Matsɛmɛ II, 4

Elisha pee yalɔyo ohiatsɛ ko kpakpa

1 Gbali ɔmɛ a kuu ɔ mi no ko e yo ya fa kue ha Elisha, nɛ e de lɛ ke, “O tsɔlɔ, nɛ ji imi lɛɛ ye huno ɔ, e gbo. Nɛ kaa bɔ nɛ o le ɔ, o tsɔlɔ ɔ yeɔ Yawɛ gbeye. Se nyumu ko nɛ e ya pa sika ngɛ e dɛ ɔ ba nu ye binyumuwi enyɔ ɔmɛ kɛ pee e nyɔguɛhi.”

2 Elisha bi lɛ ke, “Mɛni ma pee ha mo? Mo de mi. Mɛni ngɛ o dɛ ngɛ we ɔ mi?” Yo ɔ he nɔ ke, “I kpa mo pɛɛ, i be nɔ́ ko nɔ́ ko ngɛ we ɔ mi, ja nu tɔ kake pɛ.”

3 Elisha de lɛ ke, “Jee kpo nɛ o ya ba buɛ mi guhi abɔ nɛ o ma na ngɛ o huza nɔ bi ɔmɛ a dɛ kɛ ba.

4 Lɔ ɔ se ɔ, moo sɛ tsu mi nɛ o nga sinya kɛ wo o kɛ o bimɛ ɔmɛ nyɛ yi. Nyɛ plɛ nu ɔ kɛ wo buɛ ɔmɛ a mi. Ke eko hyi ɔ, a hɛ lɛ kɛ ya se.”

5 Yo ɔ ho nɛ e kɛ e bimɛ ɔmɛ ya sɛ tsu mi nɛ a nga sinya kɛ wo a yi. Be mi nɛ e bimɛ ɔmɛ ngɛ buɛ ɔmɛ muɔe kɛ ngɛ bae ɔ, yo ɔ lɛɛ e ngɛ buɛ ɔmɛ a mi nu woe.

6 Benɛ buɛ ɔmɛ tsuo hyi ɔ, yo ɔ tsɛ e binyumu, nɛ e de lɛ ke e ngɔ buɛ ɔ eko kɛ ba. Se e binyumu ɔ he nɔ ke, “Buɛ kpa ko be hu!” Kɛkɛ nɛ nu ɔ se po.

7 Yo ɔ ho nɛ e ya bɔ Mawu nɔmlɔ ɔ amaniɛ. Nɛ gbalɔ ɔ de lɛ ke, “Yaa nɛ o ya jua nu ɔ nɛ o kɛ wo o he hiɔ ɔmɛ. Nɔ́ nɛ maa piɛ ngɛ se ɔ, o kɛ o bimɛ ɔmɛ nyɛɛ ngɔ nɛ nyɛ kɛ hyɛ nyɛ he nɔ.”

Elisha kɛ Shunem yo niatsɛ ɔ

8 Ligbi ko ɔ, Elisha ya Shunem, nɛ e ya na yo niatsɛ ko ngɛ lejɛ ɔ. Yo ɔ fa kue ha lɛ ke e ye nɔ́ ko doo. Lɔ ɔ he ɔ, be tsuaa be nɛ e maa be ngɛ jamɛ a blɔ ɔ nɔ ɔ, e ma gba yo ɔ we ɔ mi ya ye ní.

9 Yo ɔ de e huno ke, “Jehanɛ i yɔse kaa nyumu ɔ nɛ pɔɔ wa ngɔ hiɛmɛ nɛ ɔ gumi ɔ, Mawu nɔmlɔ klɔuklɔu ji lɛ.

10 Ha nɛ waa pee tsu nyafii ko ha lɛ ngɛ tsu ɔ yi mi, nɛ waa wo mi sa tso, okplɔɔ, sɛ, kɛ kane, konɛ be tsuaa be nɛ e maa ba wa ngɔ ɔ, e ba hi lejɛ ɔ.”

11 Ligbi ko ɔ, Elisha ba Shunem, nɛ e be kɛ ho e tsu ɔ mi ya nɛ́ e ya jɔɔ e he ngɛ lejɛ ɔ.

12 E tsɔ e tsɔlɔ Gehazi ke e ya tsɛ Shunem yo ɔ kɛ ba. Nɛ yo ɔ ba da si ngɛ Elisha hɛ mi.

13 Elisha de Gehazi ke, “Mo bi yo ɔ ke dengme nɛ ɔ tsuo nɛ e ngɛ gboe ngɛ wa he ɔ, mɛni e suɔ kaa ma pee ha lɛ? Anɛ e ngɛ sane ko nɛ e maa suɔ nɛ ma kɛ ya fɔ matsɛ, loo asafoatsɛ hɛ mi ha lɛ lo?” Yo ɔ he nɔ ke, “Nɔ́ ko nɔ́ ko he hia we mi; imi nitsɛ ye ma mi bi a kpɛti nɛ i ngɛ.”

14 Elisha bi Gehazi ke, “Lɛɛ mɛni ma pee ha lɛ mɔ?” E he nɔ ke, “Anɔkuale mi ɔ, e be binyumu; nɛ e huno ɔ hu bwɔ.”

15 Elisha de Gehazi ke, “De yo ɔ ke e ba.” Yo ɔ ba nɛ e ba da si ngɛ sinya a nya,

16 ⓔ nɛ Elisha de lɛ ke, “Hwɔɔ se jeha be nɛ ɔ mi ɔ, o maa hɛɛ binyumu ngɛ o kɔni bɔkɔ mi.” Yo ɔ de lɛ ke, “Dɛbi! Ye nyɔmtsɛ, koo mlɔɔ mi; Mawu nɔmlɔ ji mo!”

17 Se yo ɔ na mi, nɛ benɛ jeha ke e suu ɔ, e fɔ binyumu kaa bɔ nɛ Elisha de lɛ ɔ.

18 Jokuɛ nyumuyo ɔ ba wa. Ligbi ko benɛ e tsɛ kɛ ngma kpali ɔmɛ ngɛ ní tsue ngɛ ngmɔ nɔ ɔ, jokuɛ ɔ ho e tsɛ ɔ ngɔ ya ngɛ lejɛ ɔ.

19 Kɛkɛ nɛ e de e tsɛ ɔ ke, “Ye yi! Ye yi!” E tsɛ ɔ de e tsɔli ɔmɛ a ti nɔ kake ke, “Wo lɛ kɛ ya ha e nyɛ!”

20 Tsɔlɔ ɔ ngɔ jokuɛ nyumuyo ɔ kɛ ya ha e nyɛ, nɛ e nyɛ ɔ ngɔ lɛ kɛ fɔ e tɛ nɔ hluu kɛ ya si piani, kɛkɛ nɛ e gbo.

21 E nyɛ ɔ ngɔ lɛ ya fɔ Mawu nɔmlɔ ɔ sa a nɔ ngɛ hiɔwe tsu ɔ mi. E ngmɛ sinya a mi kɛ wo e yi, nɛ e je kpo.

22 Kɛkɛ nɛ e tsɔ ya de e huno ɔ ke, “Ha nɛ tsɔli ɔmɛ a ti nɔ kake nɛ ngɔ teji yo kake kɛ ba ha mi nɛ ma sa fo kɛ ya Mawu nɔmlɔ ɔ ngɔ nɛ ma ba.”

23 E huno ɔ bi lɛ ke, “Mɛni he je o yaa Mawu nɔmlɔ ɔ ngɔ mwɔnɛ ɔ? Tsa pi Nyɔhiɔhe nyami be, aloo Hejɔɔmi ligbi ji mwɔnɛ ɔ.” E he nɔ ke, “E pee we nɔ́ ko!”

24 Kɛkɛ nɛ e mia teji yo ɔ, nɛ e de e tsɔlɔ ɔ ke, “Moo wo lohwe ɔ fo mlamlaamla nɛ waa ho; ko gbɔjɔ mi kɛ yaa si ma de mo loko o pee ja!”

25 Yo ɔ pue nɔ kɛ ho Karmel yo ɔ nɔ he nɛ Elisha ngɛ ɔ ya. Benɛ Mawu nɔmlɔ ɔ na yo ɔ nɛ ma ngɛ tsitsaa a, e de e tsɔlɔ Gehazi ke, “Hyɛ, Shunem yo ɔ lɛ ma a nɛ!

26 Tuu fo nɛ o kɛ lɛ ya kpe, nɛ o bi lɛ ke e ngɛ saminya lo. Bi lɛ ke e huno ɔ kɛ e binyumuyo ɔ hu ngɛ saminya lo.” Yo ɔ de Gehazi ke mɛ tsuo a ngɛ saminya,

27 se benɛ e ba su Mawu nɔmlɔ ɔ ngɔ ngɛ yo ɔ nɔ ɔ, e nu Mawu nɔmlɔ ɔ nane. Nɛ jinɛ Gehazi ka kaa e ma tsitsɛɛ lɛ kɛ je lejɛ ɔ, se Elisha de lɛ ke, “Moo ngmɛɛ e he; o nɛ kaa nɔ́ ko ngɛ lɛ haoe lo? Nɛ Yawɛ kɛ nɔ́ nɛ ɔ laa mi, nɛ e de we mi.”

28 Kɛkɛ nɛ yo ɔ de lɛ ke, “Ye nyɔmtsɛ, anɛ i bi mo ke o ha mi binyumu lo? Anɛ i de we mo ke o ko mlɔɔ mi lo?”

29 Elisha de Gehazi ke, “Esɔ! Moo mia! Ngɔɔ ye dɛma tso ɔ nɛ o ho! Ke o kɛ nɔ ko kpe ngɛ blɔ ɔ nɔ ɔ, ko nga lɛ; ke nɔ ko nga mo ɔ, ko he nɔ. Yaa tɛɛ, nɛ o ya wo ye dɛma tso ɔ nɔ ngɛ jokuɛ ɔ hɛ mi.”

30 Yo ɔ de Elisha ke, “I na Mawu, nɛ i na mo nitsɛ hu o nane kaa i be o he jee.” Lɔ ɔ he ɔ, Elisha te si nɛ e kɛ yo ɔ ho.

31 Gehazi sɛ a hlami, nɛ e ya wo Elisha dɛma tso ɔ nɔ ngɛ jokuɛ ɔ hɛ mi. Se gbi ko pɛ́, nɛ okadi ko hu be nɛ tsɔɔ kaa jokuɛ ɔ ngɛ wami mi. Lɔ ɔ he ɔ, e kpale e se nɛ e kɛ Elisha ba kpe, nɛ e de lɛ ke, “Jokuɛ ɔ ti si.”

32 Benɛ Elisha ya su we ɔ mi ɔ, lɛ nɔ kake e ya sɛ tsu ɔ mi, nɛ e na jokuɛ ɔ nɛ gbo kɛ fɔɔ si ngɛ e sa a nɔ.

33 E nga sinya a kɛ wo mɛ ni enyɔ ɔmɛ a yi, nɛ e fa kue ha Yawɛ.

34 ⓕ Lɔ ɔ se ɔ, Elisha ya bu jokuɛ ɔ nɔ; e kɛ e nya to jokuɛ ɔ nya he, e hɛngmɛhi ngɛ e hɛngmɛhi a nɔ, nɛ e ninehi pueɔ si ngɛ jokuɛ ɔ hu e ninehi a nɔ. Benɛ e kpã e mi ngɛ jokuɛ ɔ nɔ ɔ, jokuɛ ɔ he bɔni la dɔmi.

35 Elisha te si nɛ e nyɛɛ kɛ ya kɛ ba ngɛ tsu ɔ mi, nɛ e ho ya bu jokuɛ ɔ nɔ ekohu. Kɛkɛ nɛ jokuɛ ɔ tsile si kpaago; nɛ lɔ ɔ se ɔ, e bli e hɛngmɛ.

36 Elisha tsɛ Gehazi nɛ e de lɛ ke, “Yaa nɛ o ya tsɛ Shunem yo ɔ kɛ ba!” Benɛ yo ɔ ba a, e de lɛ ke, “Ba he o binyumu ɔ!”

37 Yo ɔ kpla si ngɛ Elisha nane nya, nɛ e kɛ e hɛ mi bu si, nɛ e ngɔ e binyumu ɔ kɛ je kpo.

Nyakpɛ nɔ́ enyɔ kpa komɛ

38 Benɛ Elisha kpale e se kɛ ba Gilgal ɔ, jamɛ a be ɔ mi ɔ, hwɔ ba zugba a nɔ. Ligbi ko, benɛ gbali a kuu ɔ hii si ngɛ e hɛ mi nɛ e ngɛ mɛ ní tsɔɔe ɔ, e de e tsɔlɔ ɔ ke, “Ngɔɔ pɔ buɛ agbo ɔ kɛ ma la nɔ, nɛ o pee ní ha gbali a kuu ɔ nɛ a ye.”

39 A ti nɔ kake ho nga a nɔ ya nɛ e ya tsɔ pui ba kɛ ba; se e ya tsɔ nga mi atlɛ mohu babauu. Benɛ e ba a, e poo a mi tsɔwitsɔwi kɛ wo pɔ buɛ ɔ mi; se e li nɔ́ nɛ ji.

40 Kɛkɛ nɛ a plɛ flɔɔ ɔ kɛ ha ni ɔmɛ nɛ a ye. Se benɛ a ngɛ ní ɔ yee ɔ, a kpa ngmlaa ke, “Mawu nɔmlɔ, duɔ ngɛ ní ɔ mi!” Nɛ a jɔɔ ní ɔ yemi.

41 Elisha de ke a ha lɛ mamu; nɛ e kɛ mamu ɔ wo buɛ ɔ mi, nɛ e de ke, “Plɛ flɔɔ ɔ ha ni ɔmɛ nɛ a ye!” Jehanɛ, nɔ́ yobu ko be mi hu.

42 Be kpa mi ɔ, nyumu ko je Baal Shalisha kɛ ba, nɛ e ba ke Mawu nɔmlɔ ɔ abolo bɔbɔɛ nyingmi enyɔ nɛ a kɛ akoko kpokploku pee, kɛ blɛfo tso mumu ngɛ kotoku mi. Elisha de e tsɔlɔ ɔ ke, “Ngɔɔ ya ha ni ɔmɛ nɛ a ye.”

43 Se e tsɔlɔ ɔ de ke, “Nɔ́ nɛ ɔ tsa be nimli lafa sue!” Elisha ti mi nɛ e de lɛ ekohu ke, “Ngɔɔ ya ha ni ɔmɛ nɛ a ye; ejakaa bɔ nɛ Yawɛ de ji nɛ ɔ nɛ: ‘A maa ye hluu nɛ eko maa piɛ.’ ”

44 Kɛkɛ nɛ tsɔlɔ ɔ ngɔ ní ɔ ya ha mɛ. Nɛ kaa bɔ nɛ Yawɛ de to ɔ, mɛ tsuo a ye; se kɛ̃ ɔ, eko piɛ.