Matsɛmɛ II, 12

Yuda matsɛ, Yoash

(<x>140 24:1-16</x>)

1 Israel matsɛ, Yehu yi nɔ jeha nɛ ji kpaago ɔ, Yoash ba bɔni tsɛ yemi ngɛ Yuda ma a nɔ. E hi Yerusalem kɛ ye matsɛ jeha nyingmi eywiɛ. E nyɛ biɛ ji Zibia, nɛ e je Beersheba ma a mi.

2 Yoash pee Yawɛ suɔmi nya ní e wami be ɔ tsuo, ejakaa osɔfo Yehoyada ji nɔ nɛ tsɔse lɛ.

3 Se wɔ jami he ɔmɛ ɔ, e puɛ we mɛ; enɛ ɔ he je ɔ, ma a sãã bɔ, kɛ tsopa kɛ e he via ngɛ lejɛ ɔmɛ kɛ mwɔɔ.

4 ⓣ Ligbi ko ɔ, Yoash de osɔfo ɔmɛ ke sika tsuo pɛpɛɛpɛ nɛ ma a kɛ baa Yawɛ we ɔ kaa nike ní klɔuklɔu ɔ, a ngɔ kɛ to. Lɔ ɔ ji sika nɛ nyumu tsuaa nyumu haa be mi nɛ a kane lɛ, sika nɛ nɔ tsuaa nɔ haa kɛ kpɔɔ e susuma, kɛ sika nɛ nɔ ko haa kɛ jeɔ lɛ nitsɛ e tsui mi.

5 Osɔfo tsuaa osɔfo nɛ e he sika a ngɛ lɛ nitsɛ e we asafo bi a dɛ, konɛ be tsuaa be nɛ e maa hia kaa a dla Yawɛ we ɔ, a ngɔ sika a kɛ dla lɛ.

6 Se kɛ ba si Matsɛ Yoash tsɛ yemi jeha nɛ ji nyingmi enyɔ kɛ etɛ ɔ, osɔfo ɔmɛ dla we Yawɛ we ɔ he ko he ko.

7 Lɔ ɔ he ɔ, Matsɛ Yoash tsɛ osɔfo Yehoyada, kɛ osɔfo kpa amɛ nɛ e de mɛ ke, “Mɛni he je nɛ nyɛ dla we Yawɛ we ɔ? Jehanɛ, nyɛ ko ngɔ sika ko ngɛ nyɛ asafo bi ɔmɛ a dɛ hu; sika tsuaa sika nɛ nyɛ nine maa su nɔ ɔ, nyɛɛ ngɔ kɛ ba nɛ a kɛ dla Yawɛ we ɔ.”

8 Osɔfo ɔmɛ kplɛɛ kaa a be sika ko ngɔe ngɛ ma a dɛ hu; mɛ nitsɛmɛ hu a be Yawɛ we ɔ dlae.

9 Osɔfo Yehoyada ngɔ daka ko ya ma bɔ sami la tɛ ɔ kasa nya, nɛ e gu puɔ ngɛ nya nɔ́ ɔ yi mi. Ke o yaa Yawɛ we ɔ, daka a ngɛ o hiɔ nɔ. Osɔfohi nɛ buɔ agbo ɔ nya a ngɔɔ sika tsuo nɛ ma a kɛ baa Yawɛ we ɔ kɛ woɔ daka nɛ ɔ mi.

10 Ke a na kaa sika a hiɛ ngɛ daka a mi ɔ, matsɛ pɛdiyo ɔ, kɛ osɔfo nɔkɔtɔma pe kulaa a maa ya Yawɛ we ɔ, nɛ a ma ya kane sika nɛ a na ngɛ lejɛ ɔ. Kɛkɛ a fi kɛ wo kotokuhi a mi.

11 Lɔ ɔ se ɔ, a maa tu sika a kɛ wo Yawɛ we ɔ ní tsuli ɔmɛ a nɔ hyɛli ɔmɛ a dɛ. Mɛ hu a kɛ sika a maa wo tso he ní tsuli, tsu mali,

12 gbogbo fiali, kɛ tɛ koli nɛ tsuɔ ní ngɛ Yawɛ we ɔ hiɔ. A kɛ sika nɛ ɔ eko ma he tso kɛ tɛ nɛ a kó, nɛ a kɛ ma dla Yawɛ we ɔ. A kɛ eko hu maa wo Yawɛ we ɔ dlami hiɔ kpahi.

13 Sika nɛ a kɛ baa Yawɛ we ɔ, a ngɔɛ eko kɛ pee we sika hiɔ kpluhi, la gbemi níhi, kahi kɛ titimatihi, aloo sika tsu níhi, aloo sika hiɔ ní kpa komɛ kɛ ha Yawɛ we ɔ.

14 Se mohu, a kɛ haa ní tsuli ɔmɛ, nɛ mɛ hu a kɛ dlaa Yawɛ we ɔ.

15 ⓤ Ni nɛmɛ nɛ a kɛ sika a woɔ a dɛ loko mɛ hu a ngɔɔ kɛ haa ní tsuli ɔmɛ ɔ, a kɛ mɛ pee we sika a he akɔtaa; ejakaa a yeɔ anɔkuale saminya.

16 ⓥ Fɔ yemi bɔ sika a, kɛ yayami pami bɔ sika a lɛɛ a ngɔɛ kɛ bɛ Yawɛ we ɔ; osɔfo ɔmɛ a nɔ ji lɔ ɔ nɛ.

17 Jamɛ a be ɔ, Siria matsɛ, Hazael ya tua Gat, nɛ e ngɔ ma a; nɛ e to e yi mi kaa e ma ya tua Yerusalem hulɔ.

18 Nike ní klɔuklɔuhi tsuo nɛ Yehoshafat, Yehoram, kɛ Ahazia, nɛ ji Yuda matsɛmɛ nɛ nyɛɛ Yoash hɛ mi ɔ gbaa nɔ kɛ ha Yawɛ ɔ, Matsɛ Yoash ngɔ. E kɛ lɛ nitsɛ e ní klɔuklɔu ɔmɛ, kɛ sika tsuo nɛ a na ngɛ Yawɛ we ɔ, kɛ matsɛ we ɔ nito he ɔmɛ piɛ he, nɛ e tsɔ nɛ a ngɔ ya ha Siria matsɛ, Hazael. Kɛkɛ nɛ Hazael kpale e se kɛ je Yerusalem.

19 Matsɛ Yoash he sane kpahi, kɛ níhi tsuo nɛ e pee ɔ, a ngma ngɛ Yuda Matsɛmɛ ɔmɛ a Yi nɔ Sanehi Womi ɔ mi.

20 Matsɛ Yoash tsɔli ɔmɛ so e yi nɔ nɛ a ti nihi enyɔ gbe lɛ ngɛ Milo we ɔ, ngɛ blɔ ɔ nɛ a guu kɛ yaa Sila a nɔ. Shimeat binyumu Yozakar, kɛ Shomer binyumu Yehozabad ji ni nɛmɛ nɛ gbe lɛ ɔ nɛ. A pu Yoash ngɛ matsɛmɛ ɔmɛ a yɔkɔ ɔ mi ngɛ David ma a mi, nɛ e binyumu Amazia ba ye matsɛ ngɛ e se.