Samuel II, 24

David kane ma a

(<x>130 21:1-27</x>)

1 Yawɛ mi mi fu Israel ekohu, nɛ e ha David kɛ haomi ba ma a nɔ. Yawɛ de lɛ ke, “Yaa nɛ o ya kane Israel kɛ Yuda!”

2 Lɔ ɔ he ɔ, matsɛ ɔ de e tatsɛ Yoab, kɛ asafoatsɛmɛ ɔmɛ nɛ piɛ e he ɔ ke, “Nyɛɛ ya nɛ nyɛ ya kpa Israel wɛtso ɔmɛ tsuo a nɔ kɛ je Dan hluu kɛ yaa si Beersheba, nɛ nyɛɛ kane ni ɔmɛ, konɛ ma le ma a yibɔ.”

3 Yoab bi matsɛ ɔ ke, “Ke Yawɛ, o Mawu ɔ maa ngɔ nimli kaa ma a hiɛmi totoe lafa ngɔ piɛ ma a he, nɛ ye nyɔmtsɛ matsɛ maa na nɔ́ nɛ ɔ kɛ lɛ nitsɛ e hɛngmɛ po, mɛni bua jɔmi nɔ́ nɛ ɔ ma ha mo?”

4 Se matsɛ ɔ gbi ye Yoab kɛ asafoatsɛmɛ ɔmɛ a nɔ́ ɔ nɔ, nɛ Yoab kɛ asafoatsɛmɛ ɔmɛ je matsɛ ɔ hɛ mi kɛ ho, konɛ a ya kane Israel ma a.

5 A po Yordan pa a, nɛ a ya to si ngɛ Aroer leneyi je, nɛ ji ma nɛ ngɛ kɔ̃ ɔ mi, ngɛ Gad zugba a nɔ ɔ. Nɛ́ a je lejɛ ɔ, a pue nɔ kɛ ho Yazer ya,

6 nɛ a ya su Gilead kɛ Kadesh ngɛ Hit bi a zugba a nɔ. A je lejɛ ɔ kɛ ho Dan ya; nɛ́ a je Dan ɔ, a lɔgɔ si kɛ ho Sidon ya.

7 A nyɛɛ hluu kɛ ya su Tiro ma a nɛ a fia gbogbo kɛ bɔle lɛ ɔ, kɛ Hiv bi, kɛ Kanaan bi a ma amɛ tsuo a mi. Nyagbe ɔ, a ya su Beersheba, ngɛ Yuda leneyi je.

8 Benɛ a ya kpa zugba a tsuo nɔ ɔ, a kpale kɛ ba Yerusalem nyɔhiɔ nɛɛ kɛ ligbi nyingmi enyɔ se.

9 A ba bɔ matsɛ ɔ amaniɛ ke a kane nyumuhi nɛ a he wa, nɛ a su ta yami akpe lafa kpaanyɔ ngɛ Israel, kɛ akpe lafa enuɔ ngɛ Yuda.

10 Benɛ David kane ni ɔmɛ se ɔ, e he nile hao lɛ; nɛ e de Yawɛ ke, “I pee yayami agbo kaa i tsu kikɛmɛ a ní nɛ ɔ. Lɔ ɔ he ɔ, Yawɛ, i kpa mo pɛɛ nɛ o ngɔ kɛ pa mi.”

11 Benɛ David te si mɔtu ɔ, Yawɛ ngɔ sɛ gbi ngɔ ha gbalɔ Gad, David ní nalɔ ɔ ke

12 e ya de David ke, “Bɔ nɛ Yawɛ de ji nɛ ɔ nɛ: ‘I ngɔ nɔ́ etɛ kɛ ngɛ o hɛ mi fɔe. Moo hla kake nɛ ma pee ha mo.’ ”

13 Kɛkɛ nɛ Gad ba David ngɔ nɛ e ba bɔ lɛ amaniɛ, nɛ bi lɛ ke, “Anɛ o suɔ kaa hwɔ nɛ ba o zugba a nɔ jeha etɛ, aloo o he nyɛli nɛ a nyɛɛ o se, nɛ o hi fo tue ngɛ a hɛ mi nyɔhiɔ etɛ, aloo gbenɔ hiɔ nɛ ba zugba a nɔ ligbi etɛ? Mo susu he, konɛ o tsɔɔ mi heto nɛ ma ngɔ kɛ ya ha nɔ nɛ tsɔ mi ɔ.”

14 David de Gad ke, “Sane nɛ ɔ he wa ha mi wawɛɛ nitsɛ! Se kɛ̃ i be suɔe nɛ nimli adesahi nɛ a gbla ye tue. Ha nɛ Yawɛ nitsɛ nɛ gbla wa tue, ejakaa mɔbɔ nalɔ ji lɛ.”

15 Lɔ ɔ he ɔ, Yawɛ ha gbenɔ hiɔ ba Israel kɛ je mɔtu kɛ ya si be nɛ a to ɔ; nɛ kɛ je Dan hluu kɛ ya si Beersheba a, nimli akpe nyingmi kpaago sɔuu gbo.

16 Benɛ Mawu bɔfo ɔ maa ho Yerusalem hɛ mi kpatami ya a, Yawɛ tsake e yi mi nɛ e to kaa e maa gbla ni ɔmɛ a tue ɔ, nɛ e de bɔfo ɔ nɛ ngɛ ma a hɛ mi kpatae ɔ ke, “E hiɛ. Mo kpa!” Jamɛ a be ɔ, Yawɛ bɔfo ɔ ngɛ Yebus no, Arauna ngma gbeemi he ɔ kasa nya.

17 David na bɔfo ɔ nɛ ngɛ ma a nɔ́ fiae, nɛ e de Yawɛ ke, “O nɛ, imi lɛ i pee yayami ɔ nɛ; imi lɛ i tɔ̃. Nimli nɛ ɔmɛ nɛ a ngɛ kpoo kaa jijɔ ɔ, mɛɛ lɛɛ mɛni a pee? I kpa mo pɛɛ nɛ o gbla i kɛ ye weku li kɛkɛ wa tue.”

18 Gad ba David ngɔ jamɛ a ligbi ɔ nɔuu, nɛ e ba de lɛ ke, “Yaa nɛ o ya puɛ bɔ sami la tɛ ha Yawɛ ngɛ Yebus no, Arauna ngma gbeemi he ɔ.”

19 David bu Yawɛ fami ɔ tue, nɛ e ho kaa bɔ nɛ Gad de lɛ ɔ.

20 Benɛ Arauna ke e hyɛɛ ɔ, matsɛ ɔ kɛ e tsɔli ɔmɛ ji nɛ ngɛ blɔ ɔ nɔ kɛ ma. Arauna je kpo nɛ e ba kpla si ngɛ matsɛ ɔ hɛ mi, nɛ e kɛ e hɛ mi bu zugba,

21 nɛ e bi ke, “Mɛni ye nyɔmtsɛ matsɛ ma peemi ngɛ e tsɔlɔ ngɔ?” David he nɔ ke, “I ma o ngma gbeemi he ɔ hemi, nɛ ma ma bɔ sami la tɛ ngɛ nɔ ha Yawɛ, bɔ nɛ pee nɛ gbenɔ hiɔ ɔ se nɛ po.”

22 Arauna de David ke, “Ye nyɔmtsɛ matsɛ, nɔ́ tsuaa nɔ́ nɛ muɔ o hɛ ɔ, moo ngɔ nɛ o kɛ sã bɔ ɔ. Nahi nɛ o kɛ maa sã sami bɔ ɔ ji nɛ ɔmɛ nɛ; jehanɛ, na kuɛpã tso, kɛ ngma gbeemi tsohi nɛ a kɛ maa pee lɛ́ ɔ hu ji nɛ ɔmɛ nɛ.”

23 Arauna ngɔ ní nɛ ɔmɛ tsuo kɛ ha matsɛ ɔ, nɛ e de lɛ ke, “Yawɛ, o Mawu ɔ nɛ he o bɔ sami ɔ.”

24 Se matsɛ ɔ de Arauna ke, “Dɛbi, ma wo mo hiɔ; i kɛ níhi nɛ i na yaka be sami bɔ sãe ha Yawɛ, ye Mawu ɔ!” Kɛkɛ nɛ David ngɔ sika hiɔ yi nyingmi enuɔ kɛ he ngma gbeemi he ɔ, kɛ na amɛ.

25 E puɛ bɔ sami la tɛ ha Yawɛ ngɛ lejɛ ɔ; nɛ e sã sami bɔhi, kɛ tue mi jɔmi bɔhi. Yawɛ bu e kue fami ɔ tue, nɛ gbenɔ hiɔ ɔ se po ngɛ Israel.