Samuel I, 20

Yonatan ye bua David

1 Enɛ ɔ se ɔ, David tu fo kɛ je Nayot ngɛ Rama kɛ ba Yonatan ngɔ, nɛ e ba bi lɛ ke, “Mɛni i pee? Mɛni ji ye tɔmi? Mɛni yayami i pee o tsɛ loko e ngɛ mi hlae nɛ e gbe ɔ?”

2 Yonatan he nɔ ke, “Dɛbi! O be gboe. Hyɛ, tsaatsɛ pee we nɔ́ ko nguaa, loo bɔbɔyoo nɛ e wo we ye tue nɔ ngɛ he. E be mi!”

3 Se David he nɔ ke, “O tsɛ le saminya kaa o suɔ ye sane; lɔ ɔ he ɔ, e pee e juɛmi kaa e be hae nɛ o le nɔ́ nɛ ɔ, bɔ nɛ pee nɛ e ko hao mo. Se anɔkuale, i na Yawɛ hɛ kalɔ ɔ kaa nane hiami kake pɛ lɛ ngɛ i kɛ gbenɔ wa kpɛti.”

4 Yonatan de David ke, “Nɔ́ tsuaa nɔ́ nɛ o ngɛ hlae ɔ, de mi nɛ ma pee ha mo.”

5 ⓑ David de Yonatan ke, “Hyɛ, hwɔɔ ji Nyɔhiɔhe nyami be ɔ nɛ, nɛ jinɛ e sa kaa i kɛ matsɛ ya ye ní. Se ha nɛ ma ya laa ye he ngɛ nga a nɔ kɛ yaa si ligbi etɛne ɔ gbɔkuɛ nya si.

6 Ke o tsɛ bi ye si ɔ, de lɛ ke, ‘David bi mi blɔ wawɛɛ ke e maa po e he bɔɔ kɛ ya e ma mi ngɛ Betlehem nɛ e ba; ejakaa a ngɛ jeha bɔ sãe ngɛ lejɛ ɔ kɛ ha weku ɔ tsuo.’

7 Ke e de ke, ‘Yoo!’ ɔ, o tsɔlɔ yi ma na wami; se ke e mi mi fu ɔ, lɛɛ o na nɛ o le kaa e muɔ e yi mi kpɔ kaa e maa pee mi yayami.

8 Lɔ ɔ he ɔ, naa mi mɔbɔ, nɛ o ye somi nɛ o kɛ mi so ngɛ Yawɛ biɛ mi ɔ nɔ. Se ke i yeɔ fɔ ɔ, lɛɛ mo nitsɛ moo gbe mi. Mɛni he je o maa ngɔ mi kɛ ya ha o tsɛ?”

9 Se Yonatan de ke, “Nɔ́ nɛ ɔ nɛ ko ba o juɛmi mi kulaa! Ke i le kaa tsaatsɛ to kaa e maa pee mo yayami ko ɔ, i ko de we mo lo?”

10 Jehanɛ, David bi Yonatan ke, “Ke o tsɛ kɛ mo ya tu munyu basabasa a, mɛnɔ ma ba de mi?”

11 Yonatan he nɔ ke, “Ha nɛ waa ho nga a nɔ ya.” Mɛ ni enyɔ ɔmɛ a pue nɔ kɛ ho nga a nɔ ya.

12 Yonatan de David ke, “I ngɛ mo si woe ngɛ Yawɛ, Israel Mawu ɔ biɛ mi kaa hwɔɔ, loo hwɔɔ se maa pee be nɛ ɔ mi ɔ, ma hla juɛmi nɛ tsaatsɛ ngɛ ngɛ o he. Ke e ngɛ o he juɛmi kpakpa a, ma tsɔ ba de mo.

13 Se ke tsaatsɛ to kaa e maa pee mo yayami, nɛ i wo we o tue nɔ nɛ ma wo mo blɔ nɛ ó ya ngɛ he jɔmi mi ɔ, lɛɛ Yawɛ kɛ imi, Yonatan nɛ e ye sisiisi. Yawɛ kɛ mo nɛ e hi si kaa bɔ nɛ e kɛ tsaatsɛ hi si ɔ.

14 Ke i gbo we, nɛ ye hɛ ngɛ kɛ mwɔɔ ɔ, mo je Yawɛ suɔmi, kɛ e mɔbɔ nami ɔ kpo kɛ tsɔɔ mi. Ke i gbo ɔ,

15 ⓒ ko ha o mi mi himi ɔ se nɛ e po ngɛ ye weku li a nɔ ligbi ko ligbi ko. Ke Yawɛ kpata o he nyɛli ɔmɛ tsuo a hɛ mi ngɛ zugba a nɔ ɔ,

16 ko ha Yonatan biɛ nɛ e laa ngɛ David weku ɔ mi. Ke o pee ja a, Yawɛ kɛ mo maa ye.”

17 Yonatan ha David kpale ka lɛ kita ekohu kaa e suɔ lɛ, ejakaa lɛ, Yonatan ɔ nitsɛ e suɔ David kaa bɔ nɛ e suɔ lɛ nitsɛ e he.

18 Yonatan de David ke, “Hwɔɔ ji Nyɔhiɔhe nyami be ɔ nɛ. A ma bi o si, ejakaa o sɛ ɔ maa fɔ si gu.

19 Hwɔɔ se lɛɛ a ma pa bi o si tsɔ; lɔ ɔ he ɔ, yaa he nɛ o ya laa o he ngɛ ligbi ɔ benɛ sane ɔ ba a, nɛ o ya laa o he ngɛ tɛhi nɛ a bua nya a a se.

20 Ma tsɛ̃ kɛ̃ɛ̃ mi bi etɛ kɛ ya lejɛ ɔ kaa nɔ́ nɛ i ngɛ ye dɛ nya dami kae.

21 Lɔ ɔ se ɔ, ma ha nɛ ye tsɔlɔ ɔ ya kukuɔ mɛ kɛ ba. Ke i de ke, ‘Hyɛ, kɛ̃ɛ̃ mi bi ɔmɛ ngɛ hiɛ blɔ; yaa nɛ o ya kukuɔ mɛ’ ɔ; e tsɔɔ kaa o ma nyɛ maa ba, ejakaa gbeye ko be. I na Yawɛ, hɛ kalɔ ɔ kaa nɔ́ ko nɔ́ ko be mo pee.

22 Se ke i de niheyo ɔ ke, ‘Hyɛ, kɛ̃ɛ̃ mi bi ɔmɛ ngɛ o hɛ mi’ ɔ, lɛɛ yaa; ejakaa Yawɛ nɛ e ke o je hiɛ ɔ.

23 Si nɛ wa wo wa sibi ɔ, Yawɛ nɛ e ha waa ye nɔ daa.”

24 Lɔ ɔ he ɔ, David ho ya laa e he ngɛ nga a nɔ. Nyɔhiɔhe nyami be ɔ, Matsɛ Saul ba ní yemi he ɔ,

25 nɛ e hi e sɛ ɔ nɔ ngɛ gbogbo ɔ he he nɛ e hii daa a. Yonatan hi e hɛ mi, nɛ Abner hi e kasa nya. Se David lɛɛ e blɔ he ɔ fɔɔ si.

26 Saul de we nɔ́ ko jamɛ a ligbi ɔ, ejakaa e de ngɛ e yi mi ke, “Be nɛ ɔ mi matahu ko ya po lɛ, nɛ e he tsɔ we.”

27 E nɔ jena nɛ ji ligbi nɛ nyɛɛ Nyɔhiɔhe nyami be ɔ se ɔ, David blɔ he ɔ fɔɔ si ekohu. Kɛkɛ nɛ Saul bi Yonatan ke, “Mɛni he je Ishai binyumu ɔ ba yi ní hiɛ kɛ mwɔnɛ ɔ?”

28 Yonatan he nɔ ke, “David bi mi blɔ wawɛɛ ke ma ngmɛ lɛ blɔ nɛ e ya Betlehem.

29 E ke, ‘I kpa mo pɛɛ nɛ o ha ma ya, ejakaa wa weku ɔ ngɛ bɔ sãe ngɛ ma a mi, nɛ ye nyɛminyumu ɔmɛ sɛ ba de mi ke ma ba dãã. Lɔ ɔ he ɔ, ke o suɔ mi ɔ, ha ma ya nɛ ma ya na ye nyɛmimɛ ɔmɛ.’ Nɔ́ nɛ he je nɛ e bɛ matsɛ ɔ okplɔɔ he ɔ ji nɛ ɔ nɛ.”

30 Jehanɛ Saul mi mi fu Yonatan wawɛɛ nitsɛ, nɛ e de lɛ ke, “Mo, yo ajuama kɛ atuã tsɔlɔ mi bi! O bu kaa i li kaa o ngɔ Ishai binyumu ɔ ngɔ pee o huɛ, nɛ o kɛ pue mo nitsɛ kɛ o nyɛ tsuo nyɛ hɛ mi si!

31 Anɛ o li kaa ligbi abɔ nɛ David ngɛ je mi ɔ, o be matsɛ yee gblegbleegble ngɛ zugba nɛ ɔ nɔ lo? Yaa nɛ o ya ngɔ lɛ kɛ ba hiɛ ɔ; ja e gbo!”

32 Yonatan bi e tsɛ Saul ke, “Mɛni he je a maa gbe lɛ? Mɛni e pee?”

33 Kɛkɛ nɛ Saul fɔ e we akplɔ ɔ, konɛ e kɛ gbe Yonatan. Nɛ Yonatan kɛ yɔse kaa e tsɛ muɔ e yi mi kpɔ kaa e maa gbe David.

34 Yonatan kɛ abofu nɛ nya wa te si kɛ je okplɔɔ ɔ he, nɛ e yi nɔ́ ko nɔ́ ko ngɛ Nyɔhiɔhe nyami be ɔ we ligbi enyɔne ɔ nɔ. David he pee lɛ mɔbɔ wawɛɛ nitsɛ, ejakaa Saul pue e hɛ mi si.

35 E nɔ jena mɔtu ɔ, Yonatan ho nga a nɔ ya, konɛ e kɛ David ya kpe kaa bɔ nɛ a de to momo ɔ. E kɛ niheyo wayoo ko ho,

36 nɛ e de niheyo ɔ ke, “Tuu fo nɛ o ya kukuɔ kɛ̃ɛ̃ mi bihi nɛ ma tsɛ̃ ɔ kɛ ba!” Benɛ niheyo ɔ wo fo pɛ kɛkɛ nɛ Yonatan tsɛ̃ kɛ̃ɛ̃ mi bi kake kɛ be e he.

37 Benɛ niheyo ɔ ya su kɛ̃ɛ̃ mi bi ɔ nɛ Yonatan tsɛ̃ ɔ he ɔ, Yonatan kpa huhui kɛ tsɛ e yi se nɛ e de ke, “Pi kɛ̃ɛ̃ mi bi ɔ nɛ be o he nɛ ɔ! O he nɛ sɔ! Mlamlaamla! Koo da si!” Niheyo ɔ ho ya ngɔ kɛ̃ɛ̃ mi bi ɔ kɛ ba ha e nyɔmtsɛ ɔ.

38

39 Se niheyo ɔ li nɔ́ nɛ ngɛ nɔ yae; blɔɔ Yonatan kɛ David pɛ nɛ a le.

40 Lɔ ɔ se ɔ, Yonatan kɛ e ta hwumi ní ɔmɛ ha niheyo ɔ, nɛ e de lɛ ke e ngɔ kɛ ho ma a mi ya.

41 Benɛ niheyo ɔ je ɔ, David te si kɛ je tɛ nɛ a bua nya a se. E ba kpla si nɛ e kɛ e hɛ mi bu si si etɛ; nɛ e kɛ Yonatan fua a sibi, nɛ a fo ya ngɔ pue a sibi a nɔ. Se David aywilɛho ɔ nya wa pe Yonatan nɔ́ ɔ.

42 Kɛkɛ nɛ Yonatan de David ke, “Yaa ngɛ he jɔmi mi. Kita a nɛ i kɛ mo tsuo wa ka wa he ngɛ Yawɛ biɛ mi ɔ, Yawɛ ma ha nɛ i kɛ mo, kɛ o nina, kɛ imi hu ye nina wa maa ye nɔ kɛ maa ya neneene.” Enɛ ɔ se ɔ, David je lejɛ ɔ, nɛ Yonatan hu kpale e se kɛ ho ma a mi ya.