Kronika II, 22

Yuda matsɛ, Ahazia

(<x>120 8:25-29</x>; <x>120 9:21-28</x>)

1 Arabia bi komɛ ya gbe Matsɛ Yehoram binyumu ɔmɛ tsuo pɛpɛɛpɛ, nɛ a si jokuɛyo ɔ nɛ a tsɛɛ lɛ Ahazia a pɛ. Lɔ ɔ he ɔ, Yerusalem ma mi bi ɔmɛ wo Ahazia matsɛ konɛ e ye e tsɛ ɔ se.

2 Ahazia ye jeha nyingmi enyɔ kɛ enyɔ[3] benɛ e bɔni matsɛ yemi; nɛ e hi Yerusalem kɛ ye matsɛ jeha kake. E nyɛ Atalia a, Omri bibi ji lɛ. Atalia tsɛ ji Ahab.

3 Ahazia hu ya wo Ahab nane nɛ e kɛ pee yayami; ejakaa e nyɛ ji nɔ nɛ woɔ lɛ ga.

4 Ahazia pee yayami, ejakaa e tsɛ gbenɔ se ɔ, Ahab weku li ji ni nɛmɛ nɛ woɔ lɛ ga; nɛ mɛ lɛ a kpata e nane.

5 Mɛ nɔuu lɛ a wo lɛ ga nɛ e ya piɛ Israel matsɛ, Yoram, Ahab binyumu ɔ he nɛ a kɛ Siria matsɛ, Hazael ya hwu ta ngɛ Ramot nɛ ngɛ Gilead ɔ. Siria bi ɔmɛ plaa Yoram ngɛ ta a mi.

6 Lɔ ɔ he ɔ, e kpale e se kɛ ho Yezreel ma a mi ya konɛ e ya tsa e he. Yuda matsɛ, Ahazia, Yehoram binyumu ɔ hu bú e nɔ nɛ e ya slaa lɛ.

7 Se Mawu gu slaami nɛ Ahazia ya slaa Yoram ɔ nɔ nɛ e kɛ kpata Ahazia hɛ mi. Benɛ Ahazia ngɛ lejɛ ɔ, e kɛ Yoram je kpo ya na Nimshi binyumu nɛ a tsɛɛ Yehu ɔ. Lɛ ji nɔ nɛ Yawɛ hla kɛ to nɛ e ba kpata Ahab we ɔ hɛ mi.

8 Benɛ Yehu nyɛɛ Ahab weku li ɔmɛ, kɛ e huɛmɛ ɔmɛ a se nɛ e ngɛ mɛ gbee ɔ, e ya na Yuda ganɔ komɛ, kɛ Ahazia nyɛmimɛ ɔmɛ a bimɛ nɛ nyɛɛ Ahazia se kɛ ya slaa Yoram ɔ. Yehu gbe mɛ tsuo pɛpɛɛpɛ.

9 A hla Ahazia kɛ kpa si kɛ ya si a ya nu lɛ ngɛ Samaria, he nɛ e ya laa e he ngɛ ɔ. A ngɔ lɛ kɛ ba Yehu ngɔ, nɛ a ba gbe lɛ. Se kɛ̃ ɔ, bumi nɛ a ngɛ kɛ ha e nɛ̃, Matsɛ Yehoshafat he je ɔ, a pu lɛ; ejakaa Yehoshafat sɔmɔ Yawɛ kɛ e tsui tsuo. Nɛ e pee ja a, nɔ ko pa be Ahazia weku ɔ mi hu nɛ ma nyɛ maa ye matsɛ.

Yuda manyɛ, Atalia

(<x>120 11:1-3</x>)

10 Benɛ Matsɛ Ahazia nyɛ, Atalia na le kaa a gbe e binyumu ɔ, e ha nɛ a kpata Yuda matsɛ we mi bimɛ ɔmɛ tsuo a hɛ mi.

11 Se Ahazia ngɛ nyɛmiyo ko nɛ a tsɛɛ lɛ Yehosheba, nɛ gba osɔfo ko nɛ a tsɛɛ lɛ Yehoyada. Yehosheba ku Ahazia binyumu ɔmɛ a ti nɔ kake nɛ a tsɛɛ lɛ Yoash ɔ kɛ je matsɛbinyumu ɔmɛ nɛ a yaa gbe ɔ a kpɛti. E ngɔ jokuɛ ɔ kɛ jokuɛ ɔ bimɛanyɛ ɔ ya laa ngɛ se tsu ko mi ngɛ Yawɛ we ɔ. Kikɛ nɛ ɔ Yehosheba pee kɛ he Yoash yi wami, nɛ Atalia nine sui e nɔ.

12 Yoash hi lejɛ ɔ ngɛ laami tso mi jeha ekpa sɔuu, be mi nɛ Atalia ngɛ manyɛ yee ngɛ zugba a nɔ.