Mose II, 11

Mose de ke bitɛtehi ma gbo

1 Yawɛ de Mose ke, “E piɛ haomi kake nɛ i kɛ maa ba Farao ɔ kɛ Egipt nɔ, nɛ lɔ ɔ se ɔ, e ma ha nɛ nyɛɛ je. Ke be ɔ su nɛ e ma ha nɛ nyɛɛ ho ɔ, pe e maa fie nyɛ, nɛ e maa bɛɛ nyɛ kaa a bɛɛɔ dwɔmi.

2 Jehanɛ ɔ, mo de nɛ Israel bi ɔmɛ nɛ a nu kaa nyumu tsuaa nyumu, kɛ yo tsuaa yo nɛ ya ba june ní, sika hiɔ, kɛ sika tsu ngɛ e nɔle nɔ Egipt no dɛ.”

3 Yawɛ dloomi nya a, Egipt bi ɔmɛ na Israel bi ɔmɛ a he bua jɔmi. Niinɛ, Farao ɔ tsɔli ɔmɛ, kɛ ma a tsuo buu Mose kaa nɔmlɔ ngua nitsɛnitsɛ ngɛ Egipt zugba a nɔ.

4 Mose de Farao ɔ ke, “Bɔ nɛ Yawɛ de ji nɛ ɔ nɛ: ‘Maa pee nyɔ mi kpɛti ɔ, ma je kpo nɛ ma ya kpa Egipt zugba a nɔ.

5 Bitɛte tsuaa bitɛte ngɛ Egipt ɔ ma gbo, kɛ je Farao ɔ bitɛte nɛ ma ba ye e tsɛ se hwɔɔ se ɔ nɔ, kɛ yaa si nyɔguɛ yo nɛ ngɛ mamu wɛɛe ngɛ wɛ se ɔ bitɛte nɔ, kɛ lohwehi hu a kekleekle bihi tsuo.

6 Ya nɛ pɛ́ hyɛ, nɛ eko hu be pɛe ligbi ko maa pɛ ngɛ Egipt zugba a nɔ tsuo.

7 Se Israel bi ɔmɛ lɛɛ gbe po be huãe kɛ wo nɔmlɔ ko, loo lohwe ko. Nɛ enɛ ɔmɛ nyɛ ma kɛ le kaa imi Yawɛ, i kɛ mi gbami ba Egipt bi ɔmɛ, kɛ Israel bi ɔmɛ a kpɛti.’

8 O tsɔli ɔmɛ tsuo ma ba kpla si ha mi, nɛ a ma kpa mi pɛɛ ma de ke, ‘Nyɛɛ ho, nyɛɛ kɛ nihi nɛ nyɛɛ nyɛ se ɔ tsuo.’ Lɔ ɔ se ɔ, ma je.” Nɛ Mose kɛ mi mi la nɛ nya wa je Farao ɔ hɛ mi.

9 Yawɛ de Mose ke, “Farao ɔ be mo tue bue bɔ nɛ pee nɛ ye nyakpɛ ní ɔmɛ nɛ hiɛ babauu ngɛ Egipt zugba a nɔ.”

10 Mose kɛ Aaron pee nyakpɛ ní nɛ ɔmɛ tsuo ngɛ Farao ɔ hɛ mi; se Yawɛ kplii Farao ɔ tsui, nɛ e ha we nɛ Israel bi ɔmɛ nɛ a je zugba a nɔ kɛ ho.