Samuel I, 26

David ngɔ Saul wami ngɔ ke lɛ ekohu

1 ⓡ Zif bi ɔmɛ ba Saul ngɔ ngɛ Gibea ba bɔ lɛ amaniɛ ke David ba laa e he ngɛ Hakila yo ɔ nɔ ngɛ Yuda nga a nya.

2 Amlɔ ɔ, Saul ngɔ Israel ta buli kpanakpanaa akpe etɛ ngɔ piɛ e he, nɛ a ho, konɛ a ya hla David ngɛ Zif nga a nɔ.

3 Saul kɛ e tabo ɔ ya bua a he nya ngɛ blɔ ɔ nɛ gu Hakila yoku ɔ nɔ ɔ he, ngɛ Yeshimon hanɔ. Jamɛ a be ɔ, David ngɛ laami tso mi ngɛ nga a nɔ. Benɛ David nu kaa Saul ba lɛ hlami ngɛ nga a nɔ ɔ,

4 e tsɔ slaali ngɛ laami mi nɛ e kɛ ná le kaa Saul ngɛ lejɛ ɔ niinɛ.

5 Kɛkɛ nɛ David be kɛ ho he nɛ Saul ta buli ɔmɛ bua a he nya ngɛ ɔ ya. David ya na he nɛ Saul kɛ e tatsɛ nguaa Abner, Ner bi ɔ hwɔɔ si ngɛ ɔ. Saul hwɔɔ si ngɛ ta a mi, nɛ e ta buli ɔmɛ pue si kɛ bɔle lɛ.

6 David bi Ahimelek, Hit no ɔ, kɛ Yoab nyɛminyumu Abishai, Zeruya binyumu ɔ ke, “Nyɛ ti mɛnɔ kɛ mi maa ya Saul ta a mi?” Abishai he nɔ ke, “I kɛ mo maa ya.”

7 Lɔ ɔ he ɔ, David kɛ Abishai ho ta a mi ya jamɛ a nyɔ ɔ mi, nɛ a ya na Saul nɛ hwɔ mahe kɛ e we akplɔ ɔ nɛ a kɛ gbɔ si ngɛ e yi tetle mi. Abner kɛ ta buli ɔmɛ hwɔɔ si kɛ bɔle lɛ.

8 Kɛkɛ nɛ Abishai de David ke, “Mawu je o he nyɛlɔ ɔ kɛ wo o dɛ mi mwɔnɛ ɔ; lɔ ɔ he ɔ, ha nɛ ma hɛ lɛ akplɔ ɔ si kake pɛ kɛ ya pi zugba, nɛ e be hiae kaa a hɛ lɛ enyɔne.”

9 Se David de Abishai ke, “Mo ko kpata e hɛ mi; ejakaa tue gblami fɔɔ si ha nɔ tsuaa nɔ nɛ pueɔ nɔ nɛ Yawɛ pɔ lɛ nu ke e ye matsɛ ɔ e muɔ si.”

10 David ya nɔ nɛ e de ke, “I na Yawɛ, hɛ kalɔ ɔ kaa lɛ Yawɛ nitsɛ e maa fia Saul nɔ, loo Saul gbenɔ be maa su nɛ e ma gbo, loo e ma gbo ngɛ ta nya.

11 ⓢ Yawɛ hiɔ kaa nɔmlɔ nɛ lɛ, Yawɛ nitsɛ e wo lɛ matsɛ ɔ, ma pue e muɔ si. Ha waa kɛ̃ akplɔ ɔ nɛ ngɛ e yi tetle mi ɔ, kɛ nyu kɛ kplu ɔ, nɛ waa ho.”

12 David kɛ̃ akplɔ ɔ, kɛ nyu kɛ kplu ɔ nɛ ngɛ Saul yi tetle mi ɔ, nɛ a je lejɛ ɔ. Nɔ ko nɔ ko nɛ mɛ; nɔ ko nɔ ko li nɔ́ nɛ ba, nɛ nɔ ko nɔ ko hɛ tsɛ̃ hulɔ. Nɔ tsuaa nɔ hwɔ mahe; ejakaa Yawɛ ha mahe vii ko ba nɔ mɛ tsuo a nɔ.

13 Jehanɛ, David po mi kɛ ho, nɛ e ya da yoku ɔ yi mi tsitsaa lokoo,

14 nɛ e kpa ngmlaa kɛ tsɛ ta buli ɔmɛ, kɛ Ner binyumu Abner, nɛ e de ke, “Abner! Mo he nɔ koo!” Abner bi ke, “Mo mɛnɔ lɛ o ngɛ ngmlaa kpae kɛ ngɛ matsɛ ɔ woe ɔ?”

15 David he nɔ ke, “Pi nyumu ji mo? Mɛnɔ kɛ mo sɔ ngɛ Israel? Mɛni he je mɔ nɛ o bui o nyɔmtsɛ matsɛ ɔ he? Nɔ ko ba ta a mi piɔ, nɛ jinɛ e ko kpata o nyɔmtsɛ matsɛ ɔ hɛ mi.

16 Nyɛ pee we nɛ hi kulaa. I na Mawu, ja a gbe nyɛ tsuo kulaa; ejakaa nyɛ bui nyɛ nyɔmtsɛ ɔ, nɔ nɛ Yawɛ pɔ lɛ nu ɔ he. Jehanɛ, hyɛ he nɛ matsɛ ɔ akplɔ ɔ ngɛ! Nyu kɛ kplu ɔ hu nɛ ngɛ matsɛ ɔ yi tetle mi ɔ, hyɛ he nɛ e ba je!”

17 Saul yɔse David gbi, nɛ e bi ke, “Ye bi David, mo ji nɛ ɔ?” David he nɔ ke, “Ee, ye nyɔmtsɛ matsɛ, imi!”

18 David ya nɔ nɛ e bi lɛ ke, “Ye nyɔmtsɛ, mɛni he je o ngɛ ye se nyɛɛe kɛ mwɔɔ? Mɛni i pee mo? Mɛni yayami i pee?

19 Ye nyɔmtsɛ, moo bu nɔ́ nɛ o tsɔlɔ ma de mo nɛ ɔ tue. Ke Yawɛ lɛ pee loko o ngɛ ye se blɔ hlae ɔ, lɛɛ e ngmɛ mi blɔ nɛ ma sã bɔ kɛ kpata lɛ. Se ke nimli adesahi a ní tsumi ɔ, lɛɛ Yawɛ nɛ e gbiɛ mɛ; ejakaa mwɔnɛ ligbi nɛ ɔ, a fie mi kɛ je Yawɛ zugba a nɔ kɛ ho ma kpa nɔ ya nɛ ma ya ja mawu kpahi ngɛ lejɛ ɔ.

20 Mo ko ha nɛ ma gbo nɛ ye muɔ nɛ pue si ngɛ zugba kpa nɔ kɛ je Yawɛ hɛ mi. Mɛni he je Israel matsɛ hia ta kɛ ma mi tuami, imi nɛ i ngɛ kaa malɛɛ kɛkɛ ɔ? Mɛni he je e ngɛ mi dae kaa a daa hɔne ngɛ yoku nɔ ɔ?”

21 Saul he nɔ ke, “I tɔ̃! Ye bi David, moo kpale kɛ ba; i be mo nɔ́ ko nɔ́ ko pee hu, ejakaa o kɛ ye wami ke mi mwɔnɛ ligbi nɛ ɔ. I je kuasia nɛ i tɔ̃ babauu.”

22 David he nɔ ke, “Matsɛ, o we akplɔ ɔ ji nɛ ɔ nɛ! Ha nɛ o we bi ɔmɛ a ti nɔ kake nɛ e ba nɛ e ba ngɔ.

23 Yawɛ gbaa nihi nɛ yeɔ anɔkuale, kɛ ni nɛmɛ nɛ da. Yawɛ je mo kɛ wo ye dɛ mi mwɔnɛ ɔ, se mo nɔmlɔ nɛ Yawɛ pɔ mo nu ɔ, i tɛ o he.

24 Lɔ ɔ he ɔ, kaa bɔ nɛ i kɛ o wami ke mo mwɔnɛ ligbi nɛ ɔ, Yawɛ nɛ e ngɔ ye wami kɛ ke mi, nɛ e je mi kɛ je amanehlu tsuo pɛpɛɛpɛ mi.”

25 Saul de David ke, “Mawu nɛ e gbaa mo, ye bi David! O maa ye manye ngɛ nɔ́ tsuaa nɔ́ mi.” Kɛkɛ nɛ David je lejɛ ɔ, nɛ Saul hu kpale e se kɛ ho we mi ya.