Matsɛmɛ I, - Introduction

NYA TSƆƆMI

Níhi nɛ ngɛ Matsɛmɛ ɔmɛ a Kekleekle Womi ɔ mi ji Israel ma a blema sanehi nɛ kɔɔ matsɛ yemi he. Wa naa sane nɛ ɔmɛ a sisije ngɛ Samuel womi ɔmɛ a mi. A dla Matsɛmɛ ɔmɛ a Kekleekle Womi ɔ mi etɛ: (1) Salomo matsɛ yemi ngɛ Israel kɛ Yuda ma amɛ a nɔ, kɛ e tsɛ David gbenɔ. (2) Salomo matsɛ yemi kɛ e ni tsumihi, titli ɔ, Yawɛ we ɔ mami ngɛ Yerusalem. (3) Bɔ nɛ ma a mi gba enyɔ, nɛ e pee omleyi je ma, kɛ leneyi je ma, kɛ matsɛmɛ ɔmɛ nɛ ba ye ma amɛ a nɔ hluu kɛ ya si jeha lafa nɛɛ loko a fɔ Kristo ɔ.

Ngɛ matsɛmɛ ɔmɛ a womi enyɔ ɔmɛ tsuo a mi ɔ, bɔ nɛ matsɛ ko yeɔ Mawu anɔkuale ha a, nɛ a kɛ naa kaa matsɛ kpakpa, aloo matsɛ yaya ji lɛ; ma a nɔ yami daa si ngɛ kikɛmɛ anɔkuale yemi nɛ ɔ nɔ. Jã nɔuu ji bɔ nɛ wɔ jami, kɛ atuã tsɔmi haa haomi baa ma a nɔ. Matsɛmɛ ɔmɛ nɛ ba ye omleyi je zugba a nɔ ɔ, nimli yayamihi ji mɛ tsuo pɛpɛɛpɛ. Matsɛmɛ ɔmɛ nɛ ba ye leneyi je zugba a nɔ ɔ, mɛɛ lɛɛ ekomɛ hi, nɛ ekomɛ hu hí.

Nihi nɛ a ní tsumi jeɔ kpo ngɛ Matsɛmɛ ɔmɛ a Kekleekle Womi ɔ mi ji Yawɛ gbali ɔmɛ. Mɛ ji katsɛmɛ nɛ Mawu tuɔ munyu kɛ guɔ a nɔ kɛ bɔɔ ma a kɔkɔ ke a ko ja wɔ, nɛ́ a ko tsɔ Mawu hɛ mi atuã hulɔ. Eliya kɛ Baal gbali ɔmɛ a he sane ɔ ji sane titlii ko nɛ ngɛ womi nɛ ɔ mi. A naa sane nɛ ɔ ngɛ yi 18.

Bɔ nɛ a dla womi ɔ mi ha

• David matsɛ yemi ɔ nyagbe 1.1—2.12
• A wo Salomo matsɛ 2.13-46
• Salomo matsɛ yemi 3.1—11.43
  a. Sisije be ɔmɛ 3.1—4.34
  b. A ma Yawɛ we ɔ 5.1—8.66
  d. Nyagbe be ɔmɛ 9.1—11.43
• Matsɛ yemi ɔ mi gba 12.1—22.53
  a. Omleyi je wɛtso ɔmɛ tsɔ atuã 12.1—14.20
  b. Yuda matsɛmɛ ɔmɛ, kɛ Israel matsɛmɛ ɔmɛ 14.21—16.34
  d. Gbalɔ Eliya 17.1—19.21
  e. Israel matsɛ, Ahab 20.1—22.40
  ɛ. Yuda matsɛ, Yehoshafat, kɛ Israel matsɛ, Ahazia 22.41-53