Ezra 4

He nyɛli te si kɛ si Mawu we ɔ mami

1 Benɛ Yuda bi ɔmɛ, kɛ Benyamin bi ɔmɛ a he nyɛli ɔmɛ nu kaa nihi nɛ kpale kɛ je ma se kɛ ba a ba bɔni Yawɛ, Israel Mawu ɔ we ɔ mami ekohu ɔ,

2 ⓚ a ba na Zerubabel, kɛ we puɔ nya dali ɔmɛ, nɛ a de mɛ ke, “Nyɛ ha nɛ waa piɛ nyɛ he kɛ ma Mawu we ɔ, ejakaa Mawu kake ɔ nɛ nyɛ jaa a, lɛ wɔ hu wa jaa. Kɛ je Asiria matsɛ, Esarhadon nɛ ngɔ wɔ kɛ ba hiɛmɛ nɛ ɔ yi nɔ ɔ, lɛ ji Mawu nɛ wa jaa nɛ wa sãã bɔ kɛ haa.”

3 Se Zerubabel, Yoshua, kɛ Israel we puɔ nya dali ɔmɛ tsuo de mɛ ke, “Ke wa ngɛ Yawɛ, wa Mawu ɔ we mae ha lɛ ɔ, e kɔ we nyɛ he nɔ́ ko kulaa. Wɔ nitsɛmɛ wa maa ma wa ní kaa bɔ nɛ Persia matsɛ, Sirus fa wɔ ɔ.”

4 Se nihi nɛ ngɛ zugba a nɔ ɔ wo Yuda bi ɔmɛ a he gbeye, konɛ a nine mi nɛ je wu, nɛ a ko nyɛ Mawu we ɔ nɛ a ma.

5 Zugba a nɔ bi ɔmɛ ya konɛ a ya tsi ní tsumi ɔ nya. A bɔ mɔde kaa a maa tsi ni tsumi nya be mi nɛ Matsɛ Sirus ngɛ tsɛ yee ɔ hluu kɛ ya su Matsɛ Darius yi nɔ.

He nyɛli te si kɛ si Yerusalem ma a pomi

6 ⓛ Benɛ Ahazuerus bɔni tsɛ yemi pɛ kɛkɛ nɛ Yuda kɛ Yerusalem bi ɔmɛ a he nyɛli ngma womi kɛ ya po a nya.

7 Benɛ Persia matsɛ, Artaherhes ngɛ tsɛ yee ɔ hu Bishlam, Mitredat, kɛ Tabeel kɛ a huɛmɛ ɔmɛ nɛ piɛ ɔ, ngma womi kɛ ya ha matsɛ ɔ. A ngma ngɛ Aram gbi mi, nɛ a tsɔɔ sisi ha matsɛ ɔ.

8 Amlaalo Rehum, kɛ Shimshai, ma pɛdiyo ɔ hu ngma Yerusalem ma a he womi ya ha Matsɛ Artaherhes.

9 Nihi nɛ piɛ amlaalo Rehum, kɛ Shimshai a he kɛ ngma womi ɔ ji a huɛmɛ, kojoli, kɛ ma ní tsuli kpahi tsuo nɛ je Erek, Babilon, kɛ Susa ngɛ Elam zugba a nɔ,

10 kɛ nihi nɛ je ma kpahi babauu a nɔ. Matsɛ ngua Ashurbanipal lɛ nuu nimli nɛ ɔmɛ kɛ je a mahi a mi kɛ ba Samaria, kɛ he kpahi nɛ ngɛ Yufrate pa a se.

11 Womi nɛ a ngma a mi munyu ji nɛ ɔ nɛ: “O tsɔli nɛ ngɛ Yufrate pa a se ɔ nɛ a ngɛ mo, Matsɛ Artaherhes womi nɛ ɔ ngmae.

12 Nɛnɛ, wa ngɛ hae nɛ o le kaa Yuda bi ɔmɛ nɛ je o ngɔ kɛ ba a ba to si ngɛ Yerusalem, nɛ a bɔni jamɛ a atuã tsɔli, kɛ yiwutsotsɛmɛ a ma a mami ekohu. A bɔni gbogbo ɔmɛ fiami, nɛ e be kɛe kulaa nɛ a maa po ma a kɛ gbe nya.

13 Nɛnɛ, ná nɛ o le kaa ke a po ma a gbe nya a, a be tó, loo sika ko woe hu, nɛ sika be matsɛ nito he ɔ bae bɔ nɛ sa.

14 Nɛnɛ, akɛnɛ wa ngɛ o nɔ yemi ɔ sisi, nɛ wa sume kaa o hɛ mi nɛ pue si he je ɔ, wa ngɛ hae nɛ o le nɔ́ nɛ ɔ.

15 Ha nɛ a hyɛ o nɛmɛ ɔmɛ a yi nɔ sanehi womi ɔmɛ a mi fitsofitso. Ke o pee ja a, o maa na kaa ma nɛ ɔ, kɛ je blema a, atuã pɛ a tsɔɔ; a nɔ yemi yee. A matsɛmɛ, kɛ nihi nɛ yeɔ kpokpa amɛ a nɔ ɔ, a dooɔ a nya. Enɛ ɔ he je nɛ a kpata ma a hɛ mi ɔ nɛ.

16 Nɛnɛ, wa ngɛ hae nɛ o na nɛ o le kaa ke a fia gbogbo ɔmɛ gbe nya, nɛ a po ma a ekohu ɔ, ma amɛ nɛ ngɛ Yufrate pa a se ɔ be o nɔ yemi he pee hu.”

17 Matsɛ ɔ ha mɛ womi ɔ heto ke, “Amlaalo Rehum, ma pɛdiyo Shimshai, kɛ nyɛ huɛmɛ nɛ ngɛ Samaria, kɛ nihi nɛ ngɛ kpokpa amɛ a nɔ ngɛ Yufrate pa a se, nyɛ he manye!

18 Womi nɛ nyɛ ngma a, a kane ha mi, nɛ i nu sisi saminya.

19 I fa, nɛ a hla níhi a mi fitsofitso. I ná le kaa kɛ je blema a, Yerusalem ma teɔ si kɛ woɔ matsɛmɛ. Niinɛ, a tsɔɔ atuã, nɛ a puɛɔ ma mi bi a tue.

20 Jehanɛ hu, a na kaa matsɛ nguahi hi Yerusalem sa a, nɛ a ye ma a nɔ kɛ ya pue Yufrate pa a se tsuo; nɛ Yerusalem he tó, kɛ sika kpahi ngɛ ma amɛ a dɛ.

21 Lɔ ɔ he ɔ, nyɛ fa nimli ɔmɛ nɛ a kpa ma a pomi kɛ yaa si be nɛ gbi maa je imi nitsɛ ye nya.

22 Nyɛɛ tsi a nya esɔ nɛ a ko ba puɛ ní ha mi.”

23 Benɛ Rehum, Shimshai, kɛ a huɛmɛ ɔmɛ nu womi nɛ Artaherhes ngma a mi munyu ɔ, a pue nɔ amlɔ nɔuu kɛ ho Yerusalem ya, nɛ a ya nyɛ Yuda bi ɔmɛ a nɔ nɛ a kpa ní tsumi ɔ.

A je Mawu we ɔ mami sisi ekohu

24 ⓜ Lɔ ɔ he ɔ, Mawu we ɔ nɛ ngɛ Yerusalem he ní tsumi ɔ tlɔ fã jã hluu kɛ ya su Persia matsɛ, Darius yi nɔ[2] jeha enyɔne ɔ.