Matsɛmɛ II, 3

Israel kɛ Moab hwu ta

1 Yuda matsɛ, Yehoshafat yi nɔ jeha nɛ ji nyɔngma kɛ kpaanyɔ ɔ mi ɔ, Ahab binyumu Yehoram ba ye matsɛ ngɛ Israel ma a nɔ. E hi Samaria kɛ ye matsɛ jeha nyɔngma kɛ enyɔ.

2 E ngɛ mi kaa e pee yayami kɛ si Yawɛ lɛɛ, se e hi kulaa pe e tsɛ kɛ e nyɛ; ejakaa Baal amaga amɛ nɛ e tsɛ puɛ ɔ, e ku mɛ kɛ pue he.

3 Se kaa bɔ nɛ Matsɛ Yeroboam, Nebat binyumu ɔ pee ɔ, Yehoram hu nyɛɛ Israel hɛ mi kɛ pee yayami nɛ e kpa we.

4 Moab matsɛ, Mesha a, to lɛlɔ ji lɛ; nɛ daa jeha a, e ya haa Israel matsɛ jijɔ akpe lafa, kɛ agbosuhi a he bwɔmi akpe lafa.

5 Se benɛ Israel matsɛ, Ahab gbo ɔ, Mesha tsɔ Israel hɛ mi atuã.

6 Lɔ ɔ he ɔ, Matsɛ Yehoram je Samaria nɔuu, nɛ e ho ya bua Israel tsuo nya.

7 E tsɔ ya de Yuda matsɛ, Yehoshafat ke, “Moab matsɛ tsɔ ye hɛ mi atuã. Anɛ o maa piɛ ye he nɛ i kɛ lɛ ya hwu ta lo?” Yehoshafat he nɔ ke, “I ma ya! Ye nɔ́ ko ɔ, mo hu o nɔ́; imi nɔmlɔ ɔ nitsɛ jio, ye ma a jio, ye okpɔngɔ ɔmɛ jio.”

8 E ya nɔ nɛ e bi lɛ ke, “Jije wa maa gu kɛ ya?” Yehoram he nɔ ke, “Wa maa gu Edom nga a nɔ.”

9 Kɛkɛ nɛ Israel, Yuda, kɛ Edom matsɛmɛ ɔmɛ pue nɔ kɛ ho. Benɛ a ya wo lalaalo kɛ nyɛɛ ligbi kpaago ɔ, a nɛ nyu ha ta buli ɔmɛ, kɛ a lohwe ɔmɛ.

10 Kɛkɛ nɛ Israel matsɛ ɔ de ke, “Akuanyɛ! Yawɛ ngɔ wɔ matsɛmɛ etɛ nɛ ɔmɛ kɛ wo Moab dɛ mi!”

11 Yehoshafat bi ke, “Anɛ Yawɛ gbalɔ ko be hiɛmɛ nɛ ɔ nɛ wa ma bi Yawɛ ga womi ngɛ e ngɔ lo?” Israel matsɛ tsɔli ɔmɛ a ti nɔ kake he nɔ ke, “Shafat binyumu Elisha, Eliya tsɔlɔ ɔ ngɛ hiɛ ɔ.”

12 Yehoshafat de ke, “Gbalɔ kpakpa ji lɛ.” Kɛkɛ nɛ matsɛmɛ etɛ ɔmɛ pue nɔ kɛ ho Elisha ngɔ ya.

13 Elisha de Israel matsɛ ɔ ke, “Mɛni sane i kɛ mo ngɛ? Yaa o tsɛ kɛ o nyɛ a gbali ɔmɛ a ngɔ.” Israel matsɛ ɔ de lɛ ke, “Dɛbi, Yawɛ ji nɔ nɛ ngɔ wɔ matsɛmɛ etɛ nɛ ɔmɛ kɛ wo Moab matsɛ ɔ dɛ mi ɔ nɛ.”

14 Elisha de lɛ ke, “I na Yawɛ Tabohiatsɛ ɔ nɛ i sɔmɔɔ lɛ ɔ, kaa ke pi Yuda matsɛ, Yehoshafat hɛ mi zo nɛ i gbo ɔ, jinɛ i be mo kpɛe, nɛ ma ba de ke ma hyɛ o hɛ mi po.

15 Se kɛ̃ nyɛ hla saku fialɔ ko ha mi.” Benɛ saku fialɔ ɔ ngɛ e saku ɔ fiae ɔ, Yawɛ he wami ɔ ba Elisha nɔ,

16 nɛ e de ke, “Bɔ nɛ Yawɛ de ji nɛ ɔ nɛ: ‘Ma ha nyu ma hyi nyu dɔ nɛ gbli nɛ ɔ.

17 Kɔɔhiɔ be fiae, nɛ hiɔmi hu be nɛe; se kɛ̃ ɔ, nyu dɔ nɛ ɔ ma hyi tɔ kɛ nyu. Nɛ nyɛɛ kɛ nyɛ we mi lohwehi, kɛ lohwehi nɛ tlooɔ tlomi ma na nyu maa nu.’ ”

18 Elisha ya nɔ nɛ e de ke, “Nɔ́ nɛ ɔ peemi pi nɔ́ ko kulaa nɛ he wa ha Yawɛ. Yawɛ maa ngɔ Moab bi ɔmɛ hu kɛ wo nyɛ dɛ mi.

19 Nyɛ maa ngɔ a ma kpakpa amɛ, kɛ mahi nɛ a fia gbogbo kɛ wo a he ɔ tsuo. Nyɛ maa poo tso kpakpa tsuaa tso kpakpa; nyɛ maa tsi nyu vu ɔmɛ tsuo, nɛ nyɛ maa ngɔ tɛ kɛ ha a zugba kpakpa amɛ tsuo a hɛ mi.”

20 E nɔ jena mɔtu, maa pee bɔ sami be ɔ, nyu je Edom blɔ kɛ ba; nɛ zugba a nɔ hyi tɔ kɛ nyu.

21 Benɛ Moab bi ɔmɛ tsuo nu kaa matsɛmɛ etɛ ɔmɛ ma nɛ a kɛ mɛ ba hwu ta a, a ya kpee nɔ tsuaa nɔ nɛ su ta yami nya kɛ je jokuɛyo pe kulaa nɔ kɛ ya si nɔkɔtɔma pe kulaa nɔ kɛ ba da ma a huzu nya.

22 Benɛ Moab bi ɔmɛ te si mɔtu kpla a, pu ngɛ nyu ɔ hɛ mi kpɛe; nɛ a na kaa nyu ɔ nɛ ngɛ a hanɔ ɔ pee tsutsuutsu kaa muɔ.

23 Kɛkɛ nɛ a de ke, “Muɔ ji nɛ ɔ nɛ! Matsɛmɛ ɔmɛ kɛ mɛ nitsɛmɛ a he hwu ta nɛ a gbe a he. Moab bi, nyɛ ha waa ho nɛ wa ya ha ní!”

24 Benɛ a ba su Israel bi ɔmɛ a sito he ɔ, Israel bi ɔmɛ te si nɛ a tua mɛ. Moab bi ɔmɛ tu fo, se Israel bi ɔmɛ nyɛɛ a se nɛ a gbe mɛ ngɔ pue si ngɛ blɔ ɔ nɔ,

25 nɛ a kpata a ma amɛ a hɛ mi. Zugba kpakpa amɛ lɛɛ nɔ tsuaa nɔ fɔ tɛ kɛ pue a nɔ, kɛ ya si tɛ ɔmɛ ha zugba amɛ a nɔ A tsi nyu vu ɔmɛ tsuo, nɛ a poo tso kpakpa amɛ hulɔ. Kir Heres nɛ ji ma ngua a pɛ nɛ a si; se amlami tɛ fiali ɔmɛ ya sa jamɛ a ma a po yi nɛ a tua lɛ.

26 Benɛ Moab matsɛ ɔ na kaa e nine kpi ta a he ɔ, e hla klaate hɛɛli lafa kpaago nɛ e ka kaa e kɛ mɛ maa gu he nyɛli ɔmɛ a ta a mi pani nya kɛ ya Edom matsɛ ɔ ngɔ; se a nyɛ we.

27 Lɔ ɔ he ɔ, e nu e bitɛte, nɔ nɛ jinɛ lɛ nɛ e ma ba ye matsɛ ngɛ e se ɔ, nɛ e kɛ lɛ sã sami bɔ ngɛ gbogbo ɔ nɔ. Israel bi ɔmɛ ye gbeye wawɛɛ nitsɛ. Lɔ ɔ he ɔ, a je ma a mi, nɛ a kpale kɛ ho mɛ nitsɛmɛ a zugba nɔ ya.