Kronika II, 31

Hezekia tsake jami blɔ nya tomi ɔ hɛ mi

1 Benɛ a ye nyami be ɔmɛ ta a, Israel bi tsuo nɛ ba lejɛ ɔ pue nɔ kɛ ho Yuda ma amɛ a mi ya. A gbɛ jami he ɔmɛ; a ku amagahi nɛ a puɛ kɛ ha yo mawu ɔ nɛ a tsɛɛ Ashera a ngɔ pue si, nɛ a ywia bɔ sami la tɛ ɔmɛ, kɛ jami he ɔmɛ ngɛ Yuda ma amɛ tsuo a mi. A tsu kikɛmɛ a ní nɛ ɔ nɔuu ngɛ Benyamin, Efraim, kɛ Manase zugba amɛ a nɔ, loko a kpale kɛ ho a wehi a mi ya ngɛ a mahi a mi.

2 Matsɛ Hezekia kpale dla ní tsumi kɛ ha osɔfo ɔmɛ, kɛ Levi bi ɔmɛ, nɔ tsuaa nɔ kɛ e ní tsumi pɔtɛɛ. Ní tsumi slɔɔto ɔmɛ ji nɛ ɔmɛ nɛ: sami bɔ sami, tue mi jɔmi bɔ sami, sɔmɔmi ngɛ Yawɛ we ɔ, kɛ Yawɛ yi jemi kɛ si nami.

3 ⓩ Matsɛ ɔ nitsɛ ha lohwehi nɛ a kɛ sã sami bɔhi daa mɔtu kɛ gbɔkuɛ. E ha lohwehi nɛ a kɛ sã bɔ Hejɔɔmi ligbi, Nyɔhiɔhe nyami be, kɛ nyami be kpahi kaa bɔ nɛ Yawɛ mlaa a tsɔɔ ɔ.

4 ⓐ Jehanɛ, matsɛ ɔ fa Yerusalem ma mi bi ɔmɛ ke a ngɔ osɔfo ɔmɛ, kɛ Levi bi ɔmɛ a blɔ nya ní ɔmɛ ba ha mɛ, bɔ nɛ pee nɛ a ngɔ a juɛmi tsuo kɛ fɔ a ní tsumi ɔmɛ a nɔ kaa bɔ nɛ Yawɛ mlaa a tsɔɔ ɔ.

5 Benɛ a fa kikɛ nɛ ɔ pɛ kɛkɛ nɛ Israel bi ɔmɛ kɛ nike ní nɛ ɔmɛ ba babauu nitsɛ: blɛfo kpokploku, wai, oliv nu, hwo, kɛ ngmɔ niba ní kpahi. Jehanɛ, níhi tsuo nɛ ngɛ a dɛ ɔ, a ngɔ a mi dlami nyɔngmanyɔngma mi kakaaka hu kɛ ba.

6 Nihi tsuo nɛ ngɛ Yuda ma amɛ a mi ɔ, ngɔ a na amɛ, kɛ a jijɔ ɔmɛ a mi dlami nyɔngmanyɔngma mi kakaaka kɛ ba. A ngɔ nike níhi hu babauu kɛ ba, nɛ a ba pee mɛ klɔuklɔu kɛ ha Yawɛ, a Mawu ɔ.

7 Nyɔhiɔ etɛne ɔ mi ɔ, a bɔni nike ní ɔmɛ tomi kuukuu kɛ pue si; nɛ nyɔhiɔ nɛ ji kpaago ɔ mi ɔ, a gbe nya.

8 Benɛ Matsɛ Hezekia, kɛ ganɔ ɔmɛ ba na nike ní babauu nɛ a kɛ ba a, a je Yawɛ kɛ e ma Israel ɔ a yi.

9 Matsɛ ɔ bi osɔfo ɔmɛ, kɛ Levi bi ɔmɛ nike ní ɔmɛ a he sane,

10 nɛ osɔfo nɔkɔtɔma Azaria, Zadok nina a de lɛ ke, “Kɛ je be nɛ ma a kɛ nike ní ɔmɛ bɔni Yawɛ we ɔ mi bami ɔ, wa yeɔ ní nɛ wa tɔɔ, nɛ babauu piɛɔ ngɛ se. Niinɛ, Yawɛ gbaa e ma a babauu nitsɛ, nɛ nɔ́ nɛ a ye nɛ piɛ ɔ ji níhi nɛ pueɔ si ngɛ hiɛmɛ nɛ ɔ nɛ.”

11 Hezekia fa ke a dla nito hehi ngɛ Yawɛ we ɔ. Benɛ a pee ja a,

12 ma a muɔ nike ní ɔmɛ, kɛ níhi a mi dlami nyɔngmanyɔngma mi kakaaka a nɛ a ngɔ kɛ ba a kɛ ya to lejɛ ɔmɛ. Levi no ɔ nɛ a tsɛɛ lɛ Konania a ji ní ɔmɛ a nɔ hyɛlɔ nɔkɔtɔma; e setsɔ ji lɛ nitsɛ e nyɛminyumu Shimei.

13 A he piɛli ji ni nyɔngma nɛ ɔmɛ: Yehiel, Azazia, Nahat, Asahel, Yerimot, Yozabad, Eliel, Ismakia, Mahat, kɛ Benaya. Matsɛ Hezekia, kɛ osɔfo nɔkɔtɔma pe kulaa Azaria ji ni nɛmɛ nɛ to kikɛmɛ a blɔ nya nɛ ɔmɛ tsuo.

14 Nike ní ɔmɛ nɛ a kɛ ba ha Yawɛ, nɛ ji bɔhi nɛ je tsui mi faa a, nɔ nɛ a to nɛ ma he ngɛ ma a dɛ, nɛ lɛ nɔuu e maa dla ji Imna binyumu Kore, Levi no ɔ. Kore ji Yawɛ we ɔ beleku je agbo ɔ nya buli ɔmɛ a nɔkɔtɔma.

15 Ngɛ ma kpa amɛ a mi hehi nɛ osɔfo ɔmɛ ngɛ ɔ, nihi nɛ piɛ Kore he kɛ dla ní ɔmɛ pɛpɛɛpɛ ji nɛ ɔmɛ nɛ: Eden, Miniamin, Yeshua, Shemaya, Amaria, kɛ Shekania. A dla niye ní ɔ fiee kɛ ha a nyɛmimɛ Levi bi ɔmɛ ngɛ a ní tsumi nya,

16 se pi ngɛ weku nya. Nyumuhi tsuo nɛ ye jeha nyingmi etɛɛtɛ, loo nɔ́ nɛ pe ja, nɛ a ya sɔmɔɔ ngɛ Yawɛ we ɔ mi daa ligbi ɔ, a dla niye ní ha mɛ hulɔ kaa bɔ nɛ blɔ nya nɛ a hɛɛ ɔ tsɔɔ ɔ.

17 A dla ní tsumi ɔ ha osɔfo ɔmɛ weku nya weku nya. Se Levi bi nɛ a ye jeha nyingmi enyɔɔnyɔ, loo nihi nɛ a ye pe ja a, mɛɛ lɛɛ a dla ní tsumi ɔ ha mɛ ngɛ a ní tsumi kuuhi a nya.

18 A kane osɔfo ɔmɛ tsuo pɛpɛɛpɛ, a bimɛ tsɔwitsɔwi ɔmɛ, a yi ɔmɛ, a binyumu ɔmɛ, kɛ a biyi ɔmɛ; ejakaa mɛɛ lɛɛ be tsuaa be ɔ, e sa kaa a dla a he kɛ ha a ní tsumi klɔuklɔu ɔmɛ a tsumi.

19 Osɔfohi nɛ ngɛ mahi nɛ a ngɔ kɛ ha Aaron nina a, kɛ kɔpehi nɛ bɔle jamɛ a ma amɛ a mi ɔ, a hla a ti ni komɛ nɛ a hɛ mi ka si. Mɛ lɛ a dlaa niye ní kɛ haa nyumuhi tsuo ngɛ osɔfohi a weku ɔmɛ a mi, kɛ Levi no tsuaa Levi no nɛ a ngma e biɛ ɔ.

20 Bɔ nɛ Hezekia dla niye ní ngɛ Yuda tsuo ji nɛ ɔ nɛ. E ye anɔkuale kɛ dami sane, nɛ e pee nɔ́ nɛ sa Yawɛ, e Mawu ɔ hɛ mi.

21 Hezekia ya nɔ saminya, ejakaa nɔ́ tsuaa nɔ́ nɛ e ngɛ pee ɔ, e peeɔ kɛ e tsui tsuo, kɛ Mawu gbeye yemi, Yawɛ we ɔ he ní tsumi jio, mlaa a nɔ yemi jio.