Kronika II, 12

Egipt bi ba tua Yuda

(<x>110 14:25-28</x>)

1 Benɛ Rehoboam matsɛ yemi ɔ ba da si ɔ, e kɛ e ma a tsuo kua Yawɛ mlaa a nɔ yemi.

2 Enɛ ɔ he je ɔ, Yawɛ gbla e tue. Matsɛ Rehoboam yi nɔ jeha nɛ ji enuɔ ɔ mi ɔ, Egipt matsɛ, Shishak ba tua Yerusalem.

3 E kɛ ta zugba lɛ akpe kɛ e nya lafa enyɔ, kɛ okpɔngɔ ta buli akpe nyingmi ekpa, kɛ ta buli babauu nɛ a li a nya ba. Ta buli nɛ ɔmɛ a ti ni komɛ ji Libia bi, Suk bi, kɛ Sudan bi.

4 Shishak ngɔ mahi nɛ a fia gbogbo ngɔ wo a he ngɛ Yuda a, nɛ e ba su Yerusalem tɔɔ.

5 Kɛkɛ nɛ gbalɔ Shemaya ba Rehoboam, kɛ Yuda ganɔ ɔmɛ a ngɔ ngɛ Yerusalem. Blɔɔ Yuda ganɔ nɛ ɔmɛ ya ye Shishak gbeye, nɛ a tu fo kɛ je a ma amɛ a mi ba bua a he nya ngɛ Yerusalem. Shemaya de mɛ ke, “Bɔ nɛ Yawɛ de ji nɛ ɔ nɛ: ‘Nyɛ kua mi, lɔ ɔ he ɔ, imi hu i ngmɛɛ nyɛ he kɛ wo Shishak dɛ mi.’ ”

6 Matsɛ ɔ, kɛ Israel ganɔ ɔmɛ kplɛɛ kaa a pee yayami, nɛ a kɛ he si bami de ke, “Nɔ́ nɛ Yawɛ pee ɔ da.”

7 Benɛ Yawɛ na kaa a pia a he ɔ, e de Shemaya ekohu ke, “Akɛnɛ a pia a he he je ɔ, i be a hɛ mi kpatae; ma he a yi wami ngɛ blɔ ko nɔ. Ye mi mi fu Yerusalem, se i be Shishak nɔ gue kɛ gbla ma a tue.

8 Se kɛ̃ ɔ, a ma ba sɔmɔ Shishak, konɛ a na slɔɔto nɛ ngɛ ye sɔmɔmi, kɛ je ma amɛ a nɔ yeli ɔmɛ a sɔmɔmi ɔ mi.”

9 ⓘ Egipt matsɛ, Shishak ba tua Yerusalem niinɛ, nɛ e ngɔ ma a. E muɔ nɔ́ tsuaa nɔ́ kɛ je, june nɛ ngɛ Yawɛ we ɔ, june nɛ ngɛ matsɛ we ɔ, kɛ sika tsu tsɛ̃ihi nɛ Matsɛ Salomo pee ɔ.

10 Matsɛ Rehoboam ha nɛ a pee akɔblee tsɛ̃ihi kɛ to sika tsu tsɛ̃i ɔmɛ a nane mi, nɛ e to mɛ ngɔ wo tsɔli nɛ hyɛɛ matsɛ we ɔ agbo nya buli ɔmɛ a nɔ ɔ a dɛ mi.

11 Be tsuaa be nɛ matsɛ ɔ maa ya Yawɛ we ɔ mi ɔ, buli ɔmɛ hu maa hɛɛ tsɛ̃i ɔmɛ kɛ ba sɛ mi. Lɔ ɔ se ɔ, a maa kpale mɛ ya to ngɛ buli ɔmɛ a tsu ɔ mi ekohu.

12 Akɛnɛ Rehoboam ba e he si he je ɔ, Yawɛ mi mi fumi ɔ tsuo bɛ e nɔ, nɛ a kpataa we e hɛ mi pɛsɛpɛsɛ. Niinɛ, pee se ɔ, níhi a mi ba hi ha Yuda ekohu.

Rehoboam matsɛ yemi he sane kuku

13 Rehoboam matsɛ yemi ɔ ba he si ngɛ Yerusalem. E ye jeha nyingmi eywiɛ kɛ kake benɛ e bɔni matsɛ yemi, nɛ e hi Yerusalem kɛ ye matsɛ jeha nyɔngma kɛ kpaago. Yerusalem ji ma nɛ Yawɛ hla kɛ je Israel zugba a tsuo nɔ kaa he nɛ a ja lɛ ngɛ. Rehoboam nyɛ biɛ ji Naama; e je Amon zugba a nɔ.

14 Rehoboam pee yayami, ejakaa e pee we Yawɛ suɔmi nya ní.

15 Rehoboam he sane kɛ je sisije kɛ ya si nyagbe ɔ, a ngma lɛ tsuo ngɛ gbalɔ Shemaya blema sanehi womi ɔ, kɛ gbalɔ Ido blema sanehi womi ɔ a mi. Daa nɛ ɔ, Rehoboam kɛ Yeroboam ngɛ ta nɔ.

16 Rehoboam ba gbo, nɛ a pu lɛ ngɛ David ma a mi; nɛ e binyumu Abiya ba ye tsɛ ngɛ e se.