a na nyu nɛ a nu; ejakaa Nilo pa a nitsɛ mi nyu ɔ lɛɛ e hi numi saasaa.

25 Benɛ Yawɛ fia pa a nɔ́ nɛ e plɛ pee muɔ se ɔ, ligbi kpaago ba po mi.