Kronika II, 34

Yuda matsɛ, Yosia

(<x>120 22:1-2</x>)

1 ⓔ Yosia ye jeha kpaanyɔ benɛ e bɔni tsɛ yemi ngɛ Yuda ma a nɔ, nɛ e hi Yerusalem kɛ ye matsɛ jeha nyingmi etɛ kɛ kake.

2 E pee Yawɛ suɔmi nya ní; e ya wo e nɛ̃ David nane, nɛ e ye Mawu mlaa amɛ tsuo a nɔ sisiisi.

Yosia te si kɛ wo amaga jami

3 Yosia matsɛ yemi be ɔ jeha nɛ ji kpaanyɔ ɔ mi ɔ, be mi nɛ e wɛ saasaa a, e bɔni e nɛ̃ David Mawu ɔ jami. Jeha nɛ ji nyɔngma kɛ enyɔ ɔ mi ɔ, e bɔni jami he ɔmɛ nɛ ngɛ Yerusalem kɛ Yuda a gbɛmi; e ywia yo mawu ɔ nɛ a tsɛɛ Ashera a we amaga amɛ, kɛ amaga kpa amɛ tsuo.

4 ⓕ Bɔ sami la tɛhi nɛ ngɛ Baal jami he ɔ, kɛ tsopa kɛ e he via sami la tɛhi nɛ ngɛ lejɛ ɔ, Yosia ha nɛ a ku mɛ tsuo ngɔ pue si ngɛ e hɛ mi. Ashera amaga amɛ, kɛ amaga kpa amɛ tsuo lɛɛ a wɛɛ mɛ mɔnyɔmɔnyɔ kaa la zu, nɛ a ngɔ kɛ fĩa nihi nɛ sã bɔ ha mɛ ɔ a yɔkɔhi a nɔ.

5 ⓖ Yosia sã osɔfo ɔmɛ a wuhi ngɛ mɛ nitsɛmɛ a bɔ sami la tɛ ɔmɛ a nɔ. E pee ní nɛ ɔmɛ nɛ e kɛ tsukɔ Yuda kɛ Yerusalem a he ekohu.

6 Yosia tsu kikɛmɛ a ní tsumi nɛ ɔ ngɛ Manase, Efraim, kɛ Simeon ma amɛ, kɛ ma doku ɔmɛ tsuo a mi hulɔ hluu kɛ ya su Naftali, ngɛ omleyi je tɔɔ.

7 Yosia ywia bɔ sami la tɛ ɔmɛ, kɛ Ashera amaga amɛ. E wɛɛ amaga amɛ nɛ a pee mɔnyɔmɔnyɔ kaa la zu, nɛ e ywia tsopa kɛ e he via bɔ sami la tɛ ɔmɛ ngɛ Israel zugba a nɔ tsuo loko e kpale kɛ ba Yerusalem.

A na mlaa womi ɔ

(<x>120 22:3-20</x>)

8 Matsɛ Yosia yi nɔ jeha nɛ ji nyɔngma kɛ kpaanyɔ ɔ, e julaa zugba a, nɛ e tsukɔ Yawɛ, e Mawu ɔ we ɔ he. Be nɛ e gbe nya a, e tsɔ nihi etɛ konɛ a ya dla Yawɛ, e Mawu ɔ we ɔ. Ni ɔmɛ ji Azalia bi Shafan, amlaalo ɔ nɛ ngɛ Yerusalem, nɛ a tsɛɛ lɛ Maaseya a, kɛ Yoahaz bi Yoa, ma ní tsulɔ nɔkɔtɔma kake.

9 Shafan, Maaseya, kɛ Yoa ngɔ sika nɛ nihi kɛ ba Mawu we ɔ ya ha osɔfo nɔkɔtɔma pe kulaa a nɛ a tsɛɛ Hilkia a. Sika nɛ ɔ ji sika nɛ Levi bi nɛ tsuɔ ní ngɛ Yawɛ we ɔ agbo ɔ nya a bua nya ngɛ wɛtso nɛ ɔmɛ a mi ɔ a dɛ: Manase, Efraim, Israel ma nɛ piɛ ɔ, Yuda, Benyamin, kɛ Yerusalem ma mi bi ɔmɛ.

10 A tu sika a ngɔ wo ni etɛ komɛ a dɛ. Mɛ ji nihi nɛ hyɛɛ ní tsuli ɔmɛ nɛ ngɛ Yawɛ we ɔ dlae ɔ a nɔ ɔ nɛ.

11 Mɛ hu a ngɔ sika a kɛ ha kapitɛhi, kɛ tsu mali, konɛ a kɛ he tɛ, kɛ tso nɛ a kɛ dla tsuhi nɛ Yuda matsɛmɛ ɔmɛ ngmɛɛ a he nɛ a puɛ ɔ.

12 Ní tsuli nɛ ɔmɛ yeɔ anɔkuale saminya. Levi bi eywiɛ lɛ hyɛɛ a nɔ. Mɛ ji Yahat, kɛ Obadia nɛ a je Merari weku ɔ mi ɔ, kɛ Zakaria kɛ Meshulam nɛ a je Kohat weku ɔ mi ɔ. Saku fiali kpakpahi ji Levi bi ɔmɛ tsuo.

13 Levi bi kpa komɛ hu hyɛɛ tlomi tlooli, kɛ ní tsuli kpahi a nɔ. A ti ni komɛ hu ji womi ngmali, ma ní tsuli, kɛ agbo nya buli.

14 Benɛ a ngɛ sika a nɛ a kɛ ba to Yawɛ we ɔ jee ɔ, osɔfo Hilkia ya na Yawɛ mlaa womi ɔ nɛ Mawu ngɔ kɛ ha Mose ɔ.

15 Hilkia de womi ngmalɔ ɔ nɛ a tsɛɛ lɛ Shafan ɔ ke, “I na mlaa womi ɔ ngɛ Yawɛ we ɔ.” Nɛ́ e de ja kɛkɛ nɛ e kɛ womi ɔ ha Shafan.

16 Shafan hu ngɔ womi ɔ kɛ ba ha matsɛ ɔ, nɛ e bɔ lɛ amaniɛ ke, “Nɔ́ tsuaa nɔ́ nɛ o fa wɔ ke waa pee ɔ, wa pee.

17 Sika a nɛ a kɛ ya to Yawɛ we ɔ, wa ya ngɔ nɛ waa kɛ wo ní tsuli ɔmɛ, kɛ a nɔ hyɛli ɔmɛ a dɛ.”

18 Shafan ya nɔ nɛ e de matsɛ ɔ ke, “Osɔfo Hilkia ha mi womi ko; womi ɔ ji nɛ ɔ nɛ.” Kɛkɛ nɛ Shafan kane womi ɔ kɛ ha matsɛ ɔ.

19 Benɛ matsɛ ɔ nu mlaa womi ɔ mi munyu ɔmɛ nɛ a ngɛ kanee ɔ, e hía e tade ɔmɛ ngɛ e he,

20 nɛ e fa Hilkia, Shafan bi Ahikan, Mikaya bi Abdon,[4] matsɛ pɛdiyo ɔ nɛ a tsɛɛ lɛ Shafan ɔ, kɛ matsɛ tsɔlɔ Asaya ke,

21 “Nyɛɛ ya nɛ nyɛ ya bi Yawɛ ga womi ha imi, kɛ nihi tsuo nɛ piɛ ngɛ Israel, kɛ Yuda a. Nyɛ ya bi lɛ womi nɛ a ya na nɛ ɔ mi munyu ɔmɛ a he sane. Yawɛ mi mi fu wɔ wawɛɛ nitsɛ, ejakaa wa nɛmɛ ɔmɛ yi Yawɛ mlaa a nɔ; níhi nɛ a ngma ngɛ womi nɛ ɔ mi ke a pee ɔ, a pee we fɛɛ.”

22 Kɛkɛ nɛ Hilkia, kɛ nihi nɛ matsɛ ɔ tsɔ ɔ pue nɔ kɛ ho nɛ a ya bi gbalɔyo ɔ nɛ a tsɛɛ lɛ Hulda a ní ngɛ Yerusalem ma he ɔ mi he nɛ e hii ɔ. Hulda huno ji Tikva bi Shalum, Harhas bibi ɔ; nɛ Shalum nɛ ɔ ji nɔ nɛ hyɛɛ tadehi a nɔ ngɛ Yawɛ we ɔ. Osɔfo Hilkia kɛ tsɔli ɔmɛ ngɔ matsɛ ɔ sɛ gbi ɔ ya ha gbalɔyo ɔ.

23 Gbalɔyo ɔ hu de mɛ ke a kpale kɛ ho matsɛ ɔ ngɔ ya nɛ a ngɔ

24 sɛ gbi nɛ je Yawɛ ngɔ nɛ ɔ ya ha lɛ ke, “I kɛ gbiɛmi munyuhi nɛ a ngma ngɛ womi ɔ nɛ a kane ha lɛ matsɛ ɔ maa gbla Yerusalem, kɛ Yerusalem ma mi bi ɔmɛ tsuo a tue.

25 A kua mi, nɛ a sã bɔhi kɛ ha mawu kpahi, nɛ a kɛ níhi nɛ a pee nɛ ɔ tsuo wo ye mi mi la. Ye mi mi fu Yerusalem wawɛɛ nitsɛ, nɛ nɔ́ ko be hie peemi ngɛ he.

26 Se Yuda matsɛ ɔ nitsɛ, nɔ nɛ tsɔ nyɛ ke nyɛ ba bi imi Yawɛ, ye ga womi ɔ, bɔ nɛ imi Yawɛ, Israel Mawu ɔ, i ngɛ lɛ dee ji nɛ ɔ nɛ: o nu munyuhi nɛ a ngma ngɛ mlaa womi ɔ mi ɔ,

27 nɛ o tsake o tsui, nɛ o ba o he si ngɛ ye hɛ mi. Benɛ o nu bɔ nɛ i to nɛ ma gbla Yerusalem, kɛ Yerusalem ma mi bi ɔmɛ a tue ha a, o hía o he tade ɔmɛ, nɛ o wo ya. I nu o kue fami ɔ.

28 Enɛ ɔ he je ɔ, tue gblami nɛ i to nɛ e ba ma nɛ ɔ, kɛ ma mi bi ɔmɛ a nɔ ɔ, i be hae nɛ o na kɛ o hɛngmɛ. O ma ba gbo nɛ a maa pu mo ngɛ he jɔmi mi loko ma pee nɔ́ nɛ ɔ.” Kɛkɛ nɛ ni ɔmɛ kpale a se nɛ a kɛ sɛ gbi nɛ ɔ ba ha Matsɛ Yosia.

Yosia wo si veveeve kaa e maa bu Yawɛ tue

(<x>120 23:1-20</x>)

29 Matsɛ Yosia tsɔ ya kpee Yuda, kɛ Yerusalem ma nimeli ɔmɛ kɛ ba,

30 nɛ e kɛ mɛ, osɔfo ɔmɛ, Levi bi ɔmɛ, kɛ ma a tsuo, nimli nguahi, kɛ nimli wawihi tsuo ho Yawɛ we ɔ ya. Matsɛ ɔ ya kane mlaa womi ɔ nɛ a na ngɛ Yawɛ we ɔ mi munyu ɔmɛ tsuo ngɔ tsɔɔ ma a ngɛ lejɛ ɔ.

31 Kɛkɛ nɛ e ho ya da kpoku ko nɔ nɛ e ka Yawɛ kita ke e maa bu lɛ tue, nɛ e maa ye e mlaa amɛ a nɔ kɛ e tsui tsuo, kɛ e klaa tsuo. E ka kita ke níhi nɛ a ngma ngɛ mlaa womi ɔ mi ɔ, e maa pee mɛ tsuo pɛpɛɛpɛ.

32 E ha nɛ Benyamin bi ɔmɛ, kɛ nihi tsuo nɛ ba bua ngɛ Yerusalem ɔ wo si kaa a maa ye somi nɛ a kɛ a nɛmɛ a Mawu ɔ so ɔ nɔ. Nɛ mɛ tsuo a pee ja.

33 Matsɛ Yosia je amagahi tsuo kɛ je zugba a nɔ he nɛ Israel ma a ngɛ ɔ, nɛ e ha nɛ ma a tsuo sɔmɔ Yawɛ, a nɛmɛ a Mawu ɔ e wami be ɔ tsuo.