Kronika II, 13

Abiya kɛ Yeroboam hwu ta

(<x>110 15:1-8</x>)

1 Israel matsɛ, Yeroboam yi nɔ, jeha nɛ ji nyɔngma kɛ kpaanyɔ ɔ, Abiya ba bɔni tsɛ yemi ngɛ Yuda ma a nɔ.

2 E hi Yerusalem kɛ ye matsɛ jeha etɛ. E nyɛ biɛ ji Mikaya. Uriel nɛ je Gibea a bi ji lɛ. Ta ba te si ngɛ Abiya kɛ Yeroboam a kpɛti.

3 Abiya kɛ ta buli nɛ a kɔni si wa akpe lafa eywiɛ gba ta kɛ wo Yeroboam, nɛ Yeroboam kɛ lɛ hu e ta buli akpe lafa kpaanyɔ nɛ mɛ hu a kɔni si wa ya na lɛ.

4 Tabo ɔmɛ ya bua ngɛ Efraim yo ɔmɛ a nɔ. Matsɛ Abiya ya kuɔ Zemaraim yo ɔ, nɛ e kpa ngmlaa de ke, “Yeroboam kɛ Israel ma a tsuo, nyɛɛ bu mi tue!

5 Anɛ nyɛ li kaa Yawɛ, Israel Mawu ɔ, kɛ David so somi ko nɛ a be se kpalee gblegbleegble, kaa David kɛ e nina maa ye Israel nɔ matsɛ kɛ maa ya neneene lo?

6 Nebat binyumu Yeroboam te si ngɔ wo Salomo, e matsɛ ɔ.

7 Pee se ɔ, e bua yaka nimli komɛ a nya, nɛ e kɛ mɛ ya na Salomo binyumu Rehoboam. A nyɛ e nɔ nɛ e pee a suɔmi nya ní. Rehoboam nyɛ we mɛ, ejakaa e wɛ, nɛ e kpa we je mi si lolo.

8 Jehanɛ lɛɛ, he wami ɔ nɛ Yawɛ ngɔ ha David nina kaa mɛ lɛ a yeɔ matsɛ ɔ, nyɛ ngɛ hlae nɛ nyɛɛ te si kɛ si jamɛ a he wami ɔ. Nyɛ he hiɛ babauu, nɛ sika tsu na bihi, nɛ ji mawuhi nɛ Yeroboam pee kɛ ha nyɛ ɔ hu ngɛ nyɛ dɛ.

9 Nyɛ fie Yawɛ osɔfo ɔmɛ nɛ ji Aaron nina a; nyɛ fie Levi bi ɔmɛ hulɔ. A nane mi ɔ, nyɛ wo osɔfohi kaa bɔ nɛ je ma amɛ peeɔ ɔ pɛpɛɛpɛ. Nɔ tsuaa nɔ nɛ hɛɛ na ku kake, loo agbosu kpaago kɛ ba tsukɔ e he ɔ, kɛkɛ e plɛ pee osɔfo kɛ ha nyɛ yaka mawu ɔmɛ.

10 “Se wɔɔ lɛɛ Yawɛ ji wa Mawu; wa kua we lɛ. Wa ngɛ osɔfohi nɛ ji Aaron nina nɛ sɔmɔɔ Yawɛ, kɛ Levi bi nɛ piɛɔ a he kɛ tsuɔ ní.

11 Daa mɔtu kɛ gbɔkuɛ ɔ, a sãã sami bɔhi, kɛ tsopa kɛ e he via kɛ haa Yawɛ. A toɔ abolo klɛdɛɛ ɔ ngɔ fɔɔ okplɔɔ nɛ he tsɔ ko nɔ kɛ maa Yawɛ hɛ mi, nɛ daa gbɔkuɛ ɔ, a suɔ kane ɔmɛ ngɛ sika tsu kane tso ɔmɛ a nɔ. Wɔɔ lɛɛ nɔ́ nɛ Yawɛ, wa Mawu ɔ fa wɔ ke waa pee ɔ, lɔ ɔ wa peeɔ; se nyɛɛ lɛɛ nyɛ kua lɛ.

12 Mawu nitsɛ ji wa hɛ mi nyɛɛlɔ. E we osɔfo ɔmɛ ngɛ hiɛ ɔ kɛ a titimati ɔmɛ. Ke a kpa titimati ɔmɛ pɛ kɛkɛ pe wa he ose kɛ gba ta kɛ wo nyɛ ɔ nɛ. Nyɛ Israel ma, nyɛ ko gba ta kɛ wo Yawɛ, nyɛ nɛmɛ a Mawu ɔ! Nyɛ be kunimi yee!”

13 Jamɛ a be ɔ mi ɔ, Yeroboam tsɔ e ta buli ɔmɛ ekomɛ nɛ a ya wo ka ngɛ Yuda tabo ɔmɛ a se je. Tabo ɔmɛ nɛ piɛ ɔ, mɛɛ lɛɛ a ngɔ a hɛ mi ngɔ kpee Yuda tabo ɔmɛ.

14 Benɛ Yuda bi ɔmɛ maa hyɛ ɔ, a na kaa a sa a yi; he nyɛli ngɛ a hɛ mi kɛ a se tsuo. Kɛkɛ nɛ a fa kue ha Yawɛ, nɛ osɔfo ɔmɛ kpa titimati ɔmɛ.

15 Yuda bi ɔmɛ he ose, nɛ Abiya nyɛɛ a hɛ mi kɛ ya tua Israel bi ɔmɛ. Mawu ye Yeroboam kɛ Israel ma a tsuo a nɔ kunimi.

16 Israel bi ɔmɛ tu fo ngɛ Yuda bi ɔmɛ a nya, se Mawu ha nɛ Yuda bi ɔmɛ a nine su a nɔ.

17 Abiya kɛ e tabo ɔmɛ gbe Israel bi ɔmɛ basabasa; Israel ta buli nɛ a kɔni si wa akpe lafa enuɔ sɔuu nɔ ngɛ ta a mi.

18 Bɔ nɛ ba nɛ Yuda bi ɔmɛ ye Israel bi ɔmɛ a nɔ kunimi jamɛ a ligbi ɔ ji nɛ ɔ nɛ. A ye kunimi, ejakaa a ngɔ a hɛ ngɔ fɔ a nɛmɛ a Mawu ɔ nɔ.

19 Abiya nyɛɛ Yeroboam se, nɛ e ya kpɔ ma nɛ ɔmɛ ngɛ e dɛ: Betel, Yeshana, Efron, kɛ a he kɔpe ɔmɛ.

20 Yeroboam pa na we he wami ko hu ngɛ Abiya be ɔ mi. Nyagbenyagbe ɔ, Yawɛ fia lɛ nɔ nɛ e gbo.

21 Abiya lɛɛ e he wami ɔ ba pue nɔ wawɛɛ nitsɛ. E ngɔ yihi nyɔngma kɛ eywiɛ, nɛ e kɛ mɛ fɔ binyumuhi nyingmi enyɔ kɛ enyɔ, kɛ biyihi nyɔngma kɛ ekpa.

22 Abiya he sane kpahi nɛ piɛ, níhi nɛ e de, kɛ níhi nɛ e pee tsuo ɔ, a ngma ngɛ gbalɔ Ido blema sanehi womi ɔ mi.