Kronika I, 13

A ya ngɔ somi daka a kɛ je Kiriat Yearim

(<x>100 6:1-11</x>)

1 Matsɛ David kɛ e we asafoatsɛmɛ ɔmɛ nɛ ji ta buli akpehi kɛ lafahi a nyatsɛmɛ ɔmɛ kpe.

2 Lɔ ɔ se ɔ, e de Israel ma a tsuo ke, “Ke nyɛ kplɛɛ nɔ, nɛ e sa Yawɛ, wa Mawu ɔ hu hɛ mi ɔ, nyɛ ha waa tsɔ ya de wa nyɛmimɛ ɔmɛ nɛ piɛ ngɛ Israel zugba a mi ɔ, kɛ osɔfo ɔmɛ, kɛ Levi bi ɔmɛ ngɛ a ma amɛ a mi, nɛ a kɛ wɔ ba kpe ngɛ hiɛ ɔ.

3 Kɛkɛ ɔ, wa ma ya ngɔ Mawu somi daka a kɛ ba; ejakaa kɛ je be nɛ Saul ba bɔni tsɛ yemi ɔ, wa ya bi we si.”

4 Ga nɛ David wo nɛ ɔ sa ma a hɛ mi, nɛ nɔ tsuaa nɔ kplɛɛ kaa a pee ja.

5 ⓜ Kɛkɛ nɛ David kpee Israel ma a tsuo, konɛ a ya ngɔ Mawu somi daka a kɛ je Kiriat Yearim kɛ ba. E bua ma a nya kɛ je zugba a tsuo nɔ; kɛ je Egipt huzu ɔ nya ngɛ leneyi je, hluu kɛ ya si Hamat tɔɔ ngɛ omleyi je.

6 ⓝ David kɛ Israel ma a ho Yuda zugba a nɔ ya konɛ a ya ngɔ Mawu somi daka a ngɛ Baala nɛ e biɛ kpa ji Kiriat Yearim ɔ. Somi daka nɛ ɔ, a kɛ Yawɛ nɛ hii kerub ɔmɛ a kpɛti ɔ biɛ tsɛɔ lɛ.

7 A ya ngɔ Mawu somi daka a ngɛ Abinadab we ɔ mi, nɛ a kɛ ma tlɔɔke he mi. Uza kɛ Ahio ji ni nɛmɛ nɛ ngɛ tlɔɔke ɔ blɔ tsɔɔe.

8 Jamɛ a be ɔ mi ɔ, David kɛ Israel ma a tsuo ngɛ lae nɛ a ngɛ doe kɛ a he wami tsuo kɛ ngɛ Mawu hɛ mi nyami woe. A la, nɛ a fiɛ do, nɛ a fia saku slɔɔtohi, kpa sakuhi, ngmlɛhi, kɛ gɔgɔhi; nɛ a kpa titimatihi.

9 Benɛ a su Kidon ngma mi sami he ɔ, na amɛ nɛ ngɛ tlɔɔke ɔ gblae ɔ a nane tɛ si, nɛ daka a mimiɛ. Lɔ ɔ he ɔ, Uza nu daka a kɛ da si.

10 Se Yawɛ mi mi fu Uza, nɛ e fia lɛ nɔ nɛ e gbe ngɛ lejɛ ɔ, ejakaa e nine ta daka a he. Uza gbo ngɛ lejɛ ɔ ngɛ Mawu hɛ mi.

11 Lɔ ɔ he ɔ, a wo lejɛ ɔ biɛ ke Perez Uza,[9] nɛ ja a tsɛɔ lɛ kɛ ba si mwɔnɛ ɔ. E dɔ David kaa Yawɛ ngɔ abofu kɛ gbla Uza tue.

12 David ye Mawu gbeye jamɛ a ligbi ɔ, nɛ e bi ke, “Lɛɛ kɛ ma pee kɛ ngɔ somi daka a kɛ ya we mi kɛɛ?”

13 Enɛ ɔ he je ɔ, David kɛ somi daka a yɛ Yerusalem. Mohu ɔ, e kɛ somi daka a ya ma Obed Edom nɛ je Gat ɔ we mi.

14 ⓞ Mawu somi daka a hi Obed Edom we ɔ mi nyɔhiɔ etɛ; nɛ Yawɛ gbaa Obed Edom kɛ e we ɔ, kɛ e nɔ́ tsuaa nɔ́.