Samuel I, 22

A gbe osɔfo ɔmɛ

1 ⓙ David tu fo kɛ je Gat kɛ ho Adulam tɛ puɔ ɔ mi ya. Benɛ e nyɛminyumu ɔmɛ, kɛ e weku li tsuo nu e he ɔ, a bu e nɔ kɛ ya na lɛ ngɛ lejɛ ɔ.

2 Ni kpa komɛ hu ba piɛ David he. Mɛ ji nihi nɛ a ngɛ mɛ yi mi wae, nihi nɛ hɛɛ hiɔ, kɛ ni nɛmɛ nɛ a pee mɛ nidɔ níhi, nɛ David pee a nyatsɛ. Nihi nɛ nyɛɛ e se ɔ a yibɔ maa pee lafa eywiɛ.

3 David je lejɛ ɔ kɛ ho Mizpa ya ngɛ Moab, nɛ e ya de Moab matsɛ ɔ ke, “I kpa mo pɛɛ, ha nɛ tsaatsɛ kɛ maa nɛ a ba hi nyɛ ngɔ kɛ yaa si ma le nɔ́ nɛ Mawu maa pee ha mi.”

4 Lɔ ɔ he ɔ, David si e fɔli ɔmɛ ngɔ ha Moab matsɛ ɔ, nɛ a hi e ngɔ be mi nɛ e ngɛ e he lae ngɛ tɛ puɔ ɔ mi ɔ tsuo.

5 Gbalɔ Gad ba de David ke, “Koo hi tɛ puɔ nɛ ɔ mi; moo je hiɛ ɔ esɔ kɛ ho Yuda zugba a nɔ ya.” Lɔ ɔ he ɔ, David je kɛ ho Heret hue ɔ mi ya.

6 Saul ba nu kaa a ya na David kɛ nyumuhi nɛ piɛ e he ɔ. Jamɛ a be ɔ, Saul hii si ngɛ tso nguaa ko sisi ngɛ yoku ko nɔ ngɛ Gibea. E hɛɛ e we akplɔ ɔ ngɛ e dɛ, nɛ e tsɔli ɔmɛ tsuo daa si kɛ bɔle lɛ.

7 Kɛkɛ nɛ Saul de e tsɔli ɔmɛ ke, “Nyɛ Benyamin bi, nyɛɛ bu tue! Pe nyɛ susu kaa Ishai binyumu ɔ ma ha nyɛ ti nɔ tsuaa nɔ zugba kɛ wai ngmɔ, nɛ e maa pee nyɛ tsuo kulaa asafoatsɛmɛ ngɛ nihi akpehi kɛ lafahi a nya,

8 loko nyɛ tsuo nyɛ so kɛ wo ye he kikɛ nɛ ɔ? Nɔ ko nɔ ko wo we ye tue nɔ kaa ye binyumu ɔ kɛ David so somi ko. Nɔ ko nɔ ko be nyɛ kpɛti nɛ ye sane dɔɔ lɛ, nɛ e ma wo ye tue nɔ kaa imi nitsɛ ye binyumu ha nɛ ye tsɔlɔ te si wo mi, nɛ mwɔnɛ ɔ, e ngɛ ye he blɔ hlae nɛ e gbe mi.”

9 ⓚ Kɛkɛ nɛ Doeg, Edom no ɔ nɛ lɛ hu e daa si ngɛ Saul tsɔli ɔmɛ a kasa nya a, he nɔ nɛ e de ke, “I na Ishai binyumu ɔ benɛ e ba Ahitub binyumu Ahimelek ngɔ ngɛ Nob.

10 Ahimelek bi Yawɛ ga womi ha David. Lɔ ɔ se ɔ, e ha lɛ ní, nɛ e ngɔ Goliat, Filisti no ɔ klaate ɔ hu ngɔ ha lɛ.”

11 Lɔ ɔ he ɔ, Matsɛ Saul tsɔ nɛ a ya tsɛ osɔfo Ahimelek, Ahitub binyumu ɔ, kɛ e weku li nɛ ji osɔfohi nɛ ngɛ Nob ɔ tsuo kulaa kɛ ba.

12 Saul de Ahimelek ke, “Ahitub binyumu, bu tue!” Nɛ e he nɔ ke, “I ngɛ tue bue, ye nyɔmtsɛ.”

13 Saul bi lɛ ke, “Mɛni he je nɛ o kɛ Ishai binyumu ɔ nyɛ so wo ye he ɔ? Mɛni he je o ha lɛ niye ní, kɛ klaate, nɛ jehanɛ hu o bi Mawu ga womi ha lɛ ɔ? Amlɔ nɛ ɔ, e te si wo mi, nɛ e ngɛ ye he blɔ hlae nɛ e gbe mi!”

14 Ahimelek he nɔ ke, “O tsɔli ɔmɛ tsuo a kpɛti ɔ, mɛnɔ lɛ e yeɔ anɔkuale kɛ o ngatsɛ David sɔ? O he buli ɔmɛ a nyatsɛ ji lɛ, nɛ a buu lɛ saminya ngɛ o we ɔ mi.

15 Anɛ mwɔnɛ ɔ nɛ i bɔni Mawu ga womi bimi kɛ lɛ hami lo? Dɛbi! Nɛnɛ, koo po sane ngɔ fɔ o tsɔlɔ, loo o tsɔlɔ weku li a nɔ; ejakaa i li nɔ́ nɛ ɔ he nɔ ko kulaa.”

16 Matsɛ ɔ de ke, “Mo Ahimelek, ja o gbo; mo, kɛ o weku li tsuo.”

17 Nɛ matsɛ ɔ de e he buli nɛ daa si ngɛ e kasa nya a ke, “Nyɛɛ gbe Yawɛ osɔfo ɔmɛ, ejakaa a kɛ David so; a le e fo tumi ɔ he nɔ́ ko, se a wo we ye tue nɔ.” Se matsɛ tsɔli ɔmɛ kplɛɛ we kaa a ma wo a nine nɔ ngɛ Yawɛ osɔfo ɔmɛ a nɔ nɛ a gbe mɛ.

18 Lɔ ɔ he ɔ, matsɛ ɔ de Doeg ke, “Moo gbe mɛ!” Nɛ Doeg, Edom no ɔ gbe osɔfohi nɛ a woɔ efɔd ɔ nyingmi kpaanyɔ kɛ enuɔ sɔuu jamɛ a ligbi ɔ.

19 Jehanɛ, Saul ha a kɛ klaate kpata nɔ́ tsuaa nɔ́ hɛ mi ngɛ Nob nɛ ji osɔfohi a ma a mi. A gbe nyumuhi kɛ yihi, jokuɛwi kɛ bimwɔwi, nahi kɛ tejihi, kɛ tohi tsuo pɛpɛɛpɛ.

Abiatar tu fo

20 Se Abiatar nɛ ji Ahimelek binyumu ɔmɛ a ti nɔ kake lɛɛ a nine sui e nɔ; nɛ e tu fo kɛ ho David ngɔ ya

21 ya bɔ lɛ amaniɛ kaa Saul gbe Yawɛ osɔfo ɔmɛ.

22 David de lɛ ke, “Benɛ i na Doeg, Edom no ɔ ngɛ lejɛ ɔ jamɛ a ligbi ɔ, i le kaa bɔ tsuaa bɔ nɛ pee ɔ, e ma ya de Saul. Lɔ ɔ he ɔ, imi lɛ i kɛ gbenɔ ba o weku li ɔmɛ tsuo a nɔ ɔ nɛ.

23 Moo hi ye ngɔ; koo ye gbeye, ejakaa nɔ nɛ ngɛ hlae nɛ e gbe mi ɔ ngɛ hlae nɛ e gbe mo hulɔ. Ke o ngɛ ye ngɔ ɔ, o yi ma na wami.”