Kronika I, 14

David ngɛ Yerusalem

(<x>100 5:11-16</x>)

1 Tiro matsɛ, Hiram wo tsɔli blɔ kɛ ba David ngɔ. A kɛ seda tsohi ba. Kapitɛhi, kɛ tɛ gbogbo tsu mali hu piɛ a he; a ba konɛ a ba po we ha David.

2 David yɔse kaa Yawɛ to lɛ si kaa Israel matsɛ, nɛ e ha e matsɛ yemi ɔ ya nɔ ngɛ e ma, Israel ɔ he.

3 Benɛ David ba Yerusalem ɔ, e ngɔ yihi babauu, nɛ a fɔ binyumuhi kɛ biyihi ha lɛ.

4 Bimɛ nɛ a fɔ ha lɛ ngɛ Yerusalem ji Shamua, Shobab, Natan, Salomo,

5 Ibhar, Elishua, Elpelet,

6 Noga, Nefeg, Yafia,

7 Elishama, Beeliada,[10] kɛ Elifelet.

David ye Filisti bi ɔmɛ a nɔ

(<x>100 5:17-25</x>)

8 Benɛ Filisti bi ɔmɛ nu kaa a pɔ David nu nɛ a wo lɛ Israel nɔ matsɛ ɔ, mɛ tsuo pɛpɛɛpɛ a ba nɛ a ba hla nɛ a nu lɛ. David nu he, nɛ e hia konɛ e kɛ mɛ ya kpe.

9 Filisti bi ɔmɛ ba su Refaim kɔ̃ ɔ mi, nɛ a bɔni ní hami ngɛ lejɛ ɔ.

10 David bi Mawu ke, “Ma ya tua Filisti bi ɔmɛ lo? O ma je mɛ kɛ wo ye dɛ mi lo?” Yawɛ he nɔ ke, “Ee, moo ya! Bɔ tsuaa bɔ nɛ pee ɔ, ma je Filisti bi ɔmɛ kɛ wo o dɛ mi.”

11 Kɛkɛ nɛ David ya tua Filisti bi ɔmɛ ngɛ Baal Perazim, nɛ e ye a nɔ kunimi ngɛ lejɛ ɔ. E de ke, “Mawu ngɔ mi kɛ gba blɔ kɛ gblee he nyɛli ɔmɛ a ta a mi kaa pa nɛ hia lalaala kɛ bee.” Enɛ ɔ he je nɛ a wo lejɛ ɔ biɛ ke Baal Perazim[11] ɔ nɛ.

12 Filisti bi ɔmɛ tu fo kɛ je a mawu ɔmɛ a he, nɛ David ha nɛ a sã mɛ.

13 E kɛ we kulaa nɛ Filisti bi ɔmɛ kpale kɛ ba kɔ̃ ɔ mi ekohu ba bɔni ní hami ngɛ lejɛ ɔ.

14 David ya bi Mawu ga womi ekohu, nɛ Mawu de lɛ ke, “Dɛbi, ko tua mɛ ngɛ hiɛ ɔ; yaa lɔgɔ kɛ gu a se je, nɛ o ya tua mɛ ngɛ tso ɔmɛ a he ngɛ lejɛ ɔ.

15 Ke o nu nɔ́ ko nɛ ngɛ pɛe ngɛ tso ɔmɛ a yi mi kaa ta buli nɛ a ngɛ nyɛɛe ɔ, yaa nɛ o ya tua Filisti bi ɔmɛ; ejakaa imi Mawu i nyɛɛ o hɛ mi kɛ yaa nɛ ma ya gbe Filisti ta buli ɔmɛ.”

16 David pee kaa bɔ nɛ Mawu fa lɛ ɔ, nɛ e kpata Filisti bi ɔmɛ a hɛ mi kɛ je Gibeon hluu kɛ ya si Gezer tɔɔ.

17 David biɛ pɛ ngɛ je ɔ mi he tsuaa he, nɛ Yawɛ ha nɛ je ma amɛ tsuo ye lɛ gbeye.