Samuel I, 18

David kɛ Yonatan

1 Benɛ Saul kɛ David gbe a ní sɛɛmi ɔ nya a, Saul binyumu Yonatan kɛ David nu huɛ; nɛ Yonatan suɔ David kaa lɛ nitsɛ e he.

2 Saul tsi David nya kɛ je jamɛ a ligbi ɔ, nɛ e ngmɛ́ lɛ blɔ nɛ e kpale kɛ ho e tsɛ we ya hu.

3 Yonatan ka David kita kaa e kɛ lɛ maa bɔ kɛ yaa si gbenɔ mi, ejakaa e suɔ David kaa bɔ nɛ e suɔ lɛ nitsɛ e he.

4 Yonatan kpa e he bo kɛ ha David. E kɛ e ta hwumi ní ɔmɛ, e klaate ɔ, e kɛ̃ɛ̃ ɔ, kɛ e mlɛ mi fimi nɔ́ ɔ hu piɛ he ha lɛ.

5 He tsuaa he nɛ Saul tsɔ David ɔ, e ya yeɔ manye. Enɛ ɔ he ɔ, Saul wo lɛ asafoatsɛ, nɛ nɔ́ nɛ ɔ sa Saul tsɔli, kɛ nihi tsuo a hɛ mi.

Saul hɛ kɔ David nɔ

6 Benɛ David gbe Goliat nɛ e kɛ ta buli ɔmɛ kpale a se kɛ ma a, Israel yi ɔmɛ je a ma amɛ tsuo a mi kɛ ba, nɛ a kɛ bua jɔmi la, kɛ do, kɛ kpa saku ba kpee Matsɛ Saul.

7 ⓨ Benɛ yi ɔmɛ ngɛ nyae ɔ, a je la nɛ a he nɔ ke, “Saul gbe akpehi, se David lɛɛ e gbe akpe nyɔngmahi.”

8 Munyu nɛ ɔ ngɔɛ Saul nya. E mi mi fu wawɛɛ nitsɛ, nɛ e de ke, “A ngɔ akpe nyɔngmahi ngɔ ha David; se imi lɛɛ a ha mi akpehi pɛ. Mɛni pa piɛ mɔ nɛ e ma na pe matsɛ yemi ɔ?”

9 Lɔ ɔ he ɔ, kɛ je jamɛ a ligbi ɔ kɛ yaa a, Saul je e hɛ ngɔ pi David.

10 E nɔ jena a, mumi yayami ko nɛ je Mawu ngɔ ba Saul nɔ, nɛ e bɔni munyu tumi basabasa ngɛ e we ɔ mi kaa godotsɛ. Jamɛ a be ɔ, David ngɛ kpa saku ɔ fiae kaa bɔ nɛ e peeɔ daa ligbi ɔ. Saul hɛɛ e we akplɔ ɔ ngɛ e dɛ mi,

11 nɛ e de ngɛ e yi mi ke, “Ma hɛ David akplɔ kɛ pi gbogbo ɔ.” Kɛkɛ nɛ e hɛ lɛ akplɔ ɔ si enyɔ; se David yu e he nɛ e je mi slɔkee.

12 Saul ye David gbeye, ejakaa Yawɛ kɛ David ngɛ; se lɛ Saul ɔ lɛɛ Yawɛ je e se.

13 Lɔ ɔ he ɔ, Saul je lɛ ngɛ e kasa nya, nɛ e pee lɛ ta buli akpe a nyatsɛ. David nyɛɛɔ ma a hɛ mi kɛ yaa kɛ baa,

14 nɛ e yeɔ manye ngɛ nɔ́ tsuaa nɔ́ mi; ejakaa Yawɛ kɛ lɛ ngɛ.

15 Benɛ Saul na bɔ nɛ David ngɛ nɔ yae ha a, e ye lɛ gbeye pe kekle ɔ po.

16 Se Israel kɛ Yuda tsuo suɔ lɛ saminya, ejakaa ma hɛ mi nyɛɛlɔ kpakpa ji lɛ.

David ngɔ Saul biyo

17 Ligbi ko ɔ, Saul de David ke, “O nɛ, ye biyo nɔkɔtɔma Merab ji nɛ ɔ nɛ. Ke o maa pee kã, nɛ o maa hwu Yawɛ ta amɛ ha mi ɔ, i kɛ lɛ ma ha mo.” Saul susu kaa ke e pee ja a, Filisti bi ɔmɛ a nine maa su David nɔ nɛ a maa gbe lɛ, nɛ lɛɛ e nine be e he sae.

18 David he nɔ ke, “Mɛnɔ ji mi, nɛ ye tsɛ we ɔ hu mɛnɔmɛ ji mɛ ngɛ Israel, nɛ́ imi nɛ ɔ i ba peeɔ matsɛ lɛɛ e ngatsɛ?”

19 Se benɛ e su be nɛ a kɛ Saul biyo Merab ma ha David ɔ, a ngɔ lɛ ngɔ ha Adriel, Mehola no ɔ mohu.

20 Kɛkɛ nɛ Saul biyo Mikal ba suɔ David sane; benɛ Saul nu he ɔ, e na he bua jɔmi.

21 Saul susumi ji e kɛ e biyo Mikal ma ha David nɛ e kɛ tsɔ lɛ klama, bɔ nɛ pee nɛ Filisti bi ɔmɛ a nine nɛ su e nɔ. Lɔ ɔ he ɔ, Saul de David si enyɔne ɔ ke, “Jehanɛ lɛɛ o maa pee ye ngatsɛ.”

22 Saul fa e tsɔli ɔmɛ ke a ya nɛ a kɛ David ya tu munyu ngɛ dami mi ke, “Matsɛ ɔ ngɛ o he bua jɔmi, nɛ e tsɔli ɔmɛ tsuo suɔ mo; lɔ ɔ he ɔ, moo hyɛ nɛ o ngɔ e biyo ɔ, konɛ o ba pee e ngatsɛ.”

23 Saul tsɔli ɔmɛ ya sɛɛ ní nɛ ɔ ha David, nɛ David de ke, “Matsɛ e ngatsɛ peemi ɔ, e ji hɛ mi nyami agbo! Imi ohiatsɛ nɛ i be blɔ nya ko ɔ, nɔ́ nɛ ɔ kle pe mi.”

24 Saul tsɔli ɔmɛ ya bɔ Saul nɔ́ nɛ David de ɔ.

25 Saul fa mɛ ke a ya de David ke, “Matsɛ ɔ hla we yo se ní kpa ko pe Filisti bi a mɔmlɔtɔ lafa kɛkɛ nɛ e kɛ ye he nyɛli ɔmɛ a he lue.” Saul to kikɛmɛ a ga nɛ ɔ bɔ nɛ pee nɛ Filisti bi ɔmɛ a nine nɛ su David nɔ nɛ a gbe lɛ.

26 Benɛ Saul tsɔli ɔmɛ ya bɔ David amaniɛ nɛ ɔ, e ngɔ David nya saminya kaa e maa pee matsɛ ɔ ngatsɛ. Loko be nɛ a to ɔ su ɔ,

27 David kɛ e we bi ɔmɛ ya gbe Filisti bi lafa enyɔ. David ngɔ a mɔmlɔtɔ ɔmɛ kɛ ho nɛ e ya kane mɛ sisiisi kɛ ha matsɛ ɔ, konɛ e na he blɔ nɛ e pee e ngatsɛ. Lɔ ɔ he ɔ, Saul kɛ e biyo Mikal ha David.

28 Saul ba yɔse faii kaa Yawɛ kɛ David ngɛ, nɛ e biyo Mikal ɔ hu suɔ lɛ.

29 Lɔ ɔ he ɔ, e ye David gbeye pe kekle ɔ po, nɛ David ba plɛ pee e he nyɛlɔ e wami ligbi tsuo.

30 Ke pee ɔ, Filisti ganɔ ɔmɛ ba tuaa Israel bi ɔmɛ. Se be tsuaa be nɛ ta ko maa te si ɔ, David yeɔ kunimi pe Saul tsɔli kpa amɛ tsuo. Nɔ́ nɛ ɔ ha David na biɛ wawɛɛ nitsɛ.