Mose II, 26

Yawɛ kpe he bo tsu ɔ

(<x>20 36:8-38</x>)

1 “Jehanɛ, kpe he bo tsu ɔ, ngɔɔ bo popoe nyɔngma kɛ pee; a ngɔ kpa bluu, kpa tsu, kɛ kpa nɛ hɛɛ alamua tu su kɛ lo bo nɛ ɔ, nɛ a kadi kerub saminyawiiwi kɛ wo mi.

2 Bo ɔmɛ tsuo nɛ a sɔ fiee; bo kake kami nɛ pee nine mi blimi nyingmi enuɔ kɛ ekpa, nɛ e blimi nɛ pee nine mi blimi kpaanyɔ.

3 Moo kpɛ bo ɔ enuɔ kɛ tsa a sibi a nya, nɛ o kpɛ enuɔ kpa amɛ hu ja nɔuu.

4 Bo enuɔ ɔmɛ nɛ a tsa a; ngɔɔ kpa bluu kɛ pee gahi kɛ wo a nyagbe nɔ́ enyɔ ɔmɛ a ti kake he; bo kaketsɛ ɔ hu o pee lɛ ja nɔuu.

5 Bo ga nyingmi enuɔ nɛ hi bo kake nɛ ɔ nya, nɛ nyingmi enuɔ nɛ hi bo kaketsɛ ɔ hu nya; ga amɛ tsuo nɛ a nyɛɛ a sibi a hanɔ.

6 Moo pee sika tsu gbowe nyingmi enuɔ, nɛ o kɛ gbowe ɔmɛ nɛ hɔɔ ga amɛ a mi, konɛ bo ɔ tsuo nɛ pee bo tsu mluku kake.

7 “Jehanɛ, ngɔɔ apletsi he bwɔmi kɛ lo bo nyɔngma kɛ kake, nɛ o kɛ lɛ tsuo nɛ pee heha nɔ́ ha kpe he bo tsu ɔ.

8 Bo ɔ kake kami nɛ pee nine mi blimi nyingmi ekpa; e blimi nɛ pee nine mi blimi kpaanyɔ. Bo nyɔngma kɛ kake ɔmɛ ɔ, eko tsuaa eko kɛ e nyɛmi nɛ sɔ fiee.

9 Moo kpɛ bo ɔ enuɔ kɛ tsa a sibi a nya, nɛ o kpɛ ekpa nɛ piɛ ɔ hu kɛ tsa a sibi a nya. Bo ekpane ɔ nɛ maa ha bo tsu ɔ nya a lɛɛ dɔɔ mi enyɔ.

10 Bo enuɔ ɔmɛ nɛ a tsa a, moo pee ga nyingmi enuɔ kɛ wo nyagbe nɔ́ enyɔ ɔmɛ a ti kake he; ekpane ɔ hu o pee lɛ ja nɔuu.

11 Moo pee akɔblee gbowe nyingmi enuɔ, nɛ o ngɔ mɛ kɛ la ga amɛ a mi, konɛ bo enyɔ ɔmɛ nɛ a pee heha nɔ́ kake.

12 Kpe he bo tsu ɔ he hami bo fa a nɛ piɛ ngɛ se ɔ, ha nɛ e kpla si ngɛ bo tsu ɔ se je.

13 Jehanɛ, kpe he bo tsu ɔ he bo ɔ nine mi blimi enyɔ nɛ piɛ ngɛ e kami mi kasa kake nɛ ɔ, kɛ nine mi blimi enyɔ hu nɛ piɛ ngɛ kasa kpa a, e kpla si ngɛ kpe he bo tsu ɔ nya hiɛ kɛ hiɛ nɛ e kɛ ha tsu ɔ nya.

14 “Jehanɛ, o maa kpɛ bo kpa enyɔ kɛ ha kpe he bo tsu ɔ he; ngɔɔ agbosu he womi nɛ a wo lɛ kɔbɛi kɛ pee kekleekle nɔ́ ɔ, nɛ o ngɔ apletsi he womi nɛ a je blɔ pee kɛ pee enyɔne ɔ.

15 “Ngɔɔ akasia tso kɛ pee sima tso ha kpe he bo tsu ɔ.

16 Sima tso kake kami nɛ pee nine mi blimi nyingmi enyɔ, e blimi hu nɛ pee nine mi blimi etɛ.

17 Bɔ nɛ o maa pee kpe he bo tsu ɔ he sima tso ɔmɛ tsuo ji nɛ ɔ nɛ: a pee nane enyɔ kɛ wo sima tso tsuaa sima tso he, konɛ a nyɛ nɛ a kɛ sima tso ɔmɛ nɛ tsa a sibi a nya.

18 Moo ma sima tso nyingmi enyɔ ngɛ leneyi je,

19 nɛ o pee sika hiɔ nɔ dami nɔ́ nyingmi eywiɛ kɛ wo sima tso nyingmi enyɔ ɔmɛ a sisi; nɔ dami nɔ enyɔ nɛ hi sima tso tsuaa sima tso sisi kɛ ha nane enyɔ ɔmɛ.

20 Kpe he bo tsu ɔ we omleyi je ɔ, sima tso nyingmi enyɔ nɛ hi lejɛ ɔ,

21 kɛ mɛ hu a sika hiɔ nɔ dami nɔ́ nyingmi eywiɛ; nɔ dami nɔ́ enyɔ ngɛ sima tso tsuaa sima tso sisi.

22 Kpe he bo tsu ɔ se ngɛ bonyoku je ɔ, sima tso ekpa nɛ hi lejɛ ɔ,

23 konɛ o ma sima tso kpa enyɔ ha kpe he bo tsu ɔ kɔ nya amɛ nɛ ngɛ se je ɔ.

24 Kɔ nya sima tso nɛ ɔmɛ ɔ, a tsa mɛ ngɛ yi kpɛti ɔ ngɛ kekleekle ga a he; sisi ɔ lɛɛ a ko ngɔ kɛ tsa. A pee kɔ nya sima tso ɔmɛ tsuo kikɛ nɛ ɔ.

25 Lɔ ɔ he ɔ, o maa pee sima tso kpaanyɔ kɛ sika hiɔ nɔ dami nɔ́ nyɔngma kɛ ekpa: sika hiɔ nɔ dami nɔ́ enyɔ maa hi sima tso tsuaa sima tso sisi.

26 “Ngɔɔ akasia tso kɛ pee mani womi tso nyɔngma kɛ enuɔ ha kpe he bo tsu ɔ: enuɔ ha sima tso ɔmɛ ngɛ kpe he bo tsu ɔ kasa hiɛ,

27 enuɔ ha sima tso ɔmɛ ngɛ kpe he bo tsu ɔ kasa hiɛ, kɛ enuɔ hu ha sima tso ɔmɛ ngɛ kpe he bo tsu ɔ se, ngɛ bonyoku je.

28 Mani ɔ nɛ nyɛɛ sima tso ɔmɛ a kpɛti ɔ lɛɛ e fɔ si kɛ je kpe he bo tsu ɔ kasa kake kɛ ya si kasa kake.

29 Ngɔɔ sika tsu kɛ ha sima tso ɔmɛ a he, nɛ o pee sika tsu gahi kɛ wo a he, konɛ a kɛ mani ɔmɛ nɛ hɔɔ a mi. Mani ɔmɛ nitsɛ hu, ngɔɔ sika tsu kɛ ha a he.

30 O pee kpe he bo tsu nɛ ɔ pɛpɛɛpɛ kaa henɔ nɛ i tsɔɔ mo ngɛ yo ɔ nɔ ɔ.

31 “Tsu mi pomi bo ɔ, moo gbɔ kpa bluu, kpa tsu, kɛ kpa nɛ hɛɛ alamua tu su, nɛ a kɛ lo, nɛ á je blɔ nɛ a kadi kerub saminyawiiwi kɛ wo mi.

32 Ngɔɔ kɛ kpla akasia tso eywiɛ a he; tso nɛ ɔmɛ ɔ, ngɔɔ sika tsu kɛ ha a he, nɛ a kɛ sika tsu gbowe nɛ kɔ a nya loko a ngɔ mɛ kɛ ma sika hiɔ nɔ dami nɔ́ eywiɛ ɔmɛ a nɔ.

33 ⓥ Ngɔɔ tsu mi pomi bo ɔ kɛ bɛ gbowe ɔmɛ a nya kɛ kpla si, nɛ o ngɔ daka a nɛ somi womi ɔ ngɛ mi ɔ kɛ ba ma e se blɔ, konɛ tsu mi pomi bo ɔ nɛ po he klɔuklɔu ɔ, kɛ he klɔuklɔu pe kulaa a kpɛti ha nyɛ.

34 Daka a nɛ somi womi ɔ ngɛ mi ɔ, ngɔɔ e nya nɔ́ ɔ kɛ bu daka a nya ngɛ he klɔuklɔu pe kulaa a.

35 Ngɔɔ okplɔɔ ɔ kɛ ma tsu mi pomi bo ɔ hɛ mi ngɛ kpe he bo tsu ɔ we omleyi je, konɛ kane tso ɔ lɛɛ e ya je leneyi je, ngɛ okplɔɔ ɔ hanɔ tutuutu.

36 “Kpe he bo tsu ɔ sinya a nya bo ɔ, ngɔɔ kpa bluu, kpa tsu, kɛ kpa nɛ hɛɛ alamua tu su kɛ lo; nɛ a kɛ abui nɛ kadi ní kɛ wo mi.

37 Ngɔɔ akasia tso enuɔ nɛ a kɛ sika tsu ha a he, kɛ a nya sika tsu gbowehi, nɛ o kɛ pee titimahi ha tsu nya bo ɔ. Jehanɛ hu, moo sɔ̃ akɔblee nɔ dami nɔ́ enuɔ ha tso ɔmɛ.