1 Jamɛ a be ɔ, Filisti bi ɔmɛ bua a tabo ɔmɛ a nya, konɛ a kɛ Israel nɛ ya hwu. Akish de David ke, “Na nɛ o le kaa o kɛ o we bi ɔmɛ ma ba piɛ ye he kɛ hwu ta a.”
2 David de Akish ke, “E da! Mo nitsɛ o maa na nɔ́ nɛ o tsɔlɔ ma nyɛ tsu.” Akish de David ke, “Saminya! Ma pee mo ye he bulɔ kɛ yaa si gbenɔ mi.”
Saul ya bi ní
3 ⓣ Samuel ba gbo, nɛ Israel tsuo nyɛ ya ha lɛ nɛ a ya pu lɛ ngɛ Rama nɛ ji lɛ nitsɛ e ma a mi. Nɛ Saul fie ní peeli, kɛ klamɔhi tsuo kɛ je zugba a nɔ.
4 Filisti bi ɔmɛ bua a he nya ngɛ Shunem, nɛ Saul hu bua Israel tsuo nya ngɛ Gilboa.
5 Benɛ Saul na Filisti bi ɔmɛ a tabo ɔ, e ye gbeye wawɛɛ nitsɛ,
6 ⓤ lɔ ɔ he ɔ, e ya bi Yawɛ ga womi. Se Yawɛ pui e nya mi. E na we sɛ gbi ko kɛ gui nlami mi. Urim kɛ Tumim de we lɛ nɔ́ ko, nɛ e nui nɔ́ ko kɛ ji gbalɔ ko gbalɔ ko nya.
7 Lɔ ɔ he ɔ, Saul de e tsɔli ɔmɛ ke, “Nyɛ hla yo ko nɛ peeɔ ní ha mi nɛ ma ya e ngɔ ya bi ní.” E tsɔli ɔmɛ de lɛ ke, “Wa kpa mo pɛɛ, yo ní peelɔ ko ngɛ Endor.”
Endor yo ní peelɔ ɔ
8 Kɛkɛ nɛ Saul tsake e he nɛ e wo tade kpa, nɛ gbɔkuɛ ɔ, e kɛ nyumuhi enyɔ pue nɔ kɛ ho yo ɔ ngɔ ya. E de yo ɔ ke, “Moo pee ní ha mi, nɛ nɔ tsuaa nɔ nɛ ma tsɛ e biɛ ɔ, o ha nɛ nɔ ɔ susuma nɛ ba.”
9 Se yo ɔ de lɛ ke, “Tse mo nitsɛ o le nɔ́ nɛ Matsɛ Saul pee ɔ, kaa e kpata ní peeli, kɛ klamɔhi nɛ ngɛ zugba a nɔ ɔ a hɛ mi. Mɛni he je mɔ nɛ o ngɛ mi klama tsɔe nɛ o ha nɛ a gbe mi ɔ?”
10 Kɛkɛ nɛ Saul kɛ Yawɛ biɛ ka yo ɔ kita ke, “I na Yawɛ kaa nɔ ko nɔ ko be o tue gblae ngɛ nɔ́ nɛ ɔ he.”
11 Yo ɔ bi lɛ ke, “Mɛnɔ ma tsɛ ha mo?” Nɛ Saul he nɔ ke, “Tsɛ Samuel ha mi.”
Samuel kpade
12 Benɛ yo ɔ na Samuel ɔ, e kpa bubuubui nɛ e de Saul ke, “Mɛni he je o sisi mi ɔ? Matsɛ Saul ji mo!”
13 Matsɛ ɔ de lɛ ke, “Koo ye gbeye! Mɛni o na?” Yo ɔ he nɔ ke, “I na kpade ko nɛ hia kɛ je zu ɔ mi kɛ ma.”
14 Saul kpale bi lɛ ke, “Kɛ e ngɛ kɛɛ?” Yo ɔ he nɔ ke, “Nɔmoyo ko ma, nɛ e wo tade klɔii.” Saul yɔse kaa Samuel lɛ e na a nɛ; lɔ ɔ he ɔ, e kpla si nɛ e kɛ e hɛ mi bu si kɛ tsɔɔ bumi.
15 Samuel bi Saul ke, “Mɛni he je o hao mi kikɛ nɛ ɔ? Mɛni he je o ba tsɛ mi?” Saul he nɔ ke, “Ye yi fi. Lɔ ɔ ji Filisti bi ɔmɛ kɛ mi ngɛ ta hwue, nɛ Mawu je ye se. Ke i tsɛ lɛ ɔ, e he we nɔ; jehanɛ hu i nui e he kɛ gui gbali ɔmɛ a nɔ, loo nlami mi. Enɛ ɔ he je nɛ i ba tsɛ mo, konɛ o tsɔɔ mi bɔ nɛ ma pee.”
16 Samuel bi lɛ ke, “Mɛni he je o ba ngɛ mi tsɛe be mi nɛ Yawɛ je o se, nɛ e plɛ pee o he nyɛlɔ ɔ?
17 ⓥ Nɔ́ nɛ Yawɛ gu ye nɔ de mo ɔ, lɔ ɔ e pee nɛ ɔ nɛ. Yawɛ kpɔ matsɛ yemi ɔ ngɛ o dɛ nɛ e kɛ ha o he nɔ David.
18 ⓦ Akɛnɛ o bui Yawɛ tue, nɛ fami nɛ e kɛ mi mi fumi nɛ nya wa fa mo ngɛ Amalek bi ɔmɛ a he ɔ hu o yi nɔ ɔ, enɛ ɔ he je nɛ Yawɛ pee mo nɔ́ nɛ ɔ mwɔnɛ ɔ nɛ.
19 Jehanɛ se hu, Yawɛ maa ngɔ mo, kɛ Israel tsuo kɛ wo Filisti bi ɔmɛ a dɛ mi; nɛ hwɔɔmɛ a je hwɔɔ ɔ, o kɛ o binyumu ɔmɛ ma ba piɛ ye he. Israel tabo ɔ hu Yawɛ maa ngɔ mɛ kɛ wo Filisti bi ɔmɛ a dɛ mi.”
20 Kɛkɛ nɛ Saul kuɛli nɔ zugba amlɔ; ejakaa Samuel munyu ɔmɛ wo e he gbeye wawɛɛ nitsɛ. Nɛ akɛnɛ e yi nɔ́ ko piani kɛ nyɔ mi tsuo he je ɔ, e gbɔjɔ.
21 Kɛkɛ nɛ yo ɔ ba Saul ngɔ, nɛ e na kaa e tsui po, lɔ ɔ he ɔ, e de lɛ ke, “O nɛ, o mawayo bu mo tue; i ngɔ ye wami ngɔ ke, nɛ i pee nɔ́ nɛ o ngɛ hlae ɔ ha mo.
22 Enɛ ɔ he je ɔ, i kpa mo pɛɛ nɛ mo hu o bu o mawayo ɔ tue. Ha ma pee nɔ́ ko ha mo nɛ o ye, konɛ o na he wami nɛ o kɛ hia blɔ.”
23 Saul kplɛɛ we, nɛ e ke, “Dɛbi, i be ní yee.” Se e tsɔli ɔmɛ, kɛ yo ɔ nyɛ e nɔ kɛ ya si e bu mɛ tue. E te si ngɛ zugba, nɛ e hi sa a nɔ.
24 Yo ɔ ngɛ na bi ko nɛ wo zɔ ngɛ we ɔ mi. Lɔ ɔ he ɔ, e pee esɔ nɛ e ya gbe lɛ. E pɔtɔ mamu nɛ e kɛ sã abolo kplolo,
25 nɛ e ngɔ niye ní ɔ ya ma Saul kɛ e tsɔli ɔmɛ a hɛ mi nɛ a ye. Nɛ a je lejɛ ɔ jamɛ a nyɔ ɔ mi nɔuu.