A bɔni Mawu jami ekohu ngɛ Yerusalem
1 Nyɔhiɔ kpaagone ɔ, benɛ Israel bi ɔmɛ kpale ba he si ngɛ a ma amɛ a mi ɔ, ma a tsuo ba bua a he nya ngɛ Yerusalem.
2 ⓔ Yehozadak bi Yoshua, e nyɛmimɛ osɔfo ɔmɛ, kɛ Sheatiel bi Zerubabel, kɛ e weku li ɔmɛ ba ma Israel Mawu ɔ bɔ sami la tɛ ɔ ekohu, konɛ a sã sami bɔhi ngɛ nɔ kaa bɔ nɛ Mawu nɔmlɔ Mose mlaa a tsɔɔ ɔ.
3 ⓕ Ni ɔmɛ nɛ kpale kɛ je ma se kɛ ba a ngɛ ni nɛmɛ nɛ ngɛ zugba a nɔ loko a ba a gbeye yee, lɔ ɔ he ɔ, a ma bɔ sami la tɛ ɔ ngɔ ma sisi tomi momo ɔ nɔ, nɛ a bɔni sami bɔhi sami ngɛ nɔ daa ligbi mɔtu kɛ gbɔkuɛ.
4 ⓖ A ye Gbasisihimi nyami ɔ pɛpɛɛpɛ. Daa ligbi ɔ, a sãã sami bɔhi nɛ a to kɛ ha jamɛ a ligbi ɔ kaa bɔ nɛ mlaa tsɔɔ ɔ.
5 ⓗ A sãã bɔ pɔtɛɛ nɛ ɔmɛ hulɔ: sami bɔhi nɛ a sãã nyami be kaa Nyɔhiɔhe nyami be mi, bɔhi nɛ a sãã daa ke ma a ba bua a he nya nɛ a ma ja Yawɛ kikɛ nɛ ɔ, kɛ bɔhi tsuo nɛ nihi jeɔ a tsui mi faa nɛ a kɛ ba haa Yawɛ.
6 Kɛ je nyɔhiɔ kpaagone ɔ we klekleekle ligbi ɔ, a bɔni sami bɔ sami kɛ ha Yawɛ. Se Mawu we ɔ sisi tomi ɔ nitsɛ lɛɛ a na we nɛ a fia.
A bɔni Mawu we ɔ mami ekohu
7 Enɛ ɔ he je ɔ, ma a ha sika nɛ a kɛ wo tɛ gbali ɔmɛ, kɛ tso he ní tsuli ɔmɛ hiɔ, nɛ a ha niye ní, dã, kɛ oliv nu, nɛ a kɛ ya he seda tso ngɛ Tiro kɛ Sidon ngɛ Lebanon zugba a nɔ. A kɛ tso ɔmɛ gu wo nɔ kɛ ba Yopa. Persia matsɛ, Sirus lɛ ngmɛ blɔ kaa a pee ní nɛ ɔmɛ tsuo.
8 Benɛ Israel bi ɔmɛ ba su Yerusalem, he nɛ Mawu we ɔ hi ɔ, jeha enyɔne ɔ we nyɔhiɔ nɛ ji enyɔ ɔ mi ɔ, a je Yawɛ we ɔ mami sisi. Shealtiel bi Zerubabel, Yozadak bi Yoshua, kɛ ma a nɛ a wo ní tsumi ɔ nɔ. Osɔfo ɔmɛ, Levi bi ɔmɛ, kɛ nihí tsuo nɛ kpale kɛ je ma se kɛ ba a hu piɛ a he. A ngɔ Levi bi, nihi nɛ ye jeha nyingmi enyɔ, aloo ni nɛmɛ nɛ ye pe ja ngɔ to ní tsumi ɔ nya konɛ a hyɛ nɔ.
9 Yeshua, Levi no ɔ, e bimɛ ɔmɛ, e weku li, kɛ Kadmiel kɛ lɛ hu e bimɛ ɔmɛ nɛ a je Yuda we puɔ ɔ nya a ngɔ fɔ a nɔ kaa a maa hyɛ Mawu we ɔ mami ní tsumi ɔ nɔ. (Levi bi nɛ je Henadad we puɔ nya a piɛ a he).
10 ⓘ Benɛ tsu mali ɔmɛ bɔni Mawu we ɔ sisi tomi ɔ fiami ɔ, osɔfo ɔmɛ kɛ a he tade ɔmɛ kɛ a dɛ mi titimati ya da a blɔ hehi. Levi bi nɛ je Asaf we puɔ ɔ nya a hu hɛɛ gɔgɔhi ngɛ a dɛ kɛ ya da si ngɛ lejɛ ɔ. A je Yawɛ yi kaa bɔ nɛ Matsɛ David to blɔ nya ha mɛ kɛ je blema a.
11 ⓙ Ma kpekpemi ɔ la yi jemi la, kɛ sina la kɛ ha Yawɛ; nɛ munyu nɛ a kɛ heɔ la a nɔ ɔ, a ti mi si abɔ ke, “Yawɛ hi, nɛ e suɔmi nɛ e kɛ suɔ Israel ɔ ngɛ kɛ yaa neneene.” Jehanɛ benɛ a fia Yawɛ we ɔ sisi tomi ɔ ta a, ma kpekpemi ɔ tsuo hwɔ lele nɛ a je Mawu yi.
12 Benɛ osɔfo ɔmɛ ekomɛ, Levi bi ɔmɛ ekomɛ, we puɔ nya dali ɔmɛ ekomɛ, kɛ nimeli nɛ le bɔ nɛ Mawu we ɔ ngɛ sa a, na Mawu we ɔ sisi tomi nɛ ɔ fiami kikɛ nɛ ɔ, a wo yana boboobo. Se ni kpa amɛ nɛ ngɛ lejɛ ɔ lɛɛ ose ɔ kɛkɛ a ngɛ hee wawɛɛ kɛ ngɛ nyae.
13 Nɛ́ e ba mi ja a, ma mi bi ɔmɛ li slɔɔto nɛ ngɛ lele nɛ a ngɛ hwɔe, kɛ yana nɛ a wo ɔ a kpɛti; ejakaa bubuubui nɛ a ngɛ kpae ɔ nya wa wawɛɛ nitsɛ, nɛ a ngɛ he nue ngɛ se lokoo.